ទស្សនៈព្រឹត្តិការណ៍ខ្មែរ

ពណ៌​សម្បុរ​នយោបាយ​ជា​ថ្នាំ​បន្សាប​ឥទ្ធិពល​របស់​សហជីព

សំឡេង ០៣:៤៨
សហជីព​ការពារ​ប្រយោជន៍​កម្មករកំពុង​មើលឃើញ​ថា អំណាច​តវ៉ា​របស់​ខ្លួន​ត្រូវ​គេ​បង្រួញកាន់​តែ​​ខ្លាំង​​
សហជីព​ការពារ​ប្រយោជន៍​កម្មករកំពុង​មើលឃើញ​ថា អំណាច​តវ៉ា​របស់​ខ្លួន​ត្រូវ​គេ​បង្រួញកាន់​តែ​​ខ្លាំង​​ ©សុវណ្ណារ៉ា

តំណាង​សហជីព និង​តំណាង​និយោជក​ទើប​តែ​បាន​បើក​កិច្ច​ចរចា​គ្នា កាល​ពី​ថ្ងៃ​ទី​៨​កក្កដា អំពី​ ដំឡើង​ប្រាក់ឈ្នួល​ជូន​កម្មករ​ក្នុង​វិស័យ​កាត់ដេរ។ ការ​មិន​ចុះ​សម្រុង​គ្នា ក្នុង​ចំណោម​សហជីព​ចំពោះ​ចំនួន​ទឹកប្រាក់​ដែល​ត្រូវ​ទាមទារ និង​ការខ្វែង​គំនិត​គ្នា​ចំពោះ​សំណើ​របស់​រដ្ឋាភិបាល​ស្តីពី​ ដំឡើង​ប្រាក់ឈ្នួល​បាន​បង្ហាញ​យ៉ាង​ច្បាស់​អំពី​ពណ៌​សម្បុរ​នយោបាយ​របស់​ សហជីព។ ពណ៌​សម្បុរ​នយោបាយ​ដែល​ធ្វើ​ឲ្យ​សហជីព​បាត់បង់​តួនាទី​របស់​ខ្លួន​ក្នុង​ ការការពារ​ផល​ប្រយោជន៍​របស់​កម្មករ។

ផ្សាយពាណិជ្ជកម្ម

សហជីព​ដែល​ជា​អ្នកការពារ​ផល​ប្រយោជន៍​របស់​កម្មករ​បាន និង​កំពុង​ធ្វើឲ្យ​បាត់បង់​តួនាទី​របស់​ខ្លួន​បន្តិច​ម្តងៗ ដោយសារ​តែ​ការមិន​ចុះ​សម្រុង​គ្នា​ក្នុង​ចំណោម​ពួកគេ។ ប្រធានបទ​នៃ​ការទាមទារ​ដំឡើង​ប្រាក់​ឈ្នួល​កម្មករ​ដែល​កំពុង​ក្លាយជា​បច្ចុប្បន្នភាព​ដ៏​ក្តៅ​គគុក នៅ​ពេល​នេះ​អាច​ឆ្លុះ​បញ្ចាំង​បាន​អំពី​ការបែកបាក់​ដែល​ធ្វើឲ្យ​ឥទ្ធិពល​របស់​សហជីព​ចុះ​ខ្សោយ​នៅ​ចំពោះ​មុខ​និយោជក។

អ្វី​ដែល​គួរ​ឲ្យ​កត់សម្គាល់​នោះ​គឺ មាន​សហជីព​ខ្លះ​ទាមទារ​ដំឡើង​ប្រាក់​ខែ​គោល​ឲ្យ​កម្មករ​កាត់ដេរ​ឲ្យ​បាន​ជាង​៧០​ដុល្លារ សហជីព​ខ្លះ​ទៀត​ទាមទារ​រហូត​ដល់​ជាង​៩០​ដុល្លារ រីឯ សហជីព​មួយ​ចំនួន​ទៀត​បាន​គាំទ្រ​ការដំឡើង​ប្រាក់ឈ្នួល​តាម​សំណើ​របស់​រដ្ឋាភិបាល ត្រឹម​៦១​ដុល្លារ​ក្នុង​មួយខែ។ តើ​អ្វី​ទៅ​ជា​សេចក្តី​ត្រូវការ​ពិតប្រាកដ​របស់​កម្មករ​ដែល​សហជីព​ត្រូវ​ទាមទារ? នេះ​ជា​ចំណោទ​ដែល​ស្តែង​ចេញ​ពី​ជំហរ​ខុស​គ្នា​របស់​សហជីព។

ជាការពិត​ណាស់ សហជីព​បាន​រីក​ដុះដាល​ដូច​ផ្សិត​ត្រូវ​ទឹកភ្លៀង ជា​ពិសេស នៅ​ក្នុង​វិស័យ​កាត់ដេរ​សម្លៀក​បំពាក់។ ការរីក​ដុះដាល​របស់​សហជីព គឺជា​សញ្ញា​ល្អ៖ ទី១ វា​បង្ហាញ​ពី​ការយកចិត្ត​ទុកដាក់​ការពារ​សិទ្ធិ​របស់​កម្មករ ដើម្បី​ចៀស​ផុត​ពី​ការរំលោភ​បំពាន​ពី​សំណាក់​និយោជក និង​ទី២ វា​បង្ហាញ​ឲ្យ​ឃើញ​ពី​សេរីភាព​ដ៏​ទូលំទូលាយ​ក្នុង​ការ​បង្កើត​សហជីព នៅ​កម្ពុជា​ផងដែរ។ ប៉ុន្តែ ចាស់​បុរាណ​បាន​ពោល​ថា «គ្នា​ច្រើន​អន្សម​ខ្លោច»។ យ៉ាងណាមិញ វត្តមាន​ដ៏ច្រើន​លើសលប់​របស់​សហជីព​មិន​ប្រាកដ​ថា ផល​ប្រយោជន៍​របស់​កម្មករ​ត្រូវ​បាន​ការពារ​នោះ​ឡើយ។​

ម្យ៉ាង​ទៀត បញ្ហា​នឹង​រឹតតែ​ស្មុគស្មាញ​កាន់​តែ​ខ្លាំង នៅ​ពេល​ដែល​សហជីព​នីមួយៗ​សុទ្ធតែ​មាន​បង្កប់​ដោយ​និន្នាការ​នយោបាយ​នៅ​ពី​ក្រោយ​ខ្នង។​ក្នុង​ករណីនេះ សហជីព​តែងតែ​បង្ហាញ​ឲ្យ​ឃើញ​ពី​ភាព​លំអៀង​ខាង​នយោបាយ​ច្រើន​ជាង​ការការពារ​ផលប្រយោជន៍​ពិតប្រាកដ​របស់​កម្មករ។ ពណ៌​សម្បុរ​នយោបាយ នៅ​ក្នុង​សហជីព គឺជា​ដើមចម​នៃ​ការខ្វែង​គំនិត​គ្នា​ក្នុង​ចំណោម​អ្នកដឹកនាំ​សហជីព​ដែល​ទោះ​តិច ឬ​ច្រើន​បាន​ធ្វើ​ឲ្យ​សហជីព​បាត់បង់​តួនាទី​របស់​ខ្លួន​ក្នុង​ការការពារ​ផលប្រយោជន៍​របស់​កម្មករ។ ការខ្វែង​គំនិតគ្នា​ក្នុង​ការ​ទាមទារ​ដំឡើង​ប្រាក់ឈ្នួល​ជូន​កម្មករ​នៅ​ពេល​នេះ​ជា​ឧទាហរណ៍​ជាក់ស្តែង​មួយ។

ក្រុម​សហជីព​ដែល​មាន​និន្នាការ​លំអៀង​ទៅ​រដ្ឋាភិបាល​បាន​នាំគ្នា​គាំទ្រ​សំណើ​របស់​រដ្ឋាភិបាល ក្នុង​ការដំឡើង​ប្រាក់ឈ្នួល​ក្នុង​កម្រិត​៦១​ដុល្លារ ខណៈ​ដែល​សហជីព​​ដែល​មាន​និន្នាការ​ប្រឆាំង​បាន​គំរាម​ធ្វើ​កូដកម្ម។ តើ​មេដឹកនាំ​សហជីព​ទាំងអស់​នោះ​ពិត​ជា​មាន​ចេតនា​ការពារ​ផល​ប្រយោជន៍​កម្មករ​ពិតប្រាកដ​មែន​ឬ? អ្វី​ដែល​គួរ​ឲ្យ​កត់​សម្គាល់​នោះ​គឺ ក្នុង​នាម​សហជីព គេ​គួរ​យល់​បាន​អំពី​សេចក្តី​ត្រូវការ​របស់​កម្មករ។ ដូច្នេះ សហជីព​គួរណាស់​តែ​ឯកភាព​គ្នា​ដើម្បី​ទាមទារ​រក​ដំណោះស្រាយ​ដោយ​ផ្អែក​លើ​ផល​ប្រយោជន៍​របស់​កម្មករ​ផង និង​លទ្ធភាព​ជាក់ស្តែង​នៃ​សេដ្ឋកិច្ច​ក្នុង​វិស័យ​ដែល​ខ្លួន​កំពុង​បំពេញ​ការងារ​ផង។ ប្រសិន​បើ​គ្មាន​ផលប្រយោជន៍​នយោបាយ​មក​លាយឡំ​ទេ​នោះ គេជឿ​ជាក់​ថា គ្មាន​អ្វី​ដែល​គួរ​ឲ្យ​ខ្វែង​គំនិត​គ្នា​បែប​នេះ​ឡើយ។ ក្រៅ​ពី​ពណ៌​សម្បុរ​នយោបាយ សហជីព​ខ្លះ​ក៏បាន​បណ្តោយ​ខ្លួន​ឲ្យ​ស្ថិតនៅ​ក្រោម​ឥទ្ធិពល​នៃ​ប្រាក់​ដុល្លារ​ដែល​ធ្វើ​ឲ្យ​ពួកគេ​ស្រវាំង​ភ្នែក​មើល​មិន​សូវ​ឃើញ​ការលំបាក​ពិតប្រាកដ​របស់​កម្មករ។

សរុប​មក​វិញ ដើម្បី​ឲ្យ​សហជីព​អាច​បំពេញ​តួនាទី​របស់​ខ្លួន​ឲ្យ​ចំគោលដៅ មេដឹកនាំ​សហជីព​គួរ​ទុក​ផលប្រយោជន៍​នយោបាយ ឬ​ផលប្រយោជន៍​ផ្ទាល់​ខ្លួន​មួយ​អន្លើរ ដោយ​នាំគ្នា​ផ្តោត​អារម្មណ៍​ទៅ​លើ​ការការពារ​ផលប្រយោជន៍​របស់​កម្មករ​និយោជិត​ជាធំ។ «សាមគ្គី​ជា​កម្លាំង»​នេះ​ជា​ទស្សនៈវិជ្ជា​ដែល​សហជីព​ត្រូវ​ប្រកាន់​យក។ នយោបាយ​រូបនីយកម្ម​នៅ​ក្នុង​សហជីព គឺជា​ថ្នាំ​បន្សាប​ឥទ្ធិពល​របស់​សហជីព នៅ​ចំពោះ​មុខ​និយោជក។ រីឯ​កម្មករ​នៅ​តែ​រងារ​គ្មាន​អ្នកការពារ​ពិតប្រាកដ​តែ​ដដែល៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI