អានតួអត្ថបទ
កម្ពុជា​-ថៃ

កម្ពុជា ប្រកាស​យក​បញ្ហា​ជម្លោះ​ព្រំដែន​ជាមួយ​ថៃ ទៅ​កាន់​អង្គការ​សហប្រជាជាតិ និង​សហគមន៍​អន្តរជាតិ

លោក​នាយករ​ដ្ឋមន្ត្រី​ខ្មែរ ហ៊ុន សែន
លោក​នាយករ​ដ្ឋមន្ត្រី​ខ្មែរ ហ៊ុន សែន
ដោយ៖ លី ម៉េងហួរ
២៧ នាទី

នៅ​ថ្ងៃ​ច័ន្ទ ទី​៩​សីហា​នេះ លោក​ប្រមុខ​រដ្ឋាភិបាល ហ៊ុន សែន បាន​ប្រកាស​ថា កម្ពុជា បាន​ត្រៀម​លក្ខណៈ​រួច​រាល់ ដើម្បី​ប្តឹង​ទៅ​កាន់​ក្រុម​ប្រឹក្សា​សន្តិសុខ អង្គការ​សហប្រជាជាតិ ប្រសិនបើ​ថៃ​វាយប្រហារ ដោយ​អាវុធ​លើ​កម្ពុជា។ ជាមួយ​នឹង​សេចក្តី​ប្រកាស​នេះ លោក​នាយក​រដ្ឋមន្ត្រី ហ៊ុន សែន ក៏​បាន​អំពាវនាវ​ឲ្យ​សហគមន៍​អន្តរជាតិ បង្កើត​អង្គ​សន្និសីទ​មួយ ដើម្បី​ជជែក​ដោះស្រាយ​បញ្ហា​ព្រំដែន​រវាង​កម្ពុជា និង​ថៃ។

ផ្សាយពាណិជ្ជកម្ម

បទ​អន្តរាគមន៍​របស់ លី ម៉េងហួរ

លោក​នាយក​រដ្ឋមន្ត្រី ហ៊ុន សែន បាន​ប្រកាស​ដោយ​ដំឡើង​សម្លេង​សម្តី​ខ្លាំងៗ នៅ​ថ្ងៃ​ច័ន្ទ​នេះ​ថា ឥឡូវ​នេះ កម្ពុជា​បាន​ត្រៀម​លក្ខណៈ​រួច​ហើយ ចំពោះ​បញ្ហា​ព្រំដែន បើសិន​ថៃ​ឈ្លានពាន និង​បង្ក​សង្គ្រាម​ដូច​សេចក្តី​ប្រកាស​របស់​នាយក​រដ្ឋមន្ត្រី​ថៃ។ ទី​១-​ កម្ពុជា​ត្រូវ​ទប់ទល់​នឹង​សង្គ្រាម​ឈ្លានពាន នៅក្នុង​ទឹកដី​របស់​ខ្លួន និង​ទី​២-​ កម្ពុជា បាន​ត្រៀម​លិខិត​រួចរាល់​ហើយ ដើម្បី​បញ្ជូន​ទៅកាន់​ក្រុម​ប្រឹក្សា​សន្តិសុខ សុំ​ឲ្យ​កោះប្រជុំ​ជា​បន្ទាន់ លើ​សភាពការណ៍​ព្រំដែន​កម្ពុជា​-​ថៃ។
​ក្រៅ​ពី​យុទ្ធសាស្ត្រ ត្រៀម​ទប់ទល់​នឹង​សង្គ្រាម​ឈ្លានពាន​ពី​សំណាក់​ប្រទេស​ថៃ លោក​ប្រមុខ​រដ្ឋាភិបាល​កម្ពុជា ក៏​បាន​ប្រកាស​អំពាវនាវ​ដល់​បណ្តា​ប្រទេស សហគមន៍​អន្តរជាតិ ជា​ពិសេស​ប្រទេស​ជា​មិត្ត​របស់​កម្ពុជា និង​ប្រទេស​ជា​មិត្ត​របស់​ថៃ​ទាំង​អស់ ប្រសិនបើ​មាន​ការស្រុះស្រួល​គ្នា គួរតែ​រៀបចំ​សន្និសីទ​អន្តរជាតិ​មួយ ដើម្បី​ជជែក​ពិភាក្សា រក​ដំណោះស្រាយ​បញ្ហា​ព្រំដែន រវាង​កម្ពុជា និង​ថៃ។

​លោក​នាយក​រដ្ឋមន្ត្រី បាន​បញ្ជាក់​ថា កម្ពុជា​បាន​ត្រៀម​ខ្លួន ដើម្បី​ជជែក​ដោះស្រាយ​បញ្ហា​ព្រំដែន​គ្រប់​ពេល ទោះជា​នៅ​អង្គការ​សហប្រជាជាតិ និង​ទោះជា​នៅ​តុលាការ​យុត្តិធម៌​អន្តរជាតិ ទី​ក្រុង​ឡាអេ ក៏ដោយ។​

​សេចក្តីប្រកាស​របស់​ប្រមុខ​រដ្ឋាភិបាល​កម្ពុជា​ខាងលើ​នេះ ក៏​ដោយសារ​តែ​យន្តការ​ចរចា​ទ្វេ​ភាគី រវាង​រដ្ឋាភិបាល​កម្ពុជា និង​ថៃ ដើម្បី​ដោះស្រាយ​បញ្ហា​ព្រំដែន មក​ដល់​ពេល​នេះ ត្រូវ​ជាប់​គាំង គ្មាន​ច្រក​ចេញ។ លោក​ប្រមុខ​រដ្ឋាភិបាល ហ៊ុន សែន បាន​ប្រកាស​ជា​សាធារណៈ​ថា ឥឡូវនេះ យន្តការ​ទ្វេ​ភាគី កម្ពុជា​-​ថៃ ប្រហែល​ជា​ទៅ​លែង​រួច​ហើយ ឥឡូវ​យើង​រក​យន្តការ​ពហុភាគី​ម្តង។ លោក​នាយក​រដ្ឋមន្ត្រី ហ៊ុន សែន បាន​អំពាវនាវ សុំ​អាស៊ាន សុំ​អង្គការ​សហប្រជាជាតិ និង​សុំ​ប្រទេស​នានា ហើយ​ក្នុង​នោះ ក៏​មាន​ប្រទេស ជា​ហត្ថលេខី​នៃ​កិច្ចព្រមព្រៀង​សន្តិភាព​ទីក្រុង​ប៉ារីស​ផងដែរ។

​ក៏​ប៉ុន្តែ​ជាមួយ​នឹង​ការលើក​ឡើង​ដូច្នេះ លោក​ប្រមុខ​រដ្ឋាភិបាល ហ៊ុន សែន ក៏​បាន​ទុក​ពេល​ខ្លះ​ដល់​រដ្ឋាភិបាល​ក្រុង​បាងកក​ថា បើ​ថៃ​ចង់​ចរចា​ទ្វេភាគី ដើម្បី​ដោះស្រាយ​ជម្លោះ​ព្រំដែន គឺ​រដ្ឋសភា​ថៃ ត្រូវ​ឲ្យ​សច្ចាប័ន ផ្តល់​ការយល់ព្រម លើ​កំណត់ហេតុ​នៃ​ការសន្ទនា​ចរចា ៣ លើក​រវាង​រដ្ឋមន្ត្រី​ការបរទេស​កម្ពុជា និង​ថៃ លើ​ការ​ចុះ​វាស់​វែង​ព្រំដែន រួម​ទាំង​ការ​ដកទ័ព​ថៃ ចេញពី​តំបន់​ព្រំដែន​ប្រាសាទ​ព្រះវិហារ​ផង។
​សេចក្តីប្រកាស​យ៉ាង​ដូច្នេះ ត្រូវបាន​ធ្វើ​ឡើង​តែ​មួយ​ថ្ងៃ​ប៉ុណ្ណោះ ក្រោយពី​លោក​នាយក​រដ្ឋមន្ត្រី ហ៊ុន សែន កាលពី​ថ្ងៃអាទិត្យ ទី​៨ សីហា ឆ្នាំ​២០១០ បាន​ដាក់​លិខិត​ពីរ ទៅកាន់​ប្រធាន​ក្រុមប្រឹក្សា​សន្តិសុខ និង​មួយទៀត ទៅកាន់​ប្រធាន​មហាសន្និបាត អង្គការ​សហប្រជាជាតិ។ លិខិត​ជា​ការប្រញាប់​បំផុត ២ ច្បាប់ ដែល​រៀបរាប់​ពី​សម្តី​នាយក​រដ្ឋមន្ត្រី​ថៃ ដែល​បាន​ប្រកាស​គំរាម​​ប្រើ​កម្លាំង​យោធា ដើម្បី​ដោះស្រាយ​បញ្ហា​ព្រំដែន គឺជា​ការជូន​ដំណឹង​ពី​ជម្លោះ​ព្រំដែន ដែល​ប្រទេស​ថៃ បាន​បង្កឡើង ចាប់តាំងពី​ថ្ងៃ​ទី​១៥ កក្កដា ឆ្នាំ​២០០៨។
​ខ្លឹមសារ​លិខិត ដាក់​ទៅ​កាន់​អង្គការ​សហប្រជាជាតិ ក៏​ត្រូវ​លោក​ប្រមុខ​រដ្ឋាភិបាល​ខ្មែរ លើក​មក​បញ្ជាក់​ជា​សាធារណៈ​នៅ​ថ្ងៃនេះ​ថា កម្ពុជា​មិន​ឈ្លានពាន​ចូល​ទឹកដី​ថៃ​ទេ តែ​កម្ពុជា សុំ​រក្សា​សិទ្ធិ​ការពារ​ទឹកដី ប្រសិនបើ ថៃ លើកទ័ព​ទន្ទ្រាន​ឈ្លានពាន​កម្ពុជា ដោយ​ចេតនា។
​លោកនាយក​រដ្ឋមន្ត្រី បាន​បញ្ជាក់ ដោយ​ព្រមាន តាមរយៈ​ពាក្យ​សម្តី​ខ្លាំងៗ​ថា ថៃ​កុំ​អាង​ជា​ប្រទេស​ធំ ដែល​ប្រៀប​ដូច​ជា​សត្វ​ដំរី ក៏ប៉ុន្តែ​ទោះបី​ជា​កម្ពុជា​ក្រ និង​ខ្សោយ​មែន តែ​កម្ពុជា ដែល​ប្រៀប​ដូច​ជា​សត្វ​ស្រមោច ក៏​គង់​ធ្វើឱ្យ​ដំរី ដេក​មិន​បាន​ដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ