អានតួអត្ថបទ
កម្ពុជា

ឌុចប្តឹង​ជំទាស់​សាលក្រម​សាលាដំបូង​

សហមេធាវី​របស់​ឌុច គឺ​លោក​ការ សាវុត្ថ​ស្នើ​អោយ​តុលាការ​​កំពូល​ដោះលែង​​ឌុច​​អោយ​មាន​សេរីភាព​
សហមេធាវី​របស់​ឌុច គឺ​លោក​ការ សាវុត្ថ​ស្នើ​អោយ​តុលាការ​​កំពូល​ដោះលែង​​ឌុច​​អោយ​មាន​សេរីភាព​ ©Reuters / Mark Pitters
ដោយ៖ លាង ដឺលុច
១៨ នាទី

ទីបំផុតទៅ សហមេធាវី​របស់​ឌុច​បាន​ដាក់​បណ្តឹង​សាទុក្ខ​ទៅ​តុលាការ​កំពូល​របស់​សាលាក្តី ​ខ្មែរ​ក្រហម​ហើយ​កាលពី​ថ្ងៃទី​២៤សីហា។ ​ជាបណ្តឹង​ដែល​ជំទាស់​ទៅនឹង​ការ​សម្រេច​របស់​សាលា​ដំបូង​ដែល​បាន​ផ្តន្ទាទោស ​ឌុចដាក់​ពន្ធនាគារ​សរុប​៣៥ឆ្នាំ។​ សហមេធាវី​របស់​ឌុច គឺ​លោក​ការ សាវុត្ថ​ស្នើ​អោយ​តុលាការ​កំពូល​ដោះលែង​ឌុច​អោយ​មាន​សេរីភាព។ 

ផ្សាយពាណិជ្ជកម្ម

សេចក្តីរាយការណ៍របស់ ​លាង ដឺលុច

២ថ្ងៃ​មុន​ដល់​ថ្ងៃឱសានវាទ​នៃ​ការ​ដាក់​បណ្តឹង​ជំទាស់​សាលក្រម​សាលា​ដំបូង​ សហមេធាវី​របស់​កាំង ហ្គេចអ៊ាវ​ហៅឌុច​បាន​ដាក់​បណ្តឹង​សាទុក្ខ​ទៅតុលាការ​កំពូល​នៃ​សាលាក្តី​ខ្មែរក្រហម​ហើយ ​កាលពី​ថ្ងៃទី​២៤សីហា។​ ជាមួយ​នឹង​ការ​ប្រកាស​បដិសេធ​ចោល​សាលក្រម​របស់​សាលា​ដំបូង​ ទី​ប្រឹក្សា​ផ្នែក​ច្បាប់​របស់​ឌុច គឺ​លោកការ សាវុត្ថ​បាន​ស្នើអោយ​តុលាការ​កំពូល​នៃសាលា​ក្តី​ខ្មែរក្រហម​ដោះ​លែង​កូនក្តី​របស់​លោក​អោយមាន​សេរីភាព​ឡើងវិញ​ ហើយស្នើ​អោយ​សម្រេច​ចាត់ទុក​កូនក្តី​របស់​លោកគឺ​ឌុច​ ជា​សាក្សី​ទៅវិញ។​ លោកការ សាវុត្ថ​ក៏បាន​ផ្តល់​យោបល់​ទៅ​តុលាការ​កំពូល​ផង​ដែរ អោយ​ចាត់ទុក​រយៈពេល​នៃការ​ឃុំខ្លួន​ឌុច រាប់​ពីថ្ងៃ​ចាប់ខ្លួន​ដល់ថ្ងៃ​សម្រេចក្តី​ចុង​ក្រោយ​នៅពេល​ខាងមុខ​នោះ​ ដូច​ជាការ​ថែរក្សា​ការពារ​សាក្សី​ទៅចុះ។

 
នៅក្នុង​បណ្តឹង​សាទុក្ខ​នោះ សហមេធារី​របស់​ឌុច​លោកការ សាវុត្ថ​បាន​បង្ហាញ​ទឡ្ហីករណ៍​នៃ​ការ​ជំទាស់​សាលក្រម​ឌុច​ដោយ​និយាយថា​ សាលា​ដំបូង​បាន​បញ្ចូល​ឌុច​តែ​ទៅក្នុង​យុត្តាធិការ​ពេល​វេលា ​ដែនដី និង​បទល្មើស ដោយ​មិនបាន​រាប់​បញ្ចូល​យ៉ាង​ច្បាស់លាស់ ​យុត្តាធិការ​ឋានៈ​បុគ្គល​របស់​ឌុចនោះ​ទេ។​ ក្នុង​ន័យនេះ ​សហមេធាវី​របស់​ឌុច​ចង់​និយាយ​ថា ​បើ​សាលា​ដំបូង​នៃ​សាលាក្តី​ខ្មែរ​ក្រហម​បាន​គិត​ដល់​ឋានៈ​បុគ្គល​របស់​ឌុច​ក្នុង​សម័យ​ខ្មែរក្រហម​នោះ ​ឌុចកូនក្តី​របស់​លោក​មិន​បាន​ស្ថិត​នៅ​ក្នុង​មនុស្ស​ពីរប្រភេទ​ គឺ​អ្នក​ទទួល​ខុសត្រូវ​ជាន់ខ្ពស់ និង​មេដឹក​នាំជាន់​ខ្ពស់​នៃ​របប​ខ្មែរក្រហម ដែល​ត្រូវ​កំណត់​អោយ​ប្រឈម​មុខ​ចំពោះ​ការ​កាត់ទោស​នោះឡើយ។​ ដូច្នេះ ចំពោះ​លោក​ការ សាវុត្ថ ការ​សម្រេច​ផ្តន្ទាទោស​ទៅលើ​កូនក្តី​របស់​លោក ដោយ​មិនបាន​ពិនិត្យ​អំពី​ឋានៈ​បុគ្គល​របស់​ឌុច​នោះ គឺជា​ការ​ភាន់ច្រឡំ​មួយ​របស់​សាលា​ដំបូង​នៃ​តុលាការ​ខ្មែរក្រហម។

កាលពី​សប្តាហ៍​កន្លង​ទៅ ​សហព្រះរាជ​អាជ្ញា​នៃ​សាលាក្តី​ខ្មែរ​ក្រហម​ក៏បាន​ដាក់​បណ្តឹង​សាទុក្ខ​ទៅ​តុលាការ​កំពូល​របស់​សាលា​ក្តីពិសេស​នេះ​ដូចគ្នា​ ដោយ​ស្នើអោយ​តុលាការ​កំពូល​ដាក់​ទំងន់​ទោស​ទៅលើ​ឌុច អតីត​មេគុក​ទួល​ស្លែង​បន្ថែម​ទៀត។

លោកឌឹម សុវណ្ណរុំ ​អ្នក​នាំពាក្យ​សាលាក្តី​ខ្មែរក្រហម​បាន​ប្រាប់​អោយ​ដឹងថា យោង​តាម​នីតិវិធី​ភាគី​ទាំងពីរ​មាន​រយៈពេល​៦០ថ្ងៃ​បន្ទាប់​ពីថ្ងៃ​ដាក់​បណ្តឹង​ជំទាស់​សាលក្រម​ឌុច ដើម្បី​សរសេរ​សារណា​បណ្តឹង​សាទុក្ខ​អោយ​តុលាការ​កំពូល។​ លោកឌឹម សុវណ្ណរុំ​បញ្ជាក់​ថា តំណើ​ការ​នីតិវិធី​បន្ត​ទៀត​នោះ​នឹង​មិនស៊ី​ពេល​យូរ​ដូច​ដំណើរ​ការ​ជំនុំ​ជម្រះ​នៅសាលា​ដំបូង​នោះឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ