កម្ពុជា

ប្រធានាធិបតី​ឥណ្ឌា ​ទស្សនកិច្ច​នៅ​កម្ពុជា​ពង្រឹង​ការទូត​ និង​ពាណិជ្ជកម្ម​

លោកស្រី​ ប្រាទីបា ទវីសិង្ហ ប៉ាទីល ប្រធានាធិបតីឥណ្ឌា នឹង​ផ្តើមទស្សនកិច្ច​ ៦ថ្ងៃ​ទៅកម្ពុជា​ចាប់ពីថ្ងៃច័ន្ទ​១៣ កញ្ញាទៅ
លោកស្រី​ ប្រាទីបា ទវីសិង្ហ ប៉ាទីល ប្រធានាធិបតីឥណ្ឌា នឹង​ផ្តើមទស្សនកិច្ច​ ៦ថ្ងៃ​ទៅកម្ពុជា​ចាប់ពីថ្ងៃច័ន្ទ​១៣ កញ្ញាទៅ © នេត្រ ភក្រ្តា
ដោយ៖ បូលីន ដាវីដ
១៧ នាទី

ប្រធានាធិបតី​ឥណ្ឌា​នឹង​ចាប់​ផ្តើម​ទស្សនកិច្ច​រយៈពេល​ ៦ ថ្ងៃ​នៅ​កម្ពុជា​ដោយ​ចាប់​ផ្តើម​ពី​ថ្ងៃ​ចន្ទ​ស្អែក​នេះ​ទៅ។ ដំណើរ​ទស្សនកិច្ច​នឹង​ផ្តោត​ទៅ​លើ​ការ​រឹតបន្តឹង​ចំណង​ការទូត​ និង​កិច្ច​សហប្រតិបត្តិការ​លើ​ការ​អភិវឌ្ឍន៍​សេដ្ឋកិច្ច​ពាណិជ្ជកម្ម និង​ការ​វិនិយោគទុន។ ឯកសារ​មួយ​ចំនួន​ក៏​នឹង​ត្រូវ​ចុះហត្ថលេខា​នៅ​ក្នុង​អំឡុង​ពេល​នៃ​ដំណើរ​ ទស្សនកិច្ច​របស់​ប្រធានាធិបតី​ឥណ្ឌា​នៅ​កម្ពុជា​ផងដែរ។

ផ្សាយពាណិជ្ជកម្ម

សេចក្តីរាយការណ៍​របស់​នេត្រ ភក្រ្តា

ប្រធានាធិបតី​ឥណ្ឌា លោកស្រី ប្រាទីបា​ ទេវីសិង្ហ​ ប៉ាទីល​ នឹង​ចាប់​ផ្តើម​ធ្វើ​ទស្សនកិច្ច​ផ្លូវ​រដ្ឋ​របស់​លោក​ស្រី​នៅ​កម្ពុជា​នៅ​ថ្ងៃ​ចន្ទ​ស្អែក​នេះ​តបតាម​ការ​អញ្ជើញ​របស់​ព្រះមហាក្សត្រ​ខ្មែរ​សម្តេច​ព្រះបរមនាថ​ នរោត្តម​ សីហមុនី។ យោងតាម​សេចក្តី​ជូន​ព័ត៌មាន​របស់​ក្រសួង​ការបរទេស​កម្ពុជា​ទទួល​បាន​នៅ​ថ្ងៃ​នេះ​ ក្នុង​ដំណើរ​ ទស្សនកិច្ច​រយៈពេល​ ៦ ​ថ្ងៃ​ដែល​នឹង​ត្រូវ​បញ្ចប់​នៅ​ថ្ងៃ​ទី​១៨​ ខែកញ្ញា​ ខាង​មុខ​ លោកស្រី​ប្រធានាធិបតី​ឥណ្ឌា​នឹង​ចូល​ក្រាប​បង្គំគាល់​​ព្រះមហាក្សត្រ​ខ្មែរ​ ព្រមទាំង​ទទួល​ជួប​សម្តែង​​ការ​គួរសម​​ជាមួយ​​លោកជា​ ស៊ីម​ ប្រធាន​ ព្រឹទ្ធសភា លោក​ហេង​ សំរិន​ ប្រធាន​រដ្ឋសភា​ និង​ លោក​នាយក​រដ្ឋមន្ត្រី​ហ៊ុន សែន។

សេចក្តី​ជូនព័ត៌មាន​ដដែល​ បាន​ឲ្យ​ដឹង​ថា​ នៅ​ក្នុង​អំឡុង​ពេល​ទស្សនកិច្ច​នេះ ឯកសារ​ចំនួន​ពីរ​នឹង​ត្រូវ​ចុះ​ហត្ថលេខា​ក្រោម​អធិបតីភាព​របស់​លោកស្រី​ប្រធានាធិបតី​ឥណ្ឌា និង​លោក​នាយក​រដ្ឋមន្ត្រី​ហ៊ុន​ សែន។ ឯកសារ​ទាំង​ពីរ​នោះ​រួម​មាន​ ទី ១ គឺ​អនុស្សរណៈ​នៃ​ការ​យោគយល់គ្នា​ លើ​កិច្ច​សហប្រតិបត្តិការ​រវាង​អាជ្ញាធរ​សវនកម្មជាតិ​របស់​ប្រទេស​កម្ពុជា​និង​ការិយាល័យ​អគ្គ​ត្រួតពិនិត្យ និង​អគ្គសវនករ​នៃ​សាធារណរដ្ឋឥណ្ឌា។ ឯកសារ​ទី ២ គឺ​កិច្ចព្រមព្រៀង​ឥណទាន​សម្បទាន​ សម្រាប់​គម្រោង​អភិវឌ្ឍន៍​ធនធាន​ទឹកស្ទឹង​តាសាល ជំហាន​ទី ២ រវាង​រដ្ឋាភិបាល​កម្ពុជា និង​ធនាគារ​នីហរ័ណ​-អាហរ័ណ​ឥណ្ឌា។

ដំណើរ​ទស្សនកិច្ច​របស់​ប្រធានាធិបតី​ឥណ្ឌា​នៅ​កម្ពុជា មិន​ត្រឹមតែ​ផ្តោត​លើ​ការ​ពង្រឹង​ទំនាក់​ទំនង​ការទូត​ប៉ុណ្ណោះ​ទេ ប៉ុន្តែ​ប្រទេស​ទាំង​ពីរ​នឹង​ពង្រឹង​លើ​ទំនាក់​ទំនង​ពាណិជ្ជកម្ម​ជាមួយ​គ្នា​ផង​ដែរ។ ជំនួប​រវាង​ពាណិជ្ជករ​កម្ពុជា ​និង​ពាណិជ្ជករ​ឥណ្ឌា​មក​ពី​ប្រទេស​ឥណ្ឌា និង​ពាណិជ្ជករ​ដែល​កំពុង​វិនិយោគ​ទុន​នៅ​កម្ពុជា ត្រូវបាន​គេ​គ្រោង​នឹង​ធ្វើ​ឡើង​នៅ​ក្នុង​អំឡុង​ទស្សនកិច្ច​របស់​លោកស្រី​ប្រធានាធិបតី​ឥណ្ឌា​នេះ​ដែរ។ ដំណើរ​ទស្សនកិច្ច​ផ្លូវរដ្ឋ និង​ជំនួប​ពាណិជ្ជករ​ជាន់ខ្ពស់​ដែល​ត្រូវ​ក្រុម​មន្ត្រី​បាន​លើក​ឡើង​ថា គឺ​ជា​សារ​មួយ​យ៉ាង​សំខាន់​បង្ហាញ​ថា​កម្ពុជា​ និង ឥណ្ឌា​កាន់តែ​ខិតជិត​ចូល​គ្នា​ទាំង​វិស័យ​ការទូត និង​ពាណិជ្ជកម្ម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI