អានតួអត្ថបទ
កម្ពុជា

តំណាង​សហជីព​និង​តំណាង​ថៅកែ​រោងចក្រ​កាត់ដេរ​នឹង​អង្គុយ​ចរចា​ទល់​មុខគ្នា​នៅ​ថ្ងៃ​ស្អែក​

លោក អាត់ ធន់ ប្រធាន​សម្ព័ន្ធសហជីព​ប្រជាធិបតេយ្យ​កម្មករ​កាត់ដេរ​កម្ពុជា
លោក អាត់ ធន់ ប្រធាន​សម្ព័ន្ធសហជីព​ប្រជាធិបតេយ្យ​កម្មករ​កាត់ដេរ​កម្ពុជា © វណ្ណារ៉ា
ដោយ៖ គី សុខលីម
២១ នាទី

តំណាង​សហជីព​និង​តំណាង​ថៅកែ​រោងចក្រ​កាត់ដេរ​សម្រេច​ចិត្ត​អង្គុយ​ចរចា​ទល់មុខ​គ្នា​នៅ​ថ្ងៃ​ស្អែក។ ការ​ចរចា​នៅ​ថ្ងៃស្អែក​នឹង​ផ្ដោត​លើ​ការ​ដំឡើង​ប្រាក់​ឧបត្ថម្ភ​ផ្សេង​ៗ​ក្រៅ​ពី​ប្រាក់​ខែ​អប្បបរមា។

ផ្សាយពាណិជ្ជកម្ម

 

សេចក្តីរាយការណ៍​របស់ គី សុខលីម

ក្រោម​កិច្ច​សម្របសម្រួល​របស់​រដ្ឋាភិបាល​តំណាង​សហជីព​និង​តំណាង​ថៅកែ​រោងចក្រ​កាត់ដេរ​គ្រោង​នឹង​អង្គុយ​ទល់​មុខ​គ្នា​នៅ​ថ្ងៃ​ចន្ទ​ស្អែក​នេះ​ដើម្បី​ចរចា​អំពី​ការ​ដំឡើង​ប្រាក់​ឧបត្ថម្ភ​ផ្សេង​ៗ​ក្រៅ​អំពី​ប្រាក់ខែ​អប្បបរមា។

ការ​ចរចា​នៅ​ថ្ងៃ​ស្អែក​នេះ​គ្រោង​នឹង​ធ្វើ​ឡើង​បន្ទាប់​ពី​សហជីព​សម្រេច​ផ្អាក​ការ​ធ្វើ​កូដកម្ម​កាល​ពី​សប្ដាហ៍​មុន​តាម​រយៈ​ការ​ស្នើ​សុំ​របស់​រាជ​រដ្ឋាភិបាល។ កាល​ពី​ថ្ងៃ​ទី​១៣​ដល់​ថ្ងៃ​ទី​១៦​ខែ​កញ្ញា​កន្លងមក​នេះ កម្មករ​ជា​ច្រើន​ម៉ឺន​នាក់​បាន​ប្រកាស​ធ្វើ​កូដកម្ម​ក្នុង​រោងចក្រ​ជា​ច្រើន​ដើម្បី​ដាក់​សម្ពាធ​អោយ​ថៅកែ​ងាក​មក​រក​តុ​​ចរចា​ដំឡើង​ប្រាក់​ឧបត្ថម្ភ​ផ្សេង​ៗ។

លោក អាត់ ធន់ ប្រធាន​​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា​​ដែល​បាន​ដឹកនាំ​កូដកម្ម​យ៉ាង​សកម្ម​នោះ​បាន​បញ្ជាក់​ប្រាប់​នៅ​ថ្ងៃ​អាទិត្យ​នេះ​ថា លោក​ត្រៀម​ដាក់​សំណើ​មួយ​ចំនួន​ទៅកាន់​កិច្ច​ប្រជុំ​នៅ​ថ្ងៃ​ស្អែក​នេះ។ សំណើ​ទាំង​នោះ​ជា​រួម​មាន៖ ប្រាក់​ឧបត្ថម្ភ​សម្រាប់​អាហារ​ថ្ងៃ​ត្រង់​និង​អាហារ​សម្រាប់​ការងារ​បន្ថែម​ម៉ោង ប្រាក់​អតីតភាព ប្រាក់​ទ្រទ្រង់​សុខភាព។ល។

បើ​ទោះ​បី​ជា​លទ្ធផល​ប្រជុំ​ថ្ងៃស្អែក​គេ​នៅ​មិនទាន់​ដឹង​ក៏ដោយ​ក្តី​ក៏​លោក អាត់ ធន់ និយាយ​ថា លោក​សង្ឃឹម​នឹង​ទទួល​បាន​លទ្ធផល​ល្អ​​ពី​កិច្ចប្រជុំ​នៅ​ថ្ងៃ​ស្អែក។ នៅ​ពេល​ដែល​សួរ​សំណួរ​ថា ប្រសិនបើ​កិច្ច​ប្រជុំ​មិន​ទទួល​បាន​ផ្លែផ្កា​អ្វី​នោះ​តើ​សហជីព​របស់​លោក​នឹង​ធ្វើ​អ្វី​បន្ត​ទៀត? លោក អាត់ ធន់ បាន​ឆ្លើយ​ថា លោក​នឹង​កោះ​ប្រជុំ​សមាជិក​របស់​លោក​ដើម្បី​កំណត់​យុទ្ធសាស្ត្រ​នា​ពេល​អនាគត​។

ទាក់ទង​ទៅ​នឹង​លទ្ធផល​កិច្ច​ប្រជុំ​នៅ​ថ្ងៃ​ស្អែក​នេះ លោក ជាតិ ខេមរា មន្ត្រី​ជាន់​ខ្ពស់​នៃ​សមាគម​ថៅកែ​រោងចក្រ​កាត់ដេរ​កម្ពុជា​បាន​បញ្ជាក់​នៅ​ថ្ងៃ​អាទិត្យ​នេះ​ថា លោក​មិនអាច​ទស្សន៍ទាយ​ពី​លទ្ធផល​បាន​នៅ​ឡើយ​ទេ។

កិច្ច​ប្រជុំ​គ្រោង​នឹង​ប្រព្រឹត្ត​​ទៅ​នៅ​ថ្ងៃ​ស្អែក​មែន ប៉ុន្តែ​លោក អាត់ ធន់ បាន​សម្ដែង​ការ​សោកស្ដាយ​ចំពោះ​ទង្វើ​របស់​ថៅកែ​រោងចក្រ​កាត់ដេរ​ដែល​បាន​ព្យួរ​ការងារ​សកម្មជន​សហជីព​និង​កម្មករ​មួយ​ចំនួន​ដែល​បាន​ចូល​រួម​ធ្វើ​កូដកម្ម​កាល​ពី​ថ្ងៃ​ទី​១៣​ខែ​កញ្ញា​កន្លងមក​។ បើ​យោង​តាម​ការ​ប៉ាន់ស្មាន​ ក្រោយ​ពេល​កូដកម្ម តំណាង​សហជីព​ចំនួន​១៤៥​នាក់​ត្រូវ​បាន​ថៅកែ​ព្យួរ​ពី​ការងារ​និង​កម្មករ​ចំនួន​១៤៥​នាក់​ត្រូវ​បាន​គេ​បញ្ឈប់​ពី​ការងារ​តែ​ម្តង។
 

មេ​ដឹក​នាំ​កូដកម្ម លោក អាត់ ធន់ បាន​ចោទ​ប្រកាន់​ថា ការ​ព្យួរ​ឬ​ការ​បញ្ឈប់​សហជីព​និង​កម្មករ​ក្រោយ​ពេល​ធ្វើ​កូដកម្ម​គឺ​ជា​អំពើខុស​និង​រំលោភច្បាប់។ លោក អាត់ ធន់ បាន​​និយាយ​បន្ត​ទៀត​ថា ក្រោយ​ពេល​ដឹង​ដំណឹង​ថា តំណាង​សហជីព​ត្រូវ​បាន​គេ​ព្យួរ​ពី​ការងារ​ដោយសារ​តែ​ហេតុផល​ធ្វើ​កូដកម្ម​នោះ អ្នក​បញ្ជា​​ទិញ​សំលៀក​បំពាក់​ចំនួន​៩០​ភាគរយ​បាន​សរសេរ​លិខិត​ស្នើសុំ​អោយ​ថៅកែ​រោងចក្រ​កាត់ដេរ​អនុញ្ញាត​អោយ​តំណាង​សហជីព​និង​តំណាង​កម្មករ​ទាំង​អស់​ចូល​ធ្វើការ​វិញ។ ប៉ុន្តែ​រហូត​មក​ល្ងាច​ថ្ងៃ​នេះ គេ​នៅ​មិនទាន់​ដឹង​ថា តើ​ថៅកែ​សម្រេច​យ៉ាង​ដូច​ម្ដេច​នោះ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ