អានតួអត្ថបទ
កម្ពុជា

កិច្ច​ប្រជុំ​រវាង​រដ្ឋាភិបាល​ថៅកែ​រោងចក្រ​ និង​សហជីព​កម្មករ​ លើក​ឡើង​ពី​ការ​បញ្ចប់​ជម្លោះ​

កិច្ច​ប្រជុំ​រវាង​រដ្ឋាភិបាល​ ថៅកែ​រោងចក្រ​ និង​សហជីព​កម្មករ​ លើក​ឡើង​ពី​ការ​បញ្ចប់​ជម្លោះ​
កិច្ច​ប្រជុំ​រវាង​រដ្ឋាភិបាល​ ថៅកែ​រោងចក្រ​ និង​សហជីព​កម្មករ​ លើក​ឡើង​ពី​ការ​បញ្ចប់​ជម្លោះ​ © វណ្ណារ៉ា
ដោយ៖ លី ម៉េងហួរ
២០ នាទី

នៅ​ព្រឹក​ថ្ងៃ​ច័ន្ទ ទី​២៧​កញ្ញា​នេះ កិច្ចប្រជុំ​ត្រីភាគី រវាង​ភាគី​រដ្ឋាភិបាល ថៅកែ​រោងចក្រ​កាត់ដេរ និង​ភាគី​សហជីព​តំណាង​កម្មករ បានលើកឡើង​ពី​ការបញ្ចប់​ជម្លោះ ក្នុង​វិស័យ​កាត់ដេរ​។ ពោល​គឺ ភាគី​សហជីព​កម្មករ ត្រូវ​បញ្ឈប់​ការធ្វើ​កូដកម្ម​។ ចំណែក​ភាគី​ថៅកែ​រោងចក្រ ត្រូវ​ដក​ពាក្យបណ្តឹង​ប្រឆាំង​សហជីព​កម្មករ ដែល​បាន​ធ្វើ​កូដកម្ម​កន្លងមក ហើយ​ចូលរួម​តុ​ចរចា ស្តីពី ការ​តម្លើង​ប្រាក់​ឧបត្ថម្ភ ដល់​កម្មករ​កាត់ដេរ​។

ផ្សាយពាណិជ្ជកម្ម

សេចក្តី​រាយការណ៍​​របស់ លី ម៉េងហួរ

ដូច​ការគ្រោងទុក នៅ​ព្រឹក​ថ្ងៃ​ច័ន្ទ​នេះ ​សហជីព​កម្មករ សមាគម​ថៅកែ​រោងចក្រ និង​តំណាង​រដ្ឋាភិបាល ដឹកនាំ​ដោយ​លោក អ៊ិត សំហេង រដ្ឋមន្ត្រី​ក្រសួង​សង្គមកិច្ច និង​ជា​សហប្រធាន​ក្រុម​ការងារ​ទំនាក់ទំនង​វិជ្ជាជីវៈ បានជួបប្រជុំរួមគ្នា ក៏ប៉ុន្តែអង្គប្រជុំ​រយៈពេល​ពេញ​មួយ​ព្រឹក​ថ្ងៃ​នេះ មិន​បាន​លើកឡើង​ពី​របៀបវារៈ​​នៃ​ការ​តម្លើង​ប្រាក់​ឧបត្ថម្ភ​ដល់កម្មករ ដើម្បី​ជជែក​​ពិភាក្សា​​ទេ។ អង្គប្រជុំ បាន​បង្ហាញ​នូវ​ជំហរ និង​ទល្ហីករណ៍ របស់​ភាគី​សហជីព ថៅកែ​ក្រុមហ៊ុន និង​រដ្ឋាភិបាល ពិសេស​គឺជជែករកខុសរកត្រូវ ពីការធ្វើកូដកម្ម កាលពីថ្ងៃទី១៣​ដល់​ថ្ងៃ​ទី​១៦​កញ្ញា។

ទីបំផុតទៅ ក្នុងកិច្ចប្រជុំដោយបិទទ្វារនោះ ​លោក​រដ្ឋមន្ត្រី អ៊ិត សំហេង ប្រធាន​អង្គប្រជុំ បាន​ស្នើ​ឲ្យ​គ្រប់​ភាគី​ទាំងអស់ បញ្ឈប់​នូវ​សកម្មភាព​តវ៉ា ឬ​ការ​រក​រឿង​គ្នា​ទៅវិញទៅមក​។ ពោល​គឺ សហជីព​កម្មករ ត្រូវ​បញ្ឈប់​ការធ្វើ​កូដកម្ម​។ ចំណែក​ថៅកែ​រោងចក្រ​កាត់ដេរ ត្រូវ​បញ្ឈប់​ការ​ប្តឹងផ្តល់ និង​ការបញ្ឈប់​ថ្នាក់ដឹកនាំ​សហជីព ហើយ​ងាក​មក​រក​តុ​ចរចា​រួមគ្នា​។​

​អង្គប្រជុំ ក៏បាន​សម្រេច​បង្កើត​គណៈកម្មការ​ចម្រុះ​មួយ ដែល​មាន​តំណាង​សហជីព ៥ រូប​, ថៅកែ​រោងចក្រ ៥ រូប និង​រដ្ឋាភិបាល ២ រូប ដើម្បី​ចរចា ពិនិត្យ​លើ​បច្ចេកទេស​នៃ​ការ​តម្លើង​នូវ​ប្រាក់​អត្ថប្រយោជន៍​ផ្សេងៗ ដល់​កម្មករ​។ ភាគី​ទាំង​បី ត្រូវ​បញ្ជូន​ឈ្មោះ​តំណាង​របស់​ខ្លួន ទៅ​កាន់​ក្រសួង​សង្គមកិច្ច ឲ្យបាន​មុន​ថ្ងៃ​ទី​២៩ ខែ​កញ្ញា ឆ្នាំ​២០១០​។​ ​ចំពោះសេចក្តីសម្រេចនេះ ត្រូវបានគាំទ្រដោយក្រុមសហជីពកម្មករ ពិសេស​លោក អាត់ ធន់ ប្រធាន​សហភាព​ការងារ​កម្ពុជា ដែលបានដឹកនាំធ្វើកូដកម្ម។

​ក៏​ប៉ុន្តែ​លោក ជាតិ ខេមរា មន្ត្រីជាន់ខ្ពស់​សមាគម​រោងចក្រ​កាត់ដេរ តំណាង​ឲ្យ​ភាគី​ថៅកែ​រោងចក្រ បាន​លើកឡើង​ថា ក្រុម​ថៅកែ​រោងចក្រ​កាត់ដេរ មិន​ព្រម​ដក​ពាក្យបណ្តឹង ប្រឆាំង​មេដឹកនាំ​សហជីព​កម្មករ ដែល​ធ្វើ​កូដកម្ម​ឡើយ​។ ក្រុម​ថៅកែ​រោងចក្រ ទាមទារ​ឲ្យ​សហជីព​កម្មករ ចេញមុខ​ទទួលខុសត្រូវ ចំពោះ​ការខាតបង់​របស់​រោង​ចក្រ ជាង ១៥ លាន​ដុល្លារ ដោយសារតែ កូដកម្ម មុន​នឹង​អង្គុយ​ចរចា​បន្ត​។​

កិច្ចប្រជុំ​ចរចា​ខាងលើនេះ បាន​ធ្វើឡើង​ស្របពេល ដែល​ក្រុម​អ្នក​បញ្ជា​ទិញ​ផលិតផល​សម្លៀកបំពាក់​កាត់ដេរ ពី​ប្រទេស​កម្ពុជា​ចំនួន ៥ ស្ថាប័ន​ធំៗ ដូចជា ក្រុមហ៊ុន Adidas និង Levi ជាដើម បាន​ចេញ​លិខិត ជំរុញ​ឱ្យ​ភាគី​ថៅកែ​រោងចក្រ សហជីព​កម្មករ និង​រដ្ឋាភិបាល ត្រូវ​រួមគ្នា​ចរចា និង​ស្វែងរក​ដំណោះស្រាយ​មួយ​សមរម្យ ដើម្បី​ផ្តល់​នូវ​ស្ថេរភាព​យូរអង្វែង សម្រាប់​វិស័យ​ឧស្សាហកម្ម​កាត់ដេរ​នៅ​កម្ពុជា​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ