កម្ពុជា

សហជីព​កម្មករ​ផ្តល់យោបល់​លើសេចក្តី​ព្រាងច្បាប់​សហជីព​

ក្រុមសហជីពកម្មករ​និង​អង្គការ​ច្បាប់​បានជួបជុំ​ផ្តល់យោបល់​ដើម្បី​កែប្រែ​លើសេចក្តី​ព្រាងច្បាប់​សហជីព​
ក្រុមសហជីពកម្មករ​និង​អង្គការ​ច្បាប់​បានជួបជុំ​ផ្តល់យោបល់​ដើម្បី​កែប្រែ​លើសេចក្តី​ព្រាងច្បាប់​សហជីព​ ©​ លី​ ម៉េងហួរ

នៅ​ព្រឹក​មិញ​ ក្រុម​សហជីព​កម្មករ​និង​អង្គការ​ច្បាប់​ជាច្រើន​ទៀត​បាន​ជួបជុំ​ ផ្តល់យោបល់​ ដើម្បី​​កែប្រែ​លើ​សេចក្តីព្រាងច្បាប់​សហជីព។​ សេចក្តី​ព្រាងច្បាប់​សហជីព​ចំនួន ១៧ ​ជំពូក ​និង​៩២ មាត្រា​ត្រូវបាន​សហជីព​កម្មករ​ចាត់ទុក​ថា ​បាន​កម្រិត​ខ្លាំង​លើ​សិទ្ធិ​បង្កើត​សហជីព​តាម​រោងចក្រ​ ​ ហើយ​បើ​ច្បាប់​ដាក់ឲ្យ​ប្រើប្រាស់​ដោយគ្មាន​ការកែប្រែ​នោះ​នឹង​មិន​មាន​ការ​ តវ៉ា​ដំឡើង​​ប្រាក់ខែ ​ឬ​ការ​ទាម​ទា​រ​គោរព​សិទ្ធិ​កម្មករ​​ទៀតឡើយ។ 

ផ្សាយពាណិជ្ជកម្ម

សេចក្តីរាយការណ៍របស់​លី ម៉េងហួរ

ក្រុម​សហជីព​កម្មករ​បាន​លើកឡើង​ថា សេចក្តី​ព្រាងច្បាប់​សហជីព​ដែល​តាក់តែង​ដោយ​ក្រសួង​ការងារ​ និង​អង្គការ​ ILO បាន​កម្រិត​យ៉ាងខ្លាំង​ទៅលើ​សិទ្ធិ​ក្នុង​ការបង្កើត​សហជីព​តាម​បណ្តា​រោងចក្រ ​និង​ការធ្វើ​សកម្មភាព​របស់​សហជីព។​ មានន័យ​ថា បើ​ច្បាប់​សហជីព កើត​ឡើង​ដោយ​គ្មាន​ការកែប្រែ​នោះ​សហជីព​កម្មករ​តាម​រោងចក្រ​នានា​មិន​អាច​ធ្វើ​ការតវ៉ា​ទៀត​ទេ។

 
ក្នុង​សន្និសីទ​ស្តីពី​ការផ្តល់​យោបល់​លើ​សេចក្តី​ព្រាងច្បាប់​សហជីព​នា​ព្រឹក​ថ្ងៃទី​១៥​មីនា​ឆ្នាំ​២០១១​ លោក អាត់ ធន់ ប្រធាន​សហភាព​ការងារ​កម្ពុជា បាន​លើកឡើង​ថា សេចក្តី​ព្រាងច្បាប់​សហជីព​មាន​លក្ខណៈ​រឹត​បន្តឹង​ឬ​កម្រិត​សិទ្ធិ​យ៉ាងខ្លាំង​ក្នុង​ការ​បង្កើត​សហជីព។​ ការបង្កើត​សហជីព​កម្មករ​តាម​រោងចក្រ​មួយ​ដែល​ច្បាប់​តម្រូវឲ្យ​មាន​ការចូល​រួម​យ៉ាង​ហោច​ណាស់ ២០% ​នៃ​សមាជិក​សរុប​។ ​ម្យ៉ាងទៀត បើ​ថៅកែ​មិន​អនុញ្ញាតឲ្យ​បង្កើត​សហ​ជីព​ គឺ​សហជីព​កម្មករ​មិន​អាច​បង្កើត​បាន​ឡើយ។

តាម​លោក អាត់ ធន់ ខ្លឹម​សារ​ច្បាប់​សហជីព​ បើ​បង្កើត​សហជីព​បាន ទាល់តែ​សហជីព​នោះ​នៅក្រោម​ការ​គ្រប់គ្រង​របស់​ថៅកែ​ឬ​របស់​អ្នកមាន​អំណាច​ណាមួយ​ដែល​បម្រើ​ឲ្យ​ផល​ប្រយោជន៍​របស់​ថៅកែ។​ ប៉ុន្តែ​សហជីព​ដែល​បម្រើ​ឲ្យ​ផល​ប្រយោជន៍​កម្មករ​មិន​អាច​បង្កើត​បាន​ទេ​។ ​ច្បាប់​ថ្មី​នោះ​ក៏​ធ្វើឲ្យ​សហជីព​ងាយ​ត្រូវ​រំលាយ​ចោល​ទៅ​វិញ ហើយ​ថ្នាក់​ដឹកនាំ​សហជីព​ក៏​ប្រឈម​ជាប់ទោស​ក្នុង​ពន្ធនាគារ​ចាប់ពី​១ខែ​ទៅ​៣​ឆ្នាំ​ និង​រង​ការ​ពិន័យ​ជា​ប្រាក់​ពី ២ លាន​រៀល ទៅ ១០ លាន​រៀល ​បើ​សិនជា​គ្រាន់តែ​ដឹកនាំ​កម្មករ​ធ្វើ​បាតុកម្ម​ឬ​កូដកម្ម​តវ៉ា​ដែល​នាំ​ឲ្យ​ដំណើរការ​ក្នុង​រោងចក្រ​មិន​ប្រក្រតី។

ក្រុម​អង្គការ​សហជីព​កម្មករ​នៅ​ព្រឹក​មិញ​ក៏​បាន​ស្នើសុំ​ឲ្យ​រដ្ឋាភិបាល ផ្លាស់​ប្តូរ​ឈ្មោះ​សេចក្តី​ព្រាងច្បាប់​សហជីព​ទៅ​ជា​ច្បាប់​ទំនាក់ទំនង​វិជ្ជា​ជីវៈ ​ព្រមទាំង​លើកឡើង​នូវ​យោបល់​កែប្រែ​សេចក្តី​ព្រាងច្បាប់​ជាច្រើន​ចំនុច។

ក្រុម​មេដឹកនាំ​សហជីព​បាន​ព្រមាន​ថា​ បើ​សិនជា​រដ្ឋាភិបាល​ច្រាន​ចោល​នូវ​ការផ្តល់​យោបល់ ​របស់​សហជីព​ខាងលើ​នោះ​ពួក​គេ​នឹង​ដឹកនាំ​កម្មករ​ធ្វើ​កូដកម្ម​តវ៉ា។​ ច្បាប់​សហជីព​ត្រូវ​បាន​បង្កើត​ឡើង​តាម​ការ​ទាមទារ​របស់​ថៅកែ​ ដោយសារ​តែ​នៅតាម​រោងចក្រ​កាត់ដេរ​និង​ផលិត​ស្បែកជើង​ សព្វថ្ងៃ​មាន​សហជីព​តំណាង​កម្មករ​ច្រើន​រហូត​ដល់​មាន​សហជីព​ ៤ ឬ ៥ នៅក្នុង​រោងចក្រ​មួយ។​ ច្បាប់​នេះ ​ក៏​ទប់ស្កាត់​ការធ្វើ​បាតុកម្ម​ដោយ​ខុសច្បាប់។

ក្នុង​វេទិកា​រាជ​រដ្ឋាភិបាល​និង​ផ្នែក​ឯកជន​លើក​ទី១៥​ កាលពី​ថ្ងៃ​ទី​២៧ ខែ​មេសា​ឆ្នាំ​២០១០​លោក​នាយក​រដ្ឋមន្ត្រី ហ៊ុន សែន​បាន​ប្រកាស​យល់​ព្រម​ជា​មួយ​តំណាង​ការងារ​វិស័យ​ឯកជន​ខាង​រោងចក្រ​កាត់ដេរ​ពី​ការ​បង្កើត​ច្បាប់​សហជីព​ ហើយ​ថា​ច្បាប់​គ្រប់គ្រង​សហជីព​កម្មករ​នឹង​ត្រូវ​ចេញ​ឲ្យប្រើ​ប្រាស់​នៅ​ពាក់​កណ្តាល​ឆ្នាំ​២០១១នេះ៕
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI