កម្ពុជា

សហជីព​កម្មករ​ច្រើនពាន់នាក់​ចុះដង្ហែក្បួន​ទាមទារ​សិទ្ធិ​នៅថ្ងៃ​ទិវាពលកម្ម​អន្តរជាតិ​

លោក អាត់ ធន់ ប្រធាន​សហភាព​ការងារ​កម្ពុជា
លោក អាត់ ធន់ ប្រធាន​សហភាព​ការងារ​កម្ពុជា © វណ្ណារ៉ា

កម្មករ​សហជីព​និង​គណបក្ស​នយោបាយ​ទាមទារ​អោយ​មាន​ការ​គោរព​សិទ្ធិ​កម្មករ​និងឈប់​ធ្វើ​បាប​តំណាង​សហជីព។ ​លើស​ពី​នេះ​ទៅ​ទៀត តំណាង​កម្មករ​ទាមទារ​សូម​អោយ​រោងចក្រ​ចំនួន​១៣​ដែល​បាន​បញ្ឈប់​កម្មករ​ចំនួន ​១៤០​នាក់​ពី​ការងារ​អោយ​ចូល​ធ្វើការ​ឡើងវិញ​ជា​បន្ទាន់។

ផ្សាយពាណិជ្ជកម្ម

កម្មករ-កម្មការិនី​ច្រើន​ពាន់​នាក់​បាន​អំពាវនាវ​នៅ​ថ្ងៃ​ទី១​ខែ​ឧសភា​ត្រូវ​នឹង​ទិវា​ពលកម្ម​អន្តរជាតិ​អោយ​ដោះលែង​ប្រធាន​សហជីព ​សួស ចន្ថា ​ដែល​ត្រូវ​បាន​អាជ្ញាធរ​ចោទ​ប្រកាន់​និង​ចាប់​ដាក់​ពន្ធនាគារ​អស់​រយៈ​ពេល​ជិត​៥​ខែ​មក​ហើយ។

 
ការ​ចោទ​ប្រកាន់​លោក​ សួស ចន្ថា គឺ​ជា​ការ​ធ្វើ​ទុក្ខ​បុកម្នេញ​ប្រឆាំង​រើសអើង​នឹង​សហជីព​ដែល​តែងតែ​ការពារ​សិទ្ធិ​ផលប្រយោជន៍​និង​សេរីភាព​របស់​កម្មករ។​ ការ​ទាមទារ​របស់​កម្មករ​កាល​ពី​ព្រឹកមិញ​នេះ​បាន​ធ្វើឡើង​ត្រង់​ទៅ​កាន់​លោក​រដ្ឋ​មន្រ្តី​ក្រសួង​យុត្តិធម៌ ​អង្គ វង្សវឌ្ឍនា។

លោក អាត់ ធន់ ប្រធាន​សហភាព​ការងារ​កម្ពុជា​បាន​អត្ថាធិប្បាយ​ថា កន្លង​មក ​តុលាការ​តែងតែ​ដោះស្រាយ​ដោយមាន​ប្រសិទ្ធភាព​នៅ​ពេល​ដែល​មាន​ពាក្យ​បណ្ដឹង​ពី​និយោជក​ប្រឆាំង​នឹង​កម្មករ​ឬ​ថ្នាក់​ដឹកនាំ​សហជីព​ប៉ុន្តែ​នៅ​ពេល​ដែល​សហជីព​ដាក់ពាក្យ​បណ្ដឹង​ប្រឆាំង​នឹង​ថៅកែ​វិញ​សំណុំ​រឿង​ភាគច្រើន​មិន​ត្រូវ​បាន​គេ​ដោះស្រាយ​ទេ។

កម្មករ​កាត់ដេរ​ កម្មករ​សំណង់​ អ្នក​រត់​ម៉ូតូឌុប​ និង​មន្រ្តី​រាជការ​មួយ​ចំនួន​កាល​ពី​ព្រឹកមិញ​បាន​ទាមទារ​ច្រើន​ចំនុច​ក្រៅ​ពី​សំណុំ​រឿង​លោក សួស ចន្ថា​ប្រធាន​សហជីព​ប្រចាំ​រោងចក្រ​យូណាយធិត។ ​សេចក្តី​ប្រកាស​ព័ត៌មាន​របស់​សហភាព​ការងារ​កម្ពុជា​បាន​អំពាវនាវ​ដល់​រាជរដ្ឋាភិបាល​និង​និយោជក​អោយ​បញ្ឈប់​ការ​ប្រើប្រាស់​ប្រព័ន្ធ​តុលាការ​ដើម្បី​គំរាម​កំហែង​ចាប់​ខ្លួន​សកម្មជន​សហជីព អោយ​បញ្ចុះ​តម្លៃ​ប្រេងសាំង​ អោយ​កំណត់​ប្រាក់ឈ្នួល​សមរម្យ​និង​ចំនុច​ចុងក្រោយ​ កម្មករ-កម្មការិនី​អំពាវនាវ​អោយ​រោងចក្រ​ចំនួន​១៣​ទទួល​យក​កម្មករ​ចំនួន​១៤០​នាក់​ចូល​ធ្វើការ​ឡើង​វិញ។

កម្មករ​ចំនួន​១៤០​នាក់​នេះ​ត្រូវ​បាន​រោងចក្រ​កាត់ដេរ​បញ្ឈប់​ពី​ការងារ​បន្ទាប់ពី​ពួកគេ​បាន​ចូលរួម​ធ្វើ​កូដកម្ម​កាល​ពី​ខែកញ្ញា​ឆ្នាំ​២០១០​កន្លងមក។ ​លោក អាត់ ធន់ ប្រធាន​សហភាព​ការងារ​កម្ពុជា​បាន​ព្រមាន​ថា​ ប្រសិនបើ​រោងចក្រ​ដែល​ពាក់ព័ន្ធ​ចំនួន​១៣​នេះ​មិន​អើពើ​នឹង​ការ​ទាមទារ​អោយ​ចូល​ធ្វើ​ការ​វិញ​នោះ​ទេ​ ​ សហភាព​ការងារ​កម្ពុជា​អាច​នឹង​រៀបចំ​ធ្វើ​កូដកម្ម​នៅ​ក្នុង​រោងចក្រ​ទាំង​១៣​នេះ​តែ​ម្តង​នៅ​ក្នុង​ពេល​ខាង​មុខ​នេះ។

ចំពោះ​គណបក្ស​សិទ្ធិ​មនុស្ស​ឯណេះ​វិញ ​ ​​ ពួកគេ​អំពាវ​នាវ​អោយ​មាន​ការស្វែងរក​ឃាតករ​ដែល​បាន​បាញ់​សម្លាប់​កម្មករ​ពលករ​និង​តំណាង​សហជីព​នា​ពេល​កន្លង​មក។ ​លោក ជា វិជ្ជា ​មេ​ដឹកនាំ​សហជីព​ដ៏​ល្បីល្បាញ​មួយ​រូប​ត្រូវ​បាន​ឃាតករ​បាញ់​សម្លាប់​តាំង​ពី​ឆ្នាំ​២០០៤​មក​ម្ល៉េះ​ប៉ុន្តែ​ជនល្មើស​នៅ​មិន​ទាន់​រក​ឃើញ​នៅ​ឡើយ​ទេ។

លោក ទិត្យ សុធា អ្នក​នាំពាក្យ​អង្គភាព​ប្រតិកម្ម​រហ័ស​នៃ​ទី​ស្តី​ការ​គណៈ​រដ្ឋ​មន្រ្តី​បាន​អត្ថាធិប្បាយ​ជា​រួម​នៅ​ថ្ងៃ​ទិវា​ពលកម្ម​អន្តរជាតិ​នេះ​ថា កម្មករ​គួរ​អត់ធ្មត់​និង​ចៀសវាង​ការ​ធ្វើ​កូដកម្ម​បាតុកម្ម​ពីព្រោះ​ការ​ធ្វើ​កូដកម្ម​និង​បាតុកម្ម​មិន​ចំណេញ​នោះ​ទេ។ ​លោក បាន​បន្ត​ទៀត​ថា រដ្ឋាភិបាល​បាន​ជំរុញ​ការ​ដំឡើង​ប្រាក់ខែ​ជូន​កម្មករ​ជា​បន្ត​បន្ទាប់​មក​ហើយ៕

 

 

 

 

 

 

 

 

 

 

 

 
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI