អានតួអត្ថបទ
កម្ពុជា

អ្នក​ជំនាញ​៖ ទឹក​ជំនន់​ បន្ត​ស្រក​ចុះ​ ទោះបី​ជា​មាន​ភ្លៀង​ក៏​ដោយ​

ទឹក​បាន​ស្រក​ចុះ​ហើយ​ ទាំង​ជំនន់​ទឹក​ទន្លេ​មេគង្គ​ និង​ទាំង​ជំនន់​ទឹក​ភ្លៀង​ រួម​ទាំង​ទឹក​នៅ​ទន្លេ​ចតុមុខ​ និង​ទន្លេ​បាសាក់។ នៅភ្នំពេញ។
ទឹក​បាន​ស្រក​ចុះ​ហើយ​ ទាំង​ជំនន់​ទឹក​ទន្លេ​មេគង្គ​ និង​ទាំង​ជំនន់​ទឹក​ភ្លៀង​ រួម​ទាំង​ទឹក​នៅ​ទន្លេ​ចតុមុខ​ និង​ទន្លេ​បាសាក់។ នៅភ្នំពេញ។ Reuters
ដោយ៖ លី ម៉េងហួរ
១៨ នាទី

លោក​ ចាន់​ យុ​ត្ថា​ នាយក​​ខុទ្ទកាល័យ ​ក្រសួង​​ធនធានទឹក​ និង​​ឧតុនិយម​ បាន​ឲ្យ​​ដឹង​​នៅ​​ថ្ងៃ​ពុធ​នេះថា​ ជាទូ​ទៅ​ ទឹក​​ បា​ន​ស្រក​​ចុះ​​ហើយ​ ទាំង​​ជំនន់​ទឹក​​ទន្លេ​មេគង្គ​ និង​​ទាំង​​ជំនន់​​ទឹក​ភ្លៀង​ រួម​​ទាំង​​ទឹក​​ នៅ​​ទន្លេ​​ចតុមុខ​ និង​​ទន្លេ​បាសាក់​ នៅ​​ភ្នំពេញ​​ផង​ដែរ​។​ ទឹកជំនន់ចាប់​ផ្តើម​​​​​ស្រកចុះ​​ ​​​ចាប់តាំង​ពី​​រសៀល​​ថ្ងៃ​​ទី ​២៧​​កញ្ញា​​ម្សិលមិញ​។ នៅ​​រសៀល​​ថ្ងៃ​​ទី​​២៨​​កញ្ញា​​នេះ ​មាន​​ភ្លៀង​​ធ្លាក់​​ស្ទើរ​​គ្រប់​​កន្លែង​ ពិសេស​​នៅ​​ភ្នំពេញ​ សៀមរាប​ និង​​ខេត្ត​​កំពង់ធំ​​ជា​ដើម​។​ ក៏​ប៉ុន្តែ​ អ្នក​ជំនាញ​​បញ្ជាក់​ថា ​ទោះបី​ជា​​មាន​​ភ្លៀង​​ធ្លាក់​ តែ​​មិន​​ជះ​ឥទ្ធិពល​ បង្ក​​ឲ្យ​មាន​​ទឹក​ជំនន់​​ទៀត​ឡើយ។​​

ផ្សាយពាណិជ្ជកម្ម

មកដល់​រសៀល​ថ្ងៃ​ទី​២៨​កញ្ញា​នេះ ទឹក​​ទន្លេចតុមុខ និង​ចំណុចប្រសព្វ​ទន្លេបាសាក់ នៅ​ភ្នំពេញ ទឹកទន្លេ​ចាប់ផ្តើម​ស្រក​ចុះ​ហើយ។ ជាមួយគ្នា​នោះ ទឹក​នៅ​តំបន់​ជុំវិញ​ភ្នំពេញ ក៏​បាន​ហូរ​ចូល​នៅ​ទន្លេ​ចតុមុខ និង​ទន្លេបាសាក់ នាំ​ឲ្យ​ទឹកស្រ​កយឺត​។ តែ​ចាប់​ពី​យប់​ថ្ងៃ​២៨​កញ្ញា​នេះ​ទៅ ទឹក​ទន្លេចតុមុខ នឹង​ស្រក​ចុះ​។ នេះ​បើ​តាម​ការបញ្ជាក់​របស់​លោក ចាន់ យុ​ត្ថា នាយខុទ្ទកាល័យ ក្រសួង​ធនធានទឹក និង​ឧតុនិយម​។​

​នៅ​ថ្ងៃ​២៨​កញ្ញា​នេះ ទោះបីជា​មាន​ភ្លៀង​បន្តិចបន្តួច​នៅ​ស្ទើរ​ទូ​ទាំង​ប្រទេស ក៏​ប៉ុន្តែ​លោក ចាន់ យុ​ត្ថា បានបញ្ជាក់​ថា ទឹក​ភ្លៀង​នឹងមិន​ជះឥទ្ធិពល បង្ក​ជា​ទឹកជំនន់​ទៀតឡើយ​។​

​ចំពោះ​ព្យុះ​ហៃ​សាង ដែល​បាន​រលាយ​បាត់​នៅ​ឆ្នេរសមុទ្រ​ប្រទេស​វៀតណាម និង​ព្យុះមួយ​ទៀត​ ឈ្មោះថា នេសាទ កំពុង​នៅលើ​កោះ​ហៃណាំ ប្រទេស​ចិន និង​អាច​ទៅ​ដល់​ប្រទេស​វៀតណាម នៅ​ព្រឹក​ថ្ងៃទី​១ ឬ​ថ្ងៃ​ទី​២​តុលា​។ ប៉ុន្តែ​លោក​ចាន់​យុ​ត្ថា បាន​និយាយថា ព្យុះ​ថ្មី​ទាំង​ពីរ​នោះ នឹង​មាន​ឥទ្ធិពល​តិចតួច​លើ​កម្ពុជា គឺ​គ្រាន់តែ​អាច​បង្ក​ឲ្យមាន​ខ្យល់​ខ្លាំង​នៅ​សមុទ្រ និង​ធ្លាក់​ភ្លៀង​​តិចតួច​ប៉ុណ្ណោះ​។

​មន្ត្រី​ជំនាញ​ដដែល ក៏បាន​លើកឡើង​ថា គិត​មកដល់​ថ្ងៃ​ទី​២៨​កញ្ញា​នេះ ទាំង​ជំនន់​ទឹកភ្លៀង និង​ជំនន់​ទឹកទន្លេ បាន​បន្ត​ស្រក​ចុះ ពិសេស​នៅ​ទន្លេមេគង្គ ផ្នែក​ខាងលើ នៅ​ខេត្ត​ស្ទឹងត្រែង ក្រចេះ និង​ខេត្ត​កំពង់ចាម​។ ដោយឡែក ​ជំនន់​ទឹកភ្លៀង​នៅ​ទី​រួម​ខេត្តសៀមរាប និង​ខេត្ត​កំពង់ធំ ក៏​បា​នស្រក​ចុះ​ដែរ តែ​មិន​ទាន់​រីង​អស់​នៅឡើយ​ទេ​។​

​គណៈកម្មាធិកា​រ​ជាតិ​គ្រប់គ្រង​គ្រោះ​មហន្តរាយ ​​មិន​ទាន់​អាច​បញ្ជាក់​អំពី​តុល្យការ​ខូចខាត​ថ្មី នៅឡើយ​ទេ រហូត​ដល់​ថ្ងៃ​២៨​កញ្ញា​។ ក៏​ប៉ុន្តែ ​កាលពី​ថ្ងៃ​២៦​កញ្ញា ក្នុង​កិច្ចប្រជុំ​ពិសេស​គណៈរដ្ឋមន្ត្រី របាយការណ៍​បង្ហាញ​ថា ទឹកជំនន់​បាន​លិចលង់ ៨៧ ស្រុក នៅ ១៤ ខេត្ត ដោយ​មាន​មនុស្ស​ស្លាប់ ៦១ នាក់​។

ចំណែក​ការខូចខាត​ស្រូវ និង​ផ្លូវថ្នល់ មិន​ត្រូវ​បាន​បង្ហាញ​ទេ​។ ប៉ុន្តែ​បើ​តាម​របាយការណ៍​របស់​ក្រសួង​ធនធាន​ទឹក នៅ​ខេត្ត​ស្ទឹងត្រែង ក្រចេះ និង​ខេត្ត​កំពង់ចាម ដោយសារ​សព្វថ្ងៃ ទឹក​ចាប់​ផ្តើមស្រក​ នាំ​ឲ្យ​ផលប៉ះពាល់​លើ​សន្ទូង​ស្រូវ អាច​មាន​ក្រោម ១០ ម៉ឺន​ហិកតា​។ ចំណែក​នៅ​ផ្នែក​​ខាងក្រោម​ទន្លេមេគង្គ ក្នុង​ខេត្ត​កណ្តាល និង​ខេត្ត​ព្រៃវែង មន្ត្រី​ក្រសួង​ធនធានទឹក កំពុង​ធ្វើ​ការតាមដាន និង​វាយតម្លៃ​លើ​ការខូចខាត​ដំណាំ​ស្រូវ​។​

​នៅចំពោះមុខ​គ្រោះទឹកជំនន់​ពេលនេះ រដ្ឋាភិបាល​បាន​ដាក់ចេញ​នូវ​វិធានការ​សង្គ្រោះ​ចំពោះមុខ និង​វិធានការ​សង្គ្រោះ​នៅក្រោយ​ទឹកជំនន់​។ ក្នុងនោះ គណៈរដ្ឋមន្ត្រី កាលពីថ្ងៃចន្ទ បាន​សម្រេច​​​ផ្តល់​អង្ករ ១៧០០ តោន និង​លុយ ២០០ លាន​រៀល ស្មើ​ប្រមាណ ៥០.០០០ ដុល្លារ សម្រាប់​ខេត្ត​នីមួយៗ ជួយ​ដល់​ជនរងគ្រោះ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ