កម្ពុជា

លោក អៀង សារី​បោះបង់​សិទ្ធិ​ចូលរួម​សវនាការ​សំណុំរឿង ០០២

លោក អៀង សារី​បោះបង់​សិទ្ធិ​ចូលរួម​សវនាការ​សំណុំរឿង ០០២
លោក អៀង សារី​បោះបង់​សិទ្ធិ​ចូលរួម​សវនាការ​សំណុំរឿង ០០២ © ស៊ីវ​ ចាន់ណា

សំណុំរឿង ០០២ នៃ​សាលាក្តី​ខ្មែរក្រហម​ដែល​នឹង​បន្តធ្វើ​នៅ​សប្តាហ៍​ក្រោយនេះ​នៅសល់តែ​ជន​ចាប់​ចោទ​ពីរ​នាក់​ប៉ុណ្ណោះ​ដែល​ចូលរួម គឺ​នួន ជា និង​ខៀវ សំផន។ ដោយឡែក​លោក អៀង សារី ដែលមាន​បញ្ហា​សុខភាព​ធ្ងន់ធ្ងរ និង​កំពុង​សម្រាក​ព្យាបាល​ក្នុង​មន្ទីរពេទ្យ​បាន​បោះបង់​សិទ្ធិ​ចូលរួម​សវនាការ​ទៅហើយ បន្ទាប់ពី​ភរិយា​របស់លោក​គឺ លោកស្រី អៀង ធី​រិ​ទ្ធ ត្រូវបាន ដោះលែង​ដោយសារ​ជំងឺ​វង្វេង​បាត់​ការចងចាំ​ធ្ងន់ធ្ងរ។ ក្រៅពី​ចំណោទ​សុខភាព​ជនជាប់ចោទ សាលាក្តី​ខ្មែរក្រហម​ក៏​នៅ​ខ្វះ​ថវិកា៥លាន​ដុល្លារ​ទៀត​សម្រាប់​បន្ត​ដំណើរការ​ពីនេះ​ដល់​ដំណាច់ឆ្នាំ ២០១២។

ផ្សាយពាណិជ្ជកម្ម

លោក​អៀង សារី អតីតរដ្ឋមន្ត្រី​ក្រសួង​ការបរទេស​ខ្មែរក្រហម​ដែលជា​ជន​ជាប់ចោទ​ក្នុង​សំណុំរឿង០០២ បានធ្វើ​លិខិត​បោះបង់​សិទ្ធិ​ចូលរួម​សវនាការ​ហើយដោយ​សារ​តែ​បញ្ហា​សុខភាព។ លោក នេត្រ ភក្ត្រា អ្នកនាំពាក្យ​សាលាក្តី​ខ្មែរក្រហម​បាន​ប្រាប់​វិទ្យុ​បារាំង​អន្តរជាតិ​នៅថ្ងៃនេះ​ថា លោក​អៀង សារី នឹងត្រូវ​បន្ត​សម្រាក​ក្នុង​មន្ទីរពេទ្យ​រយៈពេល​យូរ​តទៅទៀត ដែលជា​ហេតុ​ធ្វើ​ឲ្យ​លោក​បោះបង់​សិទ្ធិ​ចូលរួម​សវនាការ​ដើម្បី​ចៀសវាង​ការ​រាំងស្ទះ។ ការ​បោះបង់​សិទ្ធិ​របស់លោក​អៀង សារី បានធ្វើ​ឲ្យ​ជនជាប់ចោទ​ក្នុង​សំណុំរឿង ០០២ នៅសល់តែ​ពីរ​នាក់​ប៉ុណ្ណោះ​ដែល​ត្រូវ​ចូលរួម​សវនាការ​នៅ​ដើម​សប្តាហ៍​ក្រោយ។ ជនជាប់ចោទ​ទាំងពីរ​ចុងក្រោយ​នេះ​គឺ លោក នួន ជា អតីត​បងធំ​ទី២របប​ខ្មែរក្រហម អាយុ ៨៦ ឆ្នាំ និង​លោក ខៀវ សំផន អតីត​ប្រមុខរដ្ឋ​កម្ពុជា​ប្រជាធិបតេយ្យ អាយុ ៨១ ឆ្នាំ។ ជនជាប់ចោទ​ទាំងពីរ​នឹង​បន្ត​ស្តាប់​សក្ខីកម្ម​របស់​សាក្សី​ដែល​នឹង​ឡើងមក​និយាយ​ពាក់​ព​ន្ធ័​នឹង​តួនាទី​របស់​ពួកគេ​ក្នុង​របប​ខ្មែរក្រហម។

លោក​អៀង សារី អាយុ ៨៧ ឆ្នាំ ត្រូវបាន​គេ​ដឹក​ទៅ​មន្ទីរពេទ្យ​មិត្តភាព​ខ្មែរ​សូ​វៀត​ឬ​ហៅថា​ពេទ្យរុស្ស៊ី​កាលពី​ថ្ងៃទី៧កញ្ញា។ លោក​មាន​សភាព​ហេវ​ហត់​និង​ចុះខ្សោយ​យ៉ាងខ្លាំង​ដោយសារតែ​ជំងឺ​បេះដូង។ ចុងក្រោយ​នេះ ក្រុមគ្រូពេទ្យ​ជំនាញ​បាន​រកឃើញថា លោក​អៀង សារី មាន​បញ្ហា​ឆ្អឹង​កងក​ដែល​ធ្វើ​ឲ្យ​ស្ពាធ​សរសៃឈាម។ បើ​យោងតាម​គ្រូពេទ្យ​ជំនាញ ជំងឺ​នេះ​ទាមទារ​ឲ្យ​មានការ​វះកាត់ ប៉ុន្តែ ការវះកាត់​អាច​ប្រឈម​នឹង​បញ្ហា​ធ្ងន់ធ្ងរ​ដោយសារតែ​វ័យចាស់​ជរា និង​បញ្ហា​បេះដូង​របស់គាត់។ យ៉​ងា​ណាក៏ដោយ ការព្យាបាល​ដោយ​ប្រើ​ថ្នាំ​ក៏​ជា​ជម្រើស​មួយ​ដែរ តែ​ត្រូវការ​រយៈពេល​យូរ។ ស្ថានភាព​នេះ​បានធ្វើ​ឲ្យ​លោក អៀង សារី ត្រូវ​អវត្តមាន​ពី​ក្នុង​អង្គ​សវនាការ​ដោយ​គ្មាន​កាលកំណត់។ ការបោះបង់​សិទ្ធ​ចូលរួម​សវនាការ​របស់លោក អៀង សារី បាន​ធ្វើឡើង​បន្ទាប់ពី​ភរិយា​របស់លោក​គឺ លោកស្រី អៀង ធី​រិ​ទ្ធ ត្រូវបាន​តុលាការ​ដោះលែង​ឲ្យ​មាន​សេរីភាព​កាលពី​ថ្ងៃទី១៦ កញ្ញា ដោយសារ​ជំងឺ​វង្វេង​បាត់​ការចងចាំ​ធ្ងន់ធ្ងរ​ដែល​មិនអាច​ចូលរួម​សវនាការ​បាន។

គួរ​កត់សម្គាល់ថា ក្រៅពី​បញ្ហា​សុខភាព​របស់​ជនជាប់ចោទ សាលាក្តី​ខ្មែរក្រហម​ក៏​កំពុង​ប្រឈម​នឹង​បញ្ហា​ខ្វះ​ថវិកា​ផងដែរ។ លោក​នេត្រ ភក្ត្រា អ្នកនាំពាក្យ​សាលាក្តី​ខ្មែរក្រហម បាន​ឲ្យ​ដឹងថា ដើម្បី​អាច​បន្ត​ដំណើរការ​រហូត​ដល់​ដំណាច់ឆ្នាំ២០១២នេះ សាលាក្តី​ខ្មែរក្រហម​នៅ​ខ្វះ​ថវិកា​សរុប៥លាន​ដុល្លារ​ទៀត​ក្នុងនោះ​ភាគី​អន្តរជាតិ​ខ្វះ៤លាន​ដុល្លារ និង​ភាគី​កម្ពុជា​ខ្វះ ១លាន​ដុល្លារ។ ចំណោទ​ទាំងពីរ​បាន​បង្កើត​ឲ្យ​មាន​ក្តីបារម្ភ​អំពី​អនាគត​សាលាក្តី​កូនកាត់​មួយ​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI