កម្ពុជា

លោក កឹម សុខា អះអាង​ថា មាន​ការ​គំរាម​​កំហែង​​ដល់​សន្តិសុខ​ផ្ទាល់​ខ្លួន

លោក ​កឹម ​សុខា ​ប្រធាន​គណបក្ស​សិទ្ធិមនុស្ស (រូបភាពឯកសារ)
លោក ​កឹម ​សុខា ​ប្រធាន​គណបក្ស​សិទ្ធិមនុស្ស (រូបភាពឯកសារ) RFI/Ly Meng Hour

លោក កឹម សុខា​ប្រធានស្តីទី​គណបក្ស​សង្គ្រោះជាតិ បាន​ថ្លែង​នៅ​ក្នុង​សន្និសីទ​កាសែត​នៅ​ព្រឹក​​ថ្ងៃ​ទី​១២​​មិថុនា​ថា លោក កំពុង​ជួប​ប្រទះ​បញ្ហា​អសន្តិសុខ​ផ្ទាល់​ខ្លួន ខណៈ​ដែល​ការ​បោះឆ្នោត​​ជិត​​មិក​​ដល់​​នោះ។ លោក ស្នើ​ឱ្យ​រដ្ឋាភិបាល​ចាត់​វិធានការ​ចំពោះ​រឿង​នេះ ដើម្បី​ធានា​​ដល់​​ការ​បោះឆ្នោត​​ដោយ​​សេរី និង​យុត្តិធម៌។  

ផ្សាយពាណិជ្ជកម្ម

ប្រធានស្តីទីគណបក្សសង្គ្រោះជាតិ បានថ្លែងក្នុងសន្និសីទសារព័ត៌មានថា លោក កំពុងតែជួបប្រទះបញ្ហាអសន្តិសុខផ្ទាល់ខ្លួន និងមានការរំខានដល់សកម្មភាពនយោបាយរបស់បក្សសង្គ្រោះជាតិទាំងមូល។ ដែលនេះជាសញ្ញាណ​​ប្រាសចាកពីដំណើរការនៃការបោះឆ្នោតដោយសេរី និងយុត្តិធម៌។

 
លោក កឹម សុខា បានអះអាងថា ការរំខានដល់សកម្មភាពនយោបាយ រួមទាំងសន្តិសុខផ្ទាល់ខ្លួន​របស់​លោក​មាន​ចាប់តាំងពីថ្ងៃទី៩ មិថុនាមកម្លេះ ដោយការចាក់ធុងប៉ាស និងឧបករណ៍ឃោសនសព្ទបំពងសម្លេងផ្សេងៗទៀត រំខានដល់ការ​ឃោសនា រួមទាំងការបង្កើតឱ្យមានក្បួនបាតុកម្មរារាំងការធ្វើដំណើររបស់លោក នៅតាមមូលដ្ឋានទៀតផង។
 
គួរ​រម្លឹក​ថា កាល​ពី​រសៀលថ្ងៃ​ទី១២​ខែមិថុនាលោក កឹម សុខា ត្រូវបានពលរដ្ឋនៅឃុំដីឥតស្រុកកៀនស្វាយ រាប់រយនាក់បានធ្វើបាតុកម្មបិទផ្លូវរារាំងមិនឱ្យលោកធ្វើដំណើរត្រឡប់មកកាន់ទីក្រុងភ្នំពេញវិញ។តែទោះជាយ៉ាងណា លោក កឹម សុខា បាននិយាយថា លោក និងគណបក្សសង្គ្រោះជាតិ នៅតែបន្តធ្វើដំណើរទៅកាន់មូលដ្ឋានដដែល។
 
ទាក់ទិននឹងបញ្ហាអសន្តិសុខ​របស់លោក កឹម សុខានេះដែរ លោក គៀត ចន្ថារិត អ្នកនាំពាក្យអគ្គស្នងការនគបាលនៃក្រសួងមហាផ្ទៃ បានឆ្លើយតបថា ទោះបីជាមិនទាន់ដល់យុទ្ធនាការបោះឆ្នោតក៏ដោយ ក៏កម្លាំងសមត្ថកិច្ចរបស់ក្រសួងមហាផ្ទៃ បានការពារដល់គ្រប់បុគ្គលនយោបាយ ដោយមិនប្រកាន់និន្នាការគណបក្សនយោបាយទេ។
 
លោក បញ្ជាក់ថា កម្លាំងសមត្ថិកច្ចរបស់ក្រសួងមហាផ្ទៃ មិនត្រឹមតែការពារតែលោក កឹមសុខា ទេគឺ បានការពារដល់ក្រុមគ្រួសាររបស់លោក ថែមទៀតផង។
 
ការគំរាមកំហែងផ្នែកសន្តិសុខ និងការរំខានដល់សកម្មភាពនយោបាយទាំងនេះលោក កឹម សុខា អះអាងថាជាដំណើរការអស្ថេរភាពផ្នែកនយោបាយមុនការបោះឆ្នោត ហើយការបោះឆ្នោត មិនមាន​ភាពស្មើគ្នា និងយុត្តិធម៌​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI