កម្ពុជា

ក្រុម​សហគមន៍​ដី​ធ្លី ដង្ហែរ​ញត្តិ សុំ​ឲ្យ​រដ្ឋាភិបាល ដោះស្រាយ បញ្ហា​គំរាម​កំហែង សកម្មជន​ដីធ្លី

ប្រជាពលរដ្ឋ​ជាង១០០០​គ្រួសារ​ដែល​រស់នៅ​តំបន់​បឹងកក់​តស៊ូក្រាញ​មិនព្រម​ចាកចេញ​តាមការ​បណ្តេញ​របស់​ក្រុមហ៊ុន​
ប្រជាពលរដ្ឋ​ជាង១០០០​គ្រួសារ​ដែល​រស់នៅ​តំបន់​បឹងកក់​តស៊ូក្រាញ​មិនព្រម​ចាកចេញ​តាមការ​បណ្តេញ​របស់​ក្រុមហ៊ុន​ © ស៊ីវ​ ចាន់ណា

សហគមន៍​ដីធ្លី មកពី ២៤ ខេត្តក្រុង ២៤ ទូទាំង​​ប្រទេស បាន​​នាំ​​គ្នា​​ដង្ហែរ ​ញត្តិ ដើម្បី​​ដាក់​​ជូន​ក្រសួង​​​យុត្តិធម៌ ​រដ្ឋសភា និង​​ក្រុមប្រឹក្សា​​អង្គចៅក្រម ដើម្បី​​ស្វែង​រក​​ដំណោះស្រាយ ព្រមទាំង​ស្នើ​សុំ​​ឲ្យ​មាន​​ការ​​ដោះលែង​​សកម្មជន​​ដីធ្លី​​ដែល​​កំពុង​​ជាប់​​ឃុំឃាំង និង​​បញ្ឈប់​​ការ​គំរាម​កំហែង​ផ្សេងៗ​​ទៅ​​លើ​​សកម្មជន​​ការពារ​​ដីធ្លី​​ទាំង​នោះ។

ផ្សាយពាណិជ្ជកម្ម

 

តាំង​ពី​ម៉ោង​៧  កន្លះ​ព្រឹក ប្រជា​សហគមន៍ ប្រមាណ​ជិត ១ ០០០នាក់ ដែល​មក​ពី ២៤ ខេត្ត​ក្រុង នៅ​ព្រឹក​ថ្ងៃ​ពុធ​នេះ ​បាន​ប្រមូល​ផ្តុំ​គ្នា ​នៅ​មុខ​ក្រសួង​​យុត្តិធម៌ ​ដើម្បី​ដាក់​ញត្តិ​ជូន​ក្រសួង​យុត្តិធម៌ រដ្ឋ​សភា និង​ឧត្តម​ក្រុមប្រឹក្សា​​នៃ​អង្គចៅក្រម ក្នុង​គោលបំណង​ទាមទារ​ឲ្យ​ដោះលែង​សកម្មជន​សិទ្ធិ​មនុស្ស​ការពារ​ដី​ធ្លី ​និង​ធនធាន​ធម្មជាតិ ពិសេស​ស្នើ​ឲ្យ​មាន​ការ​ចាត់​វិធាន​ការ​តាម​ផ្លូវ​ច្បាប់​ចំពោះ​មន្ត្រី​តុលាការ​ដែល​ប្រព្រឹត្ត​អំពើ​ពុករលួយ ផ្ទុយ​ពី​វិជ្ជាជីវៈ​របស់​ខ្លួន។

ក្រុម​ប្រជាសហគមន៏​ទាំង​នោះ សុទ្ធ​តែ​ជា​ប្រជាពលរដ្ឋ​ដែល​រង​ផល​ប៉ះពាល់​ពី​ការ​រំលោភ​បំពាន​ដី​ធ្លី ការ​កាប់​បំផ្លាញ​ព្រៃឈើ ការ​បំផ្លាញ​ធនធាន​ធម្មជាតិ និង​ការ​បណ្តេញ​ចេញ​ពី​លំ​នៅដ្ឋាន។ ពួក​គេ​បាន​នាំ​គ្នា​ស្រែក​ថ្លែង​ការណ៍​​នៅ​មុខ​ក្រសួង​យុត្តិធម៌​ដើម្បី​ឲ្យ​មន្ត្រី​តុលាការ​ដោះលែង​សកម្មជន​ទាមទារ​សិទ្ធិ​ដី​ធ្លី ដែល​ត្រូវ​បាន​ចាប់​ឃុំ​ខ្លួន ក្នុង​ជម្លោះ​ពាក់ព័ន្ធ​ដីធ្លី​នៅ​ទូទាំង​ប្រទេស។

សកម្មភាព​ស្រែក​តវ៉ា​របស់​ប្រជាសហគមន៍​បានធ្វើ​ឡើង​យ៉ាង​កងរំពង និង​ខ្លាំងក្លា ដោយ​មាន​កាន់​បដា​សរសេរ​ពាក្យ​រិះគន់​ទៅ​លើ​ប្រព័ន្ធ​យុត្តិធម៌ និង​មន្ត្រី​តុលាការ​ដែល​ពុករលួយ។ ពួក​គេ​ក៏​បាន​កាន់​បង្ហាញ​ផង​ដែរ​ផ្ទំាង​រូបថត​ធំៗ ដែល​បង្ហាញ​ពី​សកម្មភាព​ប្រើ​អំពើហិង្សា​របស់​កង​កម្លំាង​ប្រដាប់អាវុធ​របស់​រដ្ឋាភិបាល បង្ក្រាប​ទៅ​លើ​ប្រជាពលរដ្ឋ ពេល​ចុះឈូស​ឆាយ​ផ្ទះ​សម្បែង​នៅ​ក្នុង​សហគមន៏​របស់​ពួក​គេ​រស់​នៅ​ដូចជា តំបន់​បូរីកីឡា តំបន់​បឹងកក់ និង​នៅ​សហគមន៍​តាម​ខេត្ត​មួយ​ចំនួន​ទៀត​ដែល​រង​ផល​ប៉ះពាល់​ពី​ការអភិវឌ្ឍន៍ របស់​ក្រុមហ៊ុន ដែល​ទទួល​បាន​ការ​សម្បទាន​ពី​រាជរដ្ឋាភិបាល។

ឈុត​សម្តែង​ខ្លីៗ​របស់​ប្រជាសហគមន៍​ដែល​រងគ្រោះ​ដោយ​អំពើ​រំលោភ​ដីធ្លី ក៏​បាន​សម្តែង​អំពី​ការ​ចុះ​អនុវត្ត​ច្បាប់​របស់​មន្ត្រី​តុលាការ ដោយ​មាន​ការ​ដឹកនាំ​កម្លាំង​បង្រ្កាប​ទៅ​លើ​ប្រជាពលរដ្ឋ។ ជា​មួយ​​គ្នា​នោះ ក្រុម​ប្រជាសហគមន៍​ក៏បាន​ដាក់​បង្ហាញ​នូវ​រូប​សំណាក​ដូច​រូប​ទីងមោង ធ្វើ​ពី​ក្រណាត់​សំដៅ​ដល់​មន្ត្រី​តុលាការ ចៅក្រម ព្រះរាជអាជ្ញា និង​មេធាវី ដោយ​មាន​កាន់​ក្រដាស់​ប្រាក់​ដុល្លារ​ជា​ច្រើន ប៉ុន្តែ​មាន​ផង​ដែរ​នូវ​អំបិល​គ្រួស លាយ​ផ្លែម្ទេស​ក្រហម​ឆ្អិនឆ្អៅ​ចំនួន​១០ល្អី​តូចៗ។ បើ​តាម​អ្នក​រៀបចំ​កម្មវិធី​បាន​បញ្ជាក់​ប្រាប់​វិទ្យុ​បារាំង​ថា ដើម្បី​ដាក់​បណ្តាសសារ​ទៅ​លើ​មន្ត្រីតុលាការ​ណា​ដែល​ប្រព្រឹត្ត​អំពើ​ពុករលួយ និង​កាត់ក្តី​ដោយ​អយុត្តិធម៌។

បើ​តាមសេចក្តី​ថ្លែងការណ៍​របស់​ប្រជាសហគមន៍ ដែល​សេចក្តី​ថ្លែងការ​នេះ​ត្រូវ​ប្រគល់​ជូន​ឲ្យ​ក្រសួង​យុត្តិធម៌​ផង​នោះ ​បាន​សរសេរ​ឲ្យ​ដឹង​ថា រយៈពេល ៥ឆ្នាំ​ចុង​ក្រោយ​នេះ អ្នក​ការពារ​សិទ្ធិ​មនុស្ស ដីធ្លី ធនធាន​ធម្មជាតិ និង​លំ​នៅឋាន​ជា​ច្រើន ​បាន​ទទួល​នូវ​ការ​គំរាម​កំហែង​ពី​ប្រព័ន្ធ​តុលាការ​តាមរយៈ​ការ​ចាប់​ខ្លួន ការ​ចោទ​ប្រកាន់​ដោយ​បំភ្លៃ​រឿង​ក្តី​ទៅ​ជា​បទ​ល្មើស​ផ្សេងៗ ដូច​ជា ​បទល្មើស​ព្រហ្មទណ្ឌ​ញុះញង់ ឆបោក និង​ការ​រំលោភ​កម្មសិទ្ធិ​ឯកជន ជា​ដើម។

ពួក​គេ​យល់​ថា ការ​ចោទ​ប្រកាន់​ទាំង​នេះ ខុស​ពី​ការ​ពិត ហើយ​លើស​ពី​នេះ​ទៀត សកម្មជន​ការ​ពារ​ធនធាន​ធម្មជាតិ និង​សិទ្ធិមនុស្ស​មួយ​ចំនួន​ត្រូវ​បាន​គេ​ធ្វើ​ឃាដ ដោយ​មិន​បាន​ធ្វើ​ការ​ដោះស្រាយ​រក​យុត្តិធម៌​ជូន​ពួកគេ​ឡើយ។

ការ​ចាប់​ខ្លួន ចោទ​ប្រកាន់​ទៅ​លើ​អ្នក​ការពារ​សិទ្ធិមនុស្ស ដីធ្លី ធនធាន​ធម្មជាតិ និង​ការពារ​លំនៅដ្ឋាន នៅ​តែ​កើត​មាន​ជា​បន្តបន្ទាប់​រហូត​មក​ដល់​ពេល​នេះ មាន​ចំនួន​ជាង ៤០០​នាក់។ នេះ​បើ​តាម​ការ​បញ្ជាក់​នៅ​ក្នុង​សេចក្តី​ថ្លែងការណ៍​​របស់​ប្រជាសហគមន៍​ទាំង​២៤​ខេត្ត-ក្រុង។

ទោះ​យ៉ាង​ណា ក្រុម​ប្រជាសហគមន៍​ទាំងអស់​នោះ បាន​បន្តដំណើរ ដាក់​សេចក្តីថ្លែងការណ៍ របស់​ខ្លួន​នៅ​រដ្ឋសភា​ជាតិ និង​ឧត្តម​ក្រុមប្រឹក្សា​នៃ​អង្គចៅក្រម ក្នុង​គោលបំណង​ដដែល គឺស្នើសុំ​ឲ្យ​ដោះលែង និង​បញ្ឈប់​ការ​ចោទប្រកាន់​មក​លើ​អ្នក​ការពារ​សិទ្ធិ​ដី​ធ្លី។

ដោយ​ការ​ដង្ហែរ​ក្បួន​នាំ​ញ្ញតិ​របស់​ពួក​គេ​ទៅ​កាន់​គោលដៅ​នីមួយៗ​នោះ ស្ថិត​ក្រោម​ការ​តាម​ឃ្លាំ​មើល​ពី​ក្រុម​សមត្ថកិច្ច​នគរបាល​ចម្រុះ នៅ​តាម​ដង​ផ្លូវ​សំខាន់ៗ ប៉ុន្តែ​មិន​មាន​ការ​រំខាន​ណា​មួយ​នោះ​ទេ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI