កម្ពុជា

គ.ជ.ប. ស្នើ​ប្រព័ន្ធ​ផ្សព្វផ្សាយ​ក្នុង​ស្រុក លក់​ម៉ោង​ដល់​គណបក្ស​ទាំងអស់​ឱ្យ​ស្នើ​ភាព​គ្នា

ទូរទស្សន៍​បារាំង​កំណត់​ម៉ោង​ស្មើ​គ្នា​ឱ្យ​បេក្ខជន​ប្រធានាធិបតី​​ធ្វើ​ការ​តស៊ូ​មតិ
ទូរទស្សន៍​បារាំង​កំណត់​ម៉ោង​ស្មើ​គ្នា​ឱ្យ​បេក្ខជន​ប្រធានាធិបតី​​ធ្វើ​ការ​តស៊ូ​មតិ REUTERS/Franck Fife/Pool

ខណៈដែល​ការឃោសនា​បោះឆ្នោត​អាណត្តិ​ទី​៥ នៅ​សល់​តែ​ជាង​មួយ​សប្តាហ៍​ទៀត​តែ​ប៉ុណ្ណោះ គណៈកម្មាធិការ​ជាតិ​រៀបចំ​ការបោះឆ្នោត​(គ.ជ.ប) នៅព្រឹក​ថ្ងៃ​សុក្រ​ទី​១៤ មិថុនា បាន​អំពាវនាវ​ឱ្យ​ស្ថានីយ៍​វិទ្យុ​ទូរទស្សន៍​ទូទាំង​ប្រទេស ធ្វើការ​លក់​ម៉ោង​ដល់​គ្រប់​គណបក្ស​នយោបាយ​ទាំងអស់​ឱ្យ​បាន​ស្មើ​ភាព​គ្នា និង​មិន​រើសអើង​ចំពោះ​គណបក្ស​ណា​មួយ​ឡើយ។

ផ្សាយពាណិជ្ជកម្ម

អគ្គលេខា គ.ជ.ប. លោក ទេព នីថា បាន​ឱ្យ​ដឹង​ថា គណបក្ស​នយោបាយ​ទាំងអស់​ដែល​ គ.ជ.ប. បាន​ទទួល​ស្គាល់ មាន​សិទ្ធិ​ជួល​ម៉ោង​ផ្សព្វផ្សាយ​ពី​គោល​នយោបាយ​របស់​ខ្លួន នៅ​លើ​ប្រព័ន្ធ​ផ្សព្វផ្សាយ​ក្នុង​ស្រុក​ស្មើៗ​គ្នា។ ស្មើៗ​គ្នា​គឺ ស្ថានីយ៍​ប្រព័ន្ធ​ផ្សព្វផ្សាយ​ណា​មួយ​ទាំង​វិទ្យុ​ ទូរទស្សន៍ ជាដើម មិន​អាច​ជួល​ផ្តាច់​មុខ​ឱ្យ​តែ​គណបក្ស​នយោបាយ​ណា​មួយ​ឡើយ។

 
ការជួល​ម៉ោង​ផ្សាយ​របស់​គណបក្ស​នយោបាយ​ទាំងអស់ គឺ​មាន​តំលៃ​ស្មើ​គ្នា​ដោយ​មិន​រើសអើង​ចំពោះ​បក្សប្រឆាំង ឬ​បក្ស​កាន់​អំណាច​នោះ​ទេ។

គួររំលឹកថា សង្គមស៊ីវិល តែងតែ​រិះគន់​ថា ការឃោសនា​បោះឆ្នោត​នៅ​កម្ពុជា មាន​លក្ខណៈ​លម្អៀង​ទៅកាន់​គណបក្ស​កាន់​អំណាច ព្រោះ​គណបក្ស​កាន់​អំណាច មាន​ប្រព័ន្ធ​ផ្សព្វផ្សាយ​ដូចជា ទូរទស្សន៍ និងវិទ្យុ ក្នុង​ដៃ​ជាច្រើន​ដែល​ជួយ​បម្រើ​​ការឃោសនា​របស់​ខ្លួន។

ទាក់ទិន​នឹង​ការអំពាវនាវ​របស់​គជប ដែល​ឱ្យ​ប្រព័ន្ធ​ផ្សព្វផ្សាយ​ទាំងអស់ លក់​ម៉ោង​ផ្សាយ​ដល់​គ្រប់​បក្ស​នយោបាយ​ស្មើៗ​គ្នា​នោះ លោក យឹម សុវណ្ណ អ្នក​នាំ​ពាក្យ​គណបក្ស​សង្គ្រោះជាតិ បាន​ឱ្យ​ដឹង លោក​មិន​រំពឹង​ថា ប្រព័ន្ធ​ផ្សព្វផ្សាយ​ទាំងអស់ ជាពិសេស ទូរទស្សន៍​ក្នុង​ស្រុក​នឹង​លក់​ម៉ោង​ដល់​គណបក្ស​សង្គ្រោះជាតិ​នោះ​ទេ។ ព្រោះ​ការបោះឆ្នោត​អាណត្តិ​ទី​៤ កន្លង​ទៅ គ្មាន​ស្ថានីយ៍​ទូរទស្សន៍​ណា​មួយ ផ្តល់​ម៉ោង​ឱ្យ​គណបក្ស​លោក​ទេ បើ​ផ្តល់​ឱ្យ​ ក៏​មាន​តម្លៃ​ថ្លៃ​ហួស​ការកំណត់​ដែរ។

អ្នកនាំពាក្យរូបនេះ បញ្ជាក់ថា សម្រាប់​ការឃោសនា​ នៅ​អាណត្តិ​ទី​៥​នេះ គណបក្ស​សង្គ្រោះ​ជាតិ នឹង​ទិញ​ម៉ោង​ផ្សាយ​ក្នុង​ស្ថានីយ៍​ទូរទស្សន៍​ធំៗ សម្រាប់​ការផ្សាយ​គោល​នយោបាយ​របស់​ខ្លួន​ផង​ដែរ។

តែទោះបី​ជា​មាន​ការអំពាវនាវ​របស់ គ.ជ.ប. ឱ្យ​ប្រព័ន្ធ​ផ្សព្វផ្សាយ ក្នុង​ស្រុក​ទាំងអស់ លក់​ម៉ោង​ផ្សាយ​ដល់​គ្រប់​គណបក្ស ក្នុង​រយៈកាល​នៃ​ការឃោសនា​បោះឆ្នោត ដែល​ចាប់​ពី​ថ្ងៃ​២៧ មិថុនា​ខាង​មុខ​នេះ ក៏​ដោយ ក៏​លោក យឹម សុវណ្ណ បាន​អះអាង​ថា លោក​គ្មាន​សង្ឃឹម​ថា​ប្រព័ន្ធ​ផ្សព្វផ្សាយ​ដែល​ជាស្និទ្ធ​នឹង​បក្ស​កាន់​អំណាច​នោះ នឹង​ផ្តល់​ម៉ោង​ផ្សាយ​ដល់​បក្ស​លោក​ឡើយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI