កម្ពុជា

លោក សម រង្ស៊ី ប្រកាស​ចូលរួម​ការ​បោះឆ្នោត តែ​នឹង​មិន​ទទួល​ស្គាល់​លទ្ធផល​ទេ

​លោក​ សម រង្ស៊ី ប្រធាន​គណបក្ស​​សង្រ្គោះជាតិ​ ​(រូបភាពឯកសារ)
​លោក​ សម រង្ស៊ី ប្រធាន​គណបក្ស​​សង្រ្គោះជាតិ​ ​(រូបភាពឯកសារ) RFI

គណបក្ស​សង្គ្រោះជាតិ បាន​ប្រកាស​ថា​នឹង​ចូលរួម​ការ​បោះឆ្នោត​ជាតិ នៅ​ខែ​កក្កដា ឆ្នាំ ២០១៣​នេះ ក៏ប៉ុន្តែ​មិន​ទទួល​ស្គាល់​លទ្ធផល​បោះឆ្នោត​នោះ​ទេ។ នៅ​ក្នុង​ជំនួប​តាម Video Conference​ជា​មួយ​សកម្មជន​នៅ​ឯ​ទីស្នាក់​ការ​ទីក្រុង​ភ្នំពេញ​កាល​ពី​ព្រឹក​ថ្ងៃ​អាទិត្យ​នេះ។

ផ្សាយពាណិជ្ជកម្ម

 

លោក សម រង្សី ប្រធាន គណបក្ស​សង្គ្រោះជាតិ​បាន​ថ្លែង​ជា​ផ្លូវ​ការ​ពី​ទីក្រុងបារីស ប្រទេស​បារាំង​ថា​នឹង​ចូល​រួមបោះឆ្នោត​ជា​ធម្មតា។ ការ​ប្រកាស​នេះ​បាន​ធ្វើ​ឡើង​បន្ទាប់​ពី​ប្រធាន និង​អនុប្រធាន​គណបក្ស​ប្រឆាំង​ពិចារណា​ថា នឹង​ចូលរួម​ក្នុង​ការ​បោះឆ្នោត ឬ​ក៏​អត់។ បន្ទាប់​ពី​ថ្នាក់​ដឹកនាំ​គណបក្ស​សង្គ្រោះជាតិ បាន​ពិភាក្សា​ឡើង​វិញ​ពី​លទ្ធភាព​នៃ​ការ​ចូលរួម ការ​បោះឆ្នោត​អាណតិ្តទី៥នេះ។

នៅ​ថ្ងៃ​អាទិត្យ ទី១៦​នេះ តាម​រយៈ​វីដេអូ​Conference លោក សម រង្ស៊ី ដែល​កំពុង​និរទេស​ខ្លួន​នៅ​ក្រៅ​ប្រទេស​ បាន​ប្រកាស ទៅ​កាន់​អ្នក​ចូល​រួម​ប្រមាណ​ជិត ១ ០០០នាក់​ថា គណបក្ស​សង្គ្រោះជាតិ ត្រូវ​តែ​ចូលរួម​ការ​បោះឆ្នោត ប្រកួត​ប្រជែង ជា​មួយ​គណបក្ស​ប្រជាជន។

គួរ​រម្លឹក​ថា ការ​ប្រកាស​យ៉ាង​ដូច្នេះ ធ្វើ​ឡើង​បន្ទាប់​ពី​ប្រធាន​គណបក្ស​សង្គ្រោះជាតិ លោក សម រង្ស៊ី និង​លោក កឹម សុខា បាន​ជួប​ប្រជុំ​គ្នា​នៅ​ប្រទេស​ជប៉ុន​រួច​មក។ តែ​យ៉ាង​ណា​ក៏ដោយ លោក សម រង្ស៊ី ដែល​ត្រូវ​តុលាការ​កម្ពុជា កាត់ទោស​ឱ្យ​ជាប់គុក​ជាង ១០ឆ្នាំ នោះ បាន​បញ្ជាក់​ថា រួប​លោកផ្ទាល់ មិន​ទទួល​យក​លទ្ធផល​នៃ​ការ​បោះឆ្នោត នៅ​ថ្ងៃ​ទី២៨ កក្កដា ខាង​មុខ​នោះ​ទេ។ មិន​ទទួល​ស្គាល់​លទ្ធផល​នៃ​ការ​បោះឆ្នោត​ព្រោះ លោក អះអាង​ថា គណៈ​កម្មាធិការ​រៀបចំការ​​បោះឆ្នោត (គ.ជ.ប) លំអៀង​​ទៅ​​កាន់​គណបក្ស​ប្រជាជន​របស់ លោក​នាយក​រដ្ឋមន្ត្រី ហ៊ុន សែន។​ ហើយ​​ម្យ៉ាង​​ទៀត បញ្ជី​​ឈ្មោះ របស់ គ.ជ.ប គឺ​មិន​មាន​ភាព​ត្រឹមត្រូវ និង​មាន​ឈ្មោះ​ខ្មោច​ច្រើន។
 

ទោះ​បី​ជា លោក សម រង្ស៊ី​ដែល​មិនមាន​ឈ្មោះ​ក្នុង​បញ្ជី​បេក្ខភាព​តំណាង​រាស្ត្រ​គណបក្ស​សង្គ្រោះជាតិ ក៏​ដោយ ក៏​ប្រធាន​គណបក្ស​និរទេស​ខ្លួន​ម្នាក់ នេះ បាន​អំពាវនាវ​ទៅ​កាន់​អ្នក​គាំទ្រ​របស់​លោក​ឱ្យ-ចូលរួម​ការ​បោះឆ្នោត​ខាង​មុខ​នេះ​ដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI