កម្ពុជា

កូដកម្ម​បុគ្គលិក​សណ្ឋាគារ និង​កាស៊ីណូ​ណាហ្គាវើល​ត្រូវ​បាន​បង្ក្រាប

កូដករ​ប្រមូល​ផ្តុំ​គ្នា​នៅ​មុខ​សណ្ឋាគារនិងកាស៊ីណូណាហ្គាវើល ក្រុង​ភ្នំពេញ​មុន​ត្រូវ​ប៉ូលិស​បំបែក
កូដករ​ប្រមូល​ផ្តុំ​គ្នា​នៅ​មុខ​សណ្ឋាគារនិងកាស៊ីណូណាហ្គាវើល ក្រុង​ភ្នំពេញ​មុន​ត្រូវ​ប៉ូលិស​បំបែក ©rfi

បុគ្គលិកសណ្ឋាគារ និងកាស៊ីណូ​ណាហ្គាវើល​ដែល​មាន​ទីតាំង​នៅ​ខាង​កើត​វិមានឯករាជ្យ​​ក្រុងភ្នំពេញ​ ដែល​បាន​នាំគ្នា​ធ្វើ​កូដកម្ម​រយៈពេល​៦​ថ្ងៃ​មក​ហើយ​នោះ​ត្រូវបាន​សមត្ថកិច្ច​បង្ក្រាប ហើយ​នៅ​រសៀល​ថ្ងៃ​អង្គារ​នេះ។ តំណាង​កូដករ​ជាច្រើន​នាក់​ត្រូវបាន​ចាប់ខ្លួន។

ផ្សាយពាណិជ្ជកម្ម

បុគ្គលិក​​បម្រើ​ការងារ​ជា​ច្រើន​ផ្នែកនៅ​សណ្ឋាគារ​និង​កាស៊ីណូ​ណាហ្គាវើល ​ដែលបាន​នាំគ្នា​បោះជំរុំធ្វើ​កូដកម្ម​ចាប់តាំងពី​ថ្ងៃ​ទី​១៣ ខែ​មិថុនា​មក​នោះ ត្រូវបាន​បំបែក​ហើយ​នៅ​រសៀល​ថ្ងៃអង្គារទី​១៨​មិថុនា។ ​ក្រុម​ប៉ូលិស​បង្ក្រាប​បាតុកម្ម​ប្រដាប់​ដោយ​ដំបង​និង​ខែល​បាន​ប្រើ​កម្លាំង​បង្ក្រាប​លើ​ក្រុម​កូដករ​ ដើម្បី​រុញ​ច្រាន​ពួក​គេ​ឲ្យ​ចេញ​ពី​ទី​បោះជំរំ។ តំណាង​​សហជីព និង​បុគ្គលិក​ជាច្រើន​នាក់​ត្រូវបាន​ចាប់ខ្លួន។​ នេះ​បើ​យោង​តាម​ប្រភព​ពីសហជីព។


គួររម្លឹកថា ក្រុមបុគ្គលិក​ទាំងនោះ​បាន​ជួបជុំ​គ្នា​នៅ​លើ​សួន​ច្បារ​ពី​មុខ​កន្លែង​ធ្វើការ​របស់​ខ្លួន​កាលពី​ថ្ងៃ​ទី​១៣​មិថុនា​មក ​ដើម្បី​ទាមទារ​ឲ្យ​ក្រុមហ៊ុន​គោរព​សេចក្តី​បង្គាប់​របស់​ក្រុមប្រឹក្សា​អាជ្ញាកណ្តាល​ដោយ​ភ្ជាប់​នូវ​លក្ខខណ្ឌ​ការងារ​មួយ​ចំនួន។​ ក្រុម​កូដករ​បាន​នាំគ្នា​បោះតង់​ធំៗ​និងឈរ​ស្រែក​មេក្រូ​ទោះបីជាមាន​ភ្លៀង​ធ្លាក់​​ក៏ដោយ។

លោក សុខ ណារិទ្ធ​ ប្រធាន​សម្ព័ន្ធ​សហជីព​កម្មករ​ និយោជិត ​វិស័យ​ទេសចរណ៍​សេវាកម្ម​កម្ពុជា ​ដែល​ត្រូវ​បាន​សមត្ថកិច្ច​ចាប់​ខ្លួន​ដែរ​នោះ ធ្លាប់​បាន​ប្រាប់​វិទ្យុ​បារាំង​អន្តរជាតិ​ថា​ក្រុម​បុគ្គលិក​ទាំងនោះ​បាន​ទាមទារ​​៣​ចំណុច​ទាក់ទង​ទៅ​នឹង​សិទ្ធិ​ក្នុង​ការ​បំពេញ​ការងារ​ និង​ការទទួល​បាន​អត្ថប្រយោជន៍​ ដែល​ក្រុម​ប្រឹក្សា​អាជ្ញា​កណ្តាល​បាន​បង្គាប់​កាលពី​ខែ​កុម្ភៈ​កន្លង​ទៅ​នេះ។

ភ្ជាប់​ជាមួយ​នឹង​ការ​ទាមទារ​ឲ្យ​មាន​ការ​ស្តាប់​ការ​បង្គាប់​សេចក្តី​សម្រេច​របស់​អាជ្ញា​កណ្តាល​នេះ ក្រុម​បុគ្គលិក​ក៏​បាន​ស្នើ​ផង​ដែរ​ ដល់​ក្រុមហ៊ុនឲ្យ​តម្លើង​ប្រាក់​ឈ្នួល​ដល់​ពួក​គេ​ឲ្យ​ដល់​ ១៥០​ ដុល្លារ​ចំពោះ​បុគ្គលិក​ណា​ដែល​មាន​ប្រាក់​ឈ្នួល​តិច​ជាង​នេះ។ ដោយ​ឡែក​ចំពោះ​បុគ្គលិក​ដែល​មាន​ប្រាក់​ឈ្នួល​ចាប់​ពី ​១៥០​ដុល្លារ​អាមេរិក​ឡើង​ទៅ​ក្រុមហ៊ុន​ត្រូវ​តម្លើង​ឲ្យ ២០% បន្ថែមទៀត។

ប៉ុន្តែ ​ការ​តវ៉ា​នេះ​គ្មាន​ដំណោះស្រាយ​ទេ ​រហូត​ដល់​សមត្ថកិច្ច​ប្រើ​កម្លាំង​បង្ក្រាប​តែ​ម្តង។ ​មុន​ពេល​បង្ក្រាប​នេះ ក្រុមហ៊ុន​ណាហ្គាវើល​បាន​សុំ​ឲ្យ​តុលាការ​ចេញ​ដីកា​រក្សា​ការពារ​មួយ​ដោយ​ហៅ​កូដកម្ម​របស់​បុគ្គលិក​ថា ​ជា​ទង្វើ​ខុស​ច្បាប់​ និង​បាន​អំពាវ​នាវ​ឲ្យ​បុគ្គលិក​ចូល​ធ្វើ​ការ​វិញ​ក្នុង​រយៈពេល​៤៨​ម៉ោង។

ប៉ុន្តែ ​ក្រុម​អ្នកតវ៉ា​បាន​បដិសេធ​ថា​ដីកា​របស់​ក្រុមហ៊ុន​មិន​ត្រូវ​តាម​ស្ថានភាព​ជាក់​ស្តែង​ទេ ពីព្រោះ​ថា​ការ​ទាមទារ​នេះ​ទាក់ទង​ទៅនឹង​វិវាទ​ការងារ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI