ទស្សនៈព្រឹត្តិការណ៍ខ្មែរ

សង្គម​ខ្មែរ​កំពុង​ចាកចេញ​ពី​ភាព​ស្ងៀមស្ងាត់​ជាបណ្តើរៗ!

សំឡេង ០៥:០៧
វេទិកា​តុមូល​មួយ​​ដើម្បីបញ្ចេញ​​មតិ​យោបល់​នៅកម្ពុជា (រូបភាពឯកសារ)
វេទិកា​តុមូល​មួយ​​ដើម្បីបញ្ចេញ​​មតិ​យោបល់​នៅកម្ពុជា (រូបភាពឯកសារ)

រយៈពេល​ចុងក្រោយ​នេះ វប្បធម៌​ជជែក​ពិភាក្សា និង​ចូលរួម​មតិ ហាក់​បានកើត​ឡើងកាន់​តែ​ផុលផុស​នៅក្នុង​ចំណោម​ប្រជាពលរដ្ឋ​ខ្មែរ។ ការ​ទូរ​សព្ទ័​ទៅកាន់​ប៉ុស្តិ៍​វិទ្យុ ការ​ចូលរួម​សម្តែង​មតិ​ក្នុង​វេទិកាសាធារណៈ​នានា និង​ការរួម​គ្នា​តស៊ូ​មតិ​ដើម្បី​ការពារ​ផលប្រយោជន៍​របស់ខ្លួន​ប្រឆាំងនឹង​ការ​រំលោភបំពាន​នានា សុទ្ធតែជា​សកម្មភាព​ដែល​បង្ហាញ​ឲ្យ​ឃើញ​ថា ពលរដ្ឋ​ខ្មែរ​សម័យ​បច្ចុប្បន្ន​មាន​ភាពក្លាហាន​ជាង​មុន​ក្នុងការ​ចូលរួម​សម្តែង​មតិ​ជា​សាធារណៈ។ នេះ​គឺជា​សញ្ញា​បញ្ជាក់ថា សង្គម​ខ្មែរ​កំពុងតែ​ចាក​ចេញពី​ភាព​ស្ងៀមស្ងាត់​ជាបណ្តើរៗហើយ។

ផ្សាយពាណិជ្ជកម្ម

ប្រទេស​កម្ពុជា​ដែល​បាន​ហែល​ឆ្លងកាត់​ភ្លើង​សង្គ្រាម​ជា​ច្រើន​ទសវត្សរ៍ និង​ជា​ពិសេស​របប​ខ្មែរ​ក្រហម​ដ៏​ឃោឃៅ កំពុង​ចាកចេញ​បន្តិចម្តងៗ​ពី​ស្រមោល​អតីតកាល​ដ៏​ជូរចត់​នេះ។ បើ​ទោះ​បី​ជា​ប្រជាធិបតេយ្យ​ដំណើរការ​ដោយ​លំបាក ប៉ុន្តែ ពលរដ្ឋ​ខ្មែរ​បាន​ទទួល​ផ្លែផ្កា​ជា​ណ្តើរៗ​ពី​ការអនុវត្ត​ប្រជាធិបតេយ្យ​ក្នុង​រយៈពេល​២ទសវត្សរ៍​ចុង​ក្រោយ​នេះ។

 
ផ្លែផ្កា​ដែល​គេ​អាច​មើល​ឃើញ​មុន​គេ​នោះគឺ ការ​ប្រើប្រាស់​សេរីភាព​របស់​បុគ្គល​ម្នាក់ៗ។​ជាក់​ស្តែង ប្រសិន​បើ​គេ​បើក​ប៉ុស្តិ៍​វិទ្យុ​ដែល​ជាប់​គ្នា​រដឹក​ស្ទើរ​រក​ចន្លោះ​គ្មាន​នោះ ប៉ុស្តិ៍​ណា​ក៏​មាន​អ្នក​ទូរ​ស័ព្ទ​ចូលទៅ​ជជែក​ពិភាក្សា​ក្នុង​កម្មវិធី​នានា​មិន​ដាច់ដែរ ជា​ពិសេស ភាគច្រើន​នៃ​អ្នក​ទូរ​ស័ព្ទ​ចូល​ទាំងនោះ​គឺជា​យុវវ័យ។ ងាក​ទៅ​មើល​វេទិកា​សាធារណៈ​នានា​ដែល​រៀបចំឡើង​ដោយ​អង្គការ​ក្រៅរដ្ឋា​ភិបាល ឬ​បក្ស​នយោបាយ​វិញ ក៏មាន​ការចូលរួម​សម្តែង​មតិ​យ៉ាង​ផុលផុស​ណាស់ដែរ។ លើស​ពីនេះ នៅពេល​មាន​បញ្ហាដីធ្លី ឬ​ការ​មិន​សប្បាយ​ចិត្ត​នឹង​បញ្ហា​អ្វីមួយ កសិករ​ឬ​កម្មករ តែងតែ​នាំគ្នា​ចេញមុខ​តវ៉ា​តាមរយៈ​ការប្រមូល​ផ្តុំគ្នា​ធ្វើ​បាតុកម្ម​ដើម្បី​ទាមទារ​ឱ្យ​រដ្ឋាភិបាល​ឬថៅ​កែ​​ដោះស្រាយ​បញ្ហា​ឲ្យ​ពួកគេ។ នេះ​មិន​ទាន់​និយាយ​ដល់​បណ្តាញ​សង្គម​ហ្វេសប៊ុក​ដែល​ជា​វេទិកា​បញ្ចេញ​មតិ​ដ៏​ពេញ​និយម​របស់​យុវវ័យ​នោះ​ផង​ទេ។

ជា​ការ​ពិត​ណាស់ ពលរដ្ឋ​ខ្មែរ​ត្រូវបាន​គេ​ចាត់ទុកថា ជា​អ្នក​ដែល​ចូលចិត្ត​ភាព​ស្ងៀមស្ងាត់​មិនសូវ​ហ៊ាន​ចេញមុខ​ជជែក ពិភាក្សា​ជា​ចំហ​នៅក្នុង​ជំនុំ​ចំណោម​នោះឡើយ ជាពិសេសគឺស្ត្រី និង​យុវជនតែម្តង។ មាន​ហេតុផល​ច្រើន យ៉ាង​ដែល​អាច​ពន្យល់​បញ្ហា​នេះ​បាន ក្នុងនោះ​មូលហេតុ​សំខាន់ពីរ​ដែល​គួរ​ឱ្យ​កត់សម្គាល់។

មូលហេតុ​ទី១៖ គឺ​ទំនៀមទម្លាប់​ប្រពៃណី ពោលគឺ​កើតមក​ក្នុង​ប្រទេសមួយ​ដែលមាន​ទំនៀមទម្លាប់​ប្រពៃណី​តឹងរ៉ឹង ឪពុក​ម្តាយ​ខ្មែរ​តែង​ប្រៀនប្រដៅ​កូនចៅ​កុំ​ឱ្យ​តមាត់​ជាមួយ​មនុស្ស​ចាស់​ឬ​រៀមច្បង ជាពិសេស​គឺ​កូនស្រី​តែម្តង​ដែល​ត្រូវ​ធ្វើ​ខ្លួន​ឱ្យ​ដូចជា​សំពត់​ក្នុង​ផ្នត់។ ផ្ទុយ​ពី​ប្រទេស​ជឿនលឿន​ដែល​គេ​បង្ហាត់​ក្មេង​តាំង​ពី​តូចៗ​ឱ្យ​ចេះ​ជជែក​ពិភាក្សា​រកហេតុ​ផល តែ​ក្នុងសង្គម​ខ្មែរ ក្មេង​ដែល​ចេះ​តមាត់​ជាមួយ​មនុស្ស​ចាស់ ឬ​រៀមច្បង​ត្រូវគេ​ចាត់ទុកថា​គឺជា​ក្មេង​មិនល្អ​ឡើយ។

មូលហេតុ​ទី២៖ ការដឹកនាំ​ប្រទេស​ច្រើនតែ​អនុវត្ត​នយោបាយ​បិទ​ខ្ទប់​ប្រជាពលរដ្ឋ​មិន​ឱ្យ​ចេះដឹង​រឿង​ប្រទេសជាតិ។ អ្នក​នយោបាយ​បាន​បង្រៀន​ពលរដ្ឋ​រប​ស់​ខ្លួន​ថា រឿង​ប្រទេសជាតិ​ទុក​ឱ្យ​អ្នក​នយោបាយ​ដោះស្រាយ។ ធ្ងន់ធ្ងរ​បំផុត នៅក្នុង​របប​ខ្មែរក្រហម ពួក​មេដឹកនាំ​អាវ​ខ្មៅ​ថែម​ទាំង​​បាន​បង្រៀន​ពលរដ្ឋ​ខ្មែរ​ឱ្យ«ដាំ​ដើម​គ»ទៀតផង ពោលគឺ​អ្នកណា​ហ៊ាន​តវ៉ា​នឹង​ត្រូវគេ​កម្ទេចចោល។ អំពើ​ដ៏​សាហាវព្រៃផ្សៃ​នេះ​បានធ្វើ​ឱ្យ​វប្បធម៌​ជជែក​ពិភាក្សា​ដែល​កំពុងតែ​ខ្សត់ខ្សោយ​ស្រាប់​ផង​នោះ​រឹងរឹត​តែ​កប់​បាត់​ថែម​ទៀត។ ពលរដ្ឋ​ខ្មែរ​រស់នៅក្នុង​សភាព​បាក់ស្បាត​ និង​បៀមទុក្ខ​យ៉ាង​គ្រាំគ្រា។

ប៉ុន្តែ ក្រោយ​ការ​ដួល​រំលំ​នៃ​របប​ខ្មែរក្រហម និង​ជាពិសេស​ពីរ​ទសវត្សរ៍​ក្រោយពី​ការអនុវត្ត​របប​ប្រជាធិបតេយ្យ​សេរី ពហុបក្ស វប្បធម៌​ជជែក​ពិភាក្សា​ជា​ចំហ​បាន​ផ្តើម​រីកដុះដាល​ឡើង​គួរ​ឱ្យ​កត់សម្គាល់។ យ៉ាងណាក៏ដោយ នៅមាន​ពលរដ្ឋ​ខ្មែរ​ជាច្រើន​ទៀត​នៅតែ​មិន​ទាន់​ហ៊ាន​ប្រើប្រាស់​សិទ្ធិ​ប្រជាធិបតេយ្យ​របស់​ខ្លួន​​នៅ​ឡើយដែរ។ រីឯ​អ្នក​ដែល​បាន​ទម្លាយ​របាំង​នៃ​ភាព​ស្ងៀមស្ងាត់មួយចំនួន​ក៏​នៅ​មិនទាន់បាន​ប្រើប្រាស់​វប្បធម៌​ប្រជាធិបតេយ្យ​ឱ្យ​ចំ​ទិសដៅ​នៅឡើយ​។

ជាក់ស្តែង អ្នក​ដែល​ចូលចិត្ត​ទូរ​ស័ព្ទ​ចូល​ប៉ុ​ស​វិទ្យុ ដែល​ភាគច្រើន​ជា​យុវវ័យ​សម័យ​ក្រោយ​សង្គ្រាម ច្រើនតែ​និយម​ចូលចិត្ត​ការជជែក​កម្សាន្ត ឬ​សំណូមពរ​បទ​ចម្រៀង​តែប៉ុណ្ណោះ រីឯ​អ្នក​ទូរ​ស័ព្ទ​ទៅ​ជជែក​អំពី​បញ្ហា​សង្គម​វិញ​មាន​តិចតួច​នៅឡើយ។ ពលរដ្ឋ​ជា​ច្រើន​ទៀត​ក៏​នៅ​មិន​ទាន់​​ចេះ​ប្រើប្រាស់​សេរីភាព​ឱ្យ​បាន​ត្រឹមត្រូវ​នៅឡើយ​ដែរ​។ ចំណែក​អ្នក​នយោបាយ​វិញ ក៏​ហាក់​នៅ​តែ​ចិញ្ចឹម​ចិត្ត​ធ្វើ​ជា​ម្ចាស់​ពលរដ្ឋ​ដដែល។ ក៏​មាន​ដែរ អ្នក​ដែល​ប្រើប្រាស់​សេរីភាព​ហួសហេតុ​រហូត​ដល់​ការ​ជេរប្រមាថ​មាក់ងាយ​គ្នា​ដោយ​ខ្វះសីលធម៌ និង​ការ​ទទួល​ខុសត្រូវ។
 

ដូច្នេះ នៅ​មាន​កិច្ចការ​ច្រើន​យ៉ាង​ណាស់​ដែល​រដ្ឋាភិបាល អ្នក​នយោបាយ និង​សង្គម​ស៊ីវិល​ត្រូវ​រួមគ្នា​ធ្វើ​ដើម្បី​ពង្រឹង​វប្បធម៌​ប្រជាធិបតេយ្យ​ក្នុង​សង្គម​កម្ពុជា។ ការណ៍​ដែល​ពលរដ្ឋ​ខ្មែរ​កាន់​តែ​ច្រើន​ឡើង​ហ៊ាន​ចេញ​មុខ​ជជែក​ពិភាក្សាគ្នា​ជា​ចំហ ជា​ចំណុច​វិជ្ជមាន​មួយ​ហើយ ប៉ុន្តែ ការធ្វើ​យ៉ាងណា​ឱ្យ​វប្បធម៌​ជជែក​ពិភាក្សា​នេះ​មាន​ប្រយោជន៍​ពិតប្រាកដ​ដល់​សង្គម នោះ​ទើប​ជា​គោលដៅ​ចុងក្រោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI