កម្ពុជា

គណបក្ស​តូចៗ​ចេញ​ឃោសនា​មួយចំនួន និង​មួយចំនួន​ទៀត​នៅ​ស្ងាត់ស្ងៀម

ក្បួន​ហែ​គណបក្ស​សម្ព័ន្ធ​ដើម្បី​ប្រជាធិបតេយ្យ
ក្បួន​ហែ​គណបក្ស​សម្ព័ន្ធ​ដើម្បី​ប្រជាធិបតេយ្យ ©

នៅថ្ងៃ​ផ្តើម​យុទ្ធនាការ​ឃោសនា​បោះឆ្នោត នៅថ្ងៃ​ព្រហស្បតិ៍​ទី ២៧​មិថុនា ក្រៅពីគណបក្ស​ប្រជាជន​កម្ពុជា និង​គណបក្ស​សង្គ្រោះជាតិ គឺ​គណបក្ស​ផ្សេងទៀត ដូចជា គណបក្ស​ហ៊្វុនស៊ិនប៉ិច និង​គណបក្សសម្ព័ន្ធ​ដើម្បី​ប្រជាធិបតេយ្យ ជាដើម ក៏​បាន​ផ្តើម​យុទ្ធនាការ​ឃោសនា​របស់ខ្លួន​ផងដែរ ទៅតាម​លទ្ធភាពរៀងៗខ្លួន។  

ផ្សាយពាណិជ្ជកម្ម

 

ភ្នំពេញ​ដែល​ជា​ទីប្រជុំជន​ដ៏​សំខាន់​របស់​ប្រទេស​នោះ ត្រូវ​រញ្ជួយ​ទៅ​ដោយ សំឡេង​ធុងបាស សម្លេង​ឧឃោសនស័ព្ទ និង​ការហ៊ោ​កញ្ជ្រៀវ ដោយ​សមាជិក​គណបក្ស​ធំៗ ចំនួន ២ គឺ​គណបក្ស​ប្រជាជន​កម្ពុជា និង​គណបក្ស​សង្រ្គោះជាតិ។ ក្រៅពីនោះ គណបក្ស តូចៗ ៦ទៀត
មួយ​ចំនួន នៅ​សំងំ​ស្ងៀម និង មួយចំនួន​ចេញ​ឃោសនា ក្នុង​រូបភាព​តូច ទៅតាម​លទ្ធភាព​របស់ខ្លួន។

គណបក្ស​សម្ព័ន្ធ​ដើម្បី​ប្រជាធិបតេយ្យ​របស់​លោក ខឹម វាសនា ត្រូវ​គេ​មើលឃើញ​ថា ជា​គណបក្ស​តូច​តែ​ហែធំ​គួសម នៅថ្ងៃ​បើក​យុទ្ធនាការ​ឃោសនា​រក​សម្លេងឆ្នោត នៅថ្ងៃ​ដំបូង ដោយហេតុ​ថា គណបក្ស​នេះ​បាន​ហែ​កាត់​ទីក្រុង​ភ្នំពេញ ធ្វើ​ឲ្យ​មាន​ការចាប់​អារម្មណ៍ពី​ប្រជាពលរដ្ឋ។

គណបក្ស​សម្ព័ន្ធ​ដើម្បី​ប្រជាធិបតេយ្យ មាន​អ្នកហែ​ក្បួន​ជាង ១ពាន់នាក់ ជាមួយនឹង រថយន្ត​ប្រមាណ​ជា ៣០គ្រឿង រួម​ជាមួយ​ម៉ូតូ និង​ម៉ូតូ​កង់បី រាប់រយ​គ្រឿង។ ប្រធាន​គណបក្ស លោក​ខឹម វាសនា បានប្រាប់​ថា គឺ​គ្រាន់តែ​ចង់​បង្ហាញ​ឲ្យ​គេ​ឃើញ​ឈ្មោះ​ប៉ុណ្ណោះ បើចង់​ឲ្យ​គេ​យល់ ទាល់​តែ​ត្រូវការ​ពេល ៥ឆ្នាំ​ឯណោះ។

ជាមួយគ្នានេះ គណបក្ស​សញ្ជាតិ​កម្ពុជា ក៏បាន​ហែ​ក្បួនផង​ដែរ តែ​ធ្វើ​ចាប់​ពី ខេត្តកណ្តាល កាត់​តាមព្រៃវែង និង​ស្វាយរៀង ដោយ​មាន​ការចូលរួម​ពី​មនុស្ស​ប្រមាណជា ១ពាន់នាក់។ ប្រធាន​បក្ស​សញ្ជាតិកម្ពុជា លោក សេង សុខខេង ឲ្យ​ដឹង​ថា អ្វីដែលគណបក្ស​ផ្សព្វផ្សាយ​នោះ គឺ​ការលុបចោល​ទំព័រ​ប្រវត្តិសាស្ត្រ​ពី អតីតកាល ដែល​ជូរចត់ រឿងព្រុំដែន ជាមួយ​ប្រទេស​ជិតខាង និង​ការមិន​ប្រកាន់​ពូជសាសន៍។

នៅឯ ខេត្តកំពង់ចាម​ឯណោះវិញ គណបក្ស​ហ្វុនស៊ីនប៉ិច ដែលជា​គណបក្ស​រាជានិយមនោះ​បាន​យក​ខេត្ត ដែលមាន​កៅអី​ច្រើន​នេះ ធ្វើការ​ឃោសនា​ទ្រង់ទ្រាយធំ ដែល​ដឹកនាំ​ដោយ ព្រះអង្គ​ម្ចាស់ក្សត្រី ព្រះអនុជ អរុណរស្មី ប្រធាន​គណបក្ស​ហ្វុនស៊ីនប៉ិច។ មាន​អ្នកគាំទ្រ​ចំនួន ៥ពាន់​នាក់ រថយន្តជាង ១០០គ្រឿង និង​មាន​ការចែកខិត​ប័ណ្ណ​គោល​នយោបាយ គណបក្ស​នៅតាម​ទីផ្សារធំៗ ក្នុង​ទីរួមខេត្ត និង​ស្រុក ក្រុង មួយចំនួន។

ដោយឡែក គណបក្សខ្មែរ ឈប់ក្រ និង​គណបក្ស សាធារណរដ្ឋ​ប្រជាធិបតេយ្យ ដែល​មេបក្ស​ទាំងពីរ សុទ្ធតែ​មក​ពី​ប្រទេសអាមេរិក មិនបាន​ហែ​ក្បួនទេ នៅថ្ងៃ​បើក​យុទ្ធនាការ​ដំបូង។ អគ្គលេខាធិការ​គណបក្ស​ខ្មែរ​ឈប់ក្រ លោក ស៊ិន វណ្ណារិទ្ធ បញ្ជាក់​ថា គណបក្ស​របស់​លោក នៅមាន​ពេលវេលា ៣០ថ្ងៃ មិនខ្វះទេ ថ្ងៃហែក្បួន ចៀសវាង ហែ​នៅថ្ងៃ​បើកឆាក ដែលអាច​រំខាន​ដល់​ចរាចរណ៍​តាមដងផ្លូវ។

សូមបញ្ជាក់ថា ប្រទេសកម្ពុជា​នឹង​ធ្វើការ​បោះឆ្នោត​ជាតិ នៅថ្ងៃទី ២៨ ខែកក្កដា ខាងមុខ ហើយ​យុទ្ធនាការ​នៃ​ការឃោសនា​រក​សម្លេងឆ្នោត គឺ​មាន​រយៈពេល​មួយខែ ដោយ​ចាប់ផ្តើម​ពីថ្ងៃទី ២៧ ខែមិថុនា​នេះ ទៅ។

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI