បោះឆ្នោត

គ្មានបញ្ហា​ចរាចរណ៍​​នៅថ្ងៃ​ហែក្បួន​ឃោសនា​ដំបូង

សកម្មជនគណបក្សនយោបាយជិះរថយន្តនិងម៉ូតូឃោសនាបោះឆ្នោត។
សកម្មជនគណបក្សនយោបាយជិះរថយន្តនិងម៉ូតូឃោសនាបោះឆ្នោត។ ស៊ីវ ចាន់ណា

ចរាចរណ៍​នៅក្នុង​ថ្ងៃ​ឃោសនា​បោះឆ្នោត​ដែលមាន​ការដង្ហែរ​ថយន្ត​និង​ម៉ូតូ​ដ៏ច្រើន​បំផុតនោះ ​មានភាព​ប្រសើរ​ជាង​ថ្ងៃ​ធម្មតា។មន្ត្រី​នគរបាលជាតិ​បានអះអាងថា​ ការដង្ហែរក្បួន​ឃោសនា​របស់​គណបក្ស​នីមួយ​ៗ​ ​គោរព​ច្បាប់​ចរាចរណ៍​បានល្អ។

ផ្សាយពាណិជ្ជកម្ម

ស្ថានភាព​ចរាចរណ៍​នៅថ្ងៃ​បើកឆាក​យុទ្ធនាការ​ឃោសនា​បោះឆ្នោត​ដែលបាន​ចាប់ផ្តើម​កាល
ពី​ថ្ងៃទី​២៧​ខែ​មិថុនា​ឆ្នាំ​២០១៣​មានភាព​ល្អប្រសើរ​ជាងពេលវេលា​ធម្មតា​បើទោះណាជា
​រថយន្ត​និង​ទោចក្រយានយន្ត​ជាច្រើនគ្រឿង​ត្រូវគេបញ្ចេញ​សម្រាប់​បំរើដល់​ការហែក្បួន​នៅតាម​ដងផ្លូវ​។

ប្រធាន​នាយកដ្ឋាន​សណ្តាប់ធ្នាប់​នៃ​អគ្គស្នងការ​នគរបាលជាតិ​ក្រសួង​មហាផ្ទៃ​លោក​ឧត្តមសេនីយ​ហ៊ឹម យ៉ាន​បានប្រាប់​វិទ្យុបារាំង​អន្តរជាតិ​ថា គ្មានរបាយការណ៍​ណាមួយ​ត្រូវបាន​គេរាយការណ៍​នៅទូទាំង​ប្រទេសថា​មានគ្រោះថ្នាក់​ចរាចរណ៍​ដែលបណ្តាលមកពី​ការប្រើប្រាស់​យានយន្ត​ក្នុងការឃោសនា​បោះឆ្នោត​នោះទេ​។​ផ្ទុយទៅវិញ​ស្ថានការណ៍​គ្រោះថ្នាក់​ចរាចរណ៍​នៅពេល​ការឃោសនា​បោះឆ្នោត​មកដល់​ហាក់ដូចជា​មានការកាត់បន្ថយច្រើន​បើប្រៀបធៀប​ទៅហ្នឹង​ថ្ងៃធម្មតា​ដោយមាន​មនុស្ស​៣​នាក់​របួសធ្ងន់​និង​៣​នាក់ទៀត​របួសស្រាល​ប៉ុណ្ណោះ​នៅទូទាំងប្រទេស​។

លោក​ហ៊ឹម យាន​បន្តថា​ការហែរក្បួន​របស់​គណបក្ស​នានា​រយៈពេល​២​ថ្ងៃ​មានការ​គោរពច្បាប់​និង​សណ្តាប់ធ្នាប់​ចារាចរណ៍​ល្អ​។​ការកកស្ទះ​ដោយសារ​ការហែរជួបគ្នា​រវាង​គណបក្ស​មួយចំនួន​ក៏មិនមាន​ដោយប៉ូលីស​ចរាចរណ៍​របស់លោក​ទាំងអស់​ចេញធ្វើការ​ជាពិសេស​គ្មានសល់ម្នាក់​។

ក្រសួង​មហាផ្ទៃ​កាលពីពេល​ថ្មី​ៗ​នេះ​បានចេញ​សេចក្តីអំពាវនាវ​មួយ​ដោយណែនាំ​ទៅដល់​
គណបក្ស​នយោបាយ​នីមួយ​ៗ​ឲ្យមាន​ការអប់រំ​ទៅលើ​អ្នកគាំទ្រ​របស់ខ្លួន​ជាពិសេស​អ្នកនៅក្នុងក្បួន​ឲ្យមាន​ការគោរព​ច្បាប់ចរាចរណ៍​។

ដោយឡែក​ចំពោះបញ្ហា​មួកសុវត្ថិភាព​នៅពេល​ហែរក្បួនវិញ​ក៏មិនមាន​ពាក់ដែរ​គឺ​អ្នកហែរក្បួន​តាមម៉ូតូ​ទាំងអស់​ពាក់មួក​កន្តឹប​បក្ស​របស់គេ​រៀង​ៗ​ខ្លួន​។ ការធ្វើបែបនេះ​ផ្ទុយនឹង​ច្បាប់ចរាចរណ៍​ផ្លូវគោក​កម្ពុជា​។

ក៏ប៉ុន្តែ​មន្ត្រី​នគរបាល​ក៏ដូចជា​អង្គការ​ជនពិការ​អន្តរជាតិ​បែលហ្សិក​បានអះអាងថា​នោះគឺជា​កាលៈទេសៈ​អនុគ្រោះ​ដោយសារតែ​ការដង្ហែរក្បួន​ឃោសនា​ប្រព្រឹត្តិទៅ​យឺត​ៗ​និង​មានមន្ត្រីបក្ស​និង​នគរបាល​ជួយសម្រួល​តាមផ្លូវ​ផងនោះ​មិនមានអ្វី​ដែលជាការ​ព្រួយបារម្ភ​ដល់​សុវត្ថិភាព​ចរាចរណ៍​នោះទេ​។

គួរកត់សម្គាល់ថា​ប្រទេស​កម្ពុជា​នៅតែ​ប្រឈមនឹង​បញ្ហា​ចរាចរណ៍​នៅឡើយ​ដោយសារតែ​ពលរដ្ឋ​មួយចំនួន​មិនគោរព​ច្បាប់​បើកបរ​ដោយប្រើល្បឿន​និង​បើកបរ​ក្រោមឥទ្ធិពល​ជាតិ​ស្រវឹង ជាហេតុ​ធ្វើឲ្យ​មានមនុស្ស​ស្លាប់​និង​របួស​នៅតាមដងផ្លូវ​មិនមានពេល​លោះថ្ងៃ​ឡើយ​។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI