កម្ពុជា

ប្រតិកម្ម​ជុំវិញ បម្រាម​របស់​ក្រសួង​ព័ត៌មាន​ក្នុង​ការផ្សាយ​បន្ត​របស់ វិទ្យុ FM ពី​វិទ្យុ​បរទេស​ជា​ខេមរភាសា

បន្ទប់ផ្សាយសំឡេងរបស់វិទ្យុ​បរទេសមួយ​
បន្ទប់ផ្សាយសំឡេងរបស់វិទ្យុ​បរទេសមួយ​ @ Chea Bunthoeun

ម្រាម​របស់​ក្រសួង​ព័ត៌​មាន​ដល់​គ្រប់​ស្ថានីយ​វិទ្យុ FM ទាំង​អស់ ក្នុង​ការ​បន្ត​ផ្សាយ​ពី​វិទ្យុ​បរទេស​ជា​ខេមរភាសា​ក្នុង​រយៈ​ពេល​បើក​យុទ្ធនាការ​ឃោសនា​បោះឆ្នោត​និង​ថ្ងៃ​បោះឆ្នោត រយៈពេល៣១​ថ្ងៃ បាន​ធ្វើ​ឱ្យ​ប្រតិកម្ម​ជា​ច្រើន​ជុំវិញ​រឿង​នេះ។ ប៉ុន្តែ គ្មាន​ការ​ពន្យល់​ណាមួយ​ពី​មន្ដ្រី​ក្រសួង​ព័ត៌មាន ឬ​មន្ត្រី​រដ្ឋាភិបាលឡើយ។

ផ្សាយពាណិជ្ជកម្ម

បន្ទាប់​ពី​បាន​ទទួល​សេចក្ដី​ណែនាំ​នេះ វិទ្យុក្នុងស្រុក ដូចជា វិទ្យុ​សំបុកឃ្មុំ FM 105 វិទ្យុសំឡេងស្ត្រីកម្ពុជា FM 102 និងវិទ្យុ FM 93.5 នៅភ្នំពេញ និងនៅ​តាម​បណ្តា​ខេត្ត​មួយ​ចំនួន ក៏​បាន​ផ្អាក​ការ​ផ្សាយកម្មវិធី​ព័ត៌មាន​របស់វិទ្យុអាស៊ីសេរី វិទ្យុវីអូអេ វិទ្យុបារាំងអន្តរជាតិ  RFI និងវិទ្យុ ABC របស់​អូស្ត្រាលី​ជាដើម។ ចាប់​ពី​យប់​មិញ យប់​ថ្ងៃទី២៨ មិថុនា ម៉ោង​ផ្សាយ​បន្ត​ពី​វិទ្យុបរទេស​ជា​ខេមរភាសា​ទាំង​នោះ​ត្រូវ​បាន​ជំនួស​ដោយ​បទ​ចម្រៀង​ទំនើប​ចម្រុះវិញ។

 
បញ្ហា​នេះ​បាន​ធ្វើ​ឱ្យ​អ្នក​ធ្លាប់​ស្តាប់​កម្មវិធីព័ត៌​មាន​វិទ្យុបរទេស​ជា​ខេមរភាសា​ទាំង​នោះ​មាន​ការ​ងឿងឆ្ងល់​ជា​ខ្លាំង។ បន្ទាប់​ពី​បាន​សាកសួរ ពួក​គេ​ក៏​បាន​ដឹង​ថា នេះ​ជា​បម្រាម​របស់​ក្រសួង​ព័ត៌​មាន។ អ្នក​ស្តាប់​មួយ​ចំនួន​បាន​សម្តែង​ការ​សោកស្តាយ​ចំពោះ​បម្រាម​នេះ​និង​ចង់​ឱ្យ​ក្រសួងព័ត៌មាន​អនុញ្ញាត​ឱ្យវិទ្យុ​ទាំងនោះ​ចាក់ផ្សាយ​ដូច​ធម្មតា​ឡើង​វិញ។

ចំណែក​អង្គការ​សង្គម​ស៊ីវិល ​អង្កេត​ការណ៍​បោះ​ឆ្នោត ក៏បាន​បញ្ចេញ​ប្រតិកម្មតប​នឹង​បម្រាម​នេះដែរ។ លោក គល់ បញ្ញា នាយក​ប្រតិបត្តិ​គណកម្មាធិការ​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌​នៅ​កម្ពុជា បាន​ប្រាប់​វិទ្យុ​បារាំង RFI តាម​ទូរស័ព្ទ​ថា បម្រាម​នេះ​ប៉ះពាល់​យ៉ាង​ខ្លាំង​ដល់​សិទ្ធិ​សេរី​ភាពនៃ​ការ​ទទួល​ព័ត៌មាន​របស់​ប្រជាពលរដ្ឋ។ លោក​បន្ត​ថា នៅ​ក្នុង​អំឡុង​ពេល​បោះ​ឆ្នោត គួរ​ណាស់​តែ​មាន​ការ​លើក​ទឹក​ចិត្ត​ឱ្យ​ប្រព័ន្ធ​ផ្សព្វផ្សាយ ប្រើ​មធ្យោបាយ​យ៉ាង​ណា​ផ្សាយ​ពី​រឿង​បោះ​ឆ្នោត​ឱ្យ បាន​ច្រើន ដើម្បី​ឱ្យ ​ប្រជាជន​យល់​ដឹង​ពី​ការ​បោះ​ឆ្នោត​ឱ្យ​បាន​ច្រើន។

លោក​គល់ បញ្ញា បន្ថែម​ថា តួនាទី​ក្រសួង​ព័ត៌មាន​គឺ ត្រួត​ពិនិត្យ​លើ​ការ​ផ្សាយ​របស់​ប្រព័ន្ធ​ផ្សព្វផ្សាយ​ទាំង​អស់ ធ្វើ​យ៉ាង​ណា​កុំ​ឱ្យ​លម្អៀង ហើយ​ប្រសិន​បើ​ប្រព័ន្ធ​ផ្សព្វផ្សាយ​ណាមួយ​លម្អៀង ឬ​មិន​គោរព​តាម​ក្រម​សីលធម៌​វិជ្ជាជីវៈសារ​​ព័ត៌មាន ក្រសួង​អាច​ណែនាំ​ដល់​ស្ថាប័ន​នោះ ពី​របៀប​ផ្សព្វផ្សាយ​ដែល​ត្រឹមត្រូវ តែ​មិន​មែន​ចេញ​សេចក្ដី​ណែនាំ​ឱ្យ​ផ្អាក​ការ​ផ្សាយ​បន្ត​ដូច្នេះ​ទេ។
 

សេចក្ដី​ណែនាំ​របស់​ក្រសួង​ព័ត៌មាន ចុះ​ថ្ងៃ​ទី​២៥ ខែ​មិថុនា បាន​តម្រូវ​ឱ្យ​គ្រប់​វិទ្យុ FM​ផ្អាក​ការ​ផ្សាយ​បន្ត​ពី​វិទ្យុ​បរទេស ដែល​ផ្សាយ​ជា​ខេមរភាសា ក្នុង​រយៈ​ពេល​បើក​ការ​ឃោសនា​បោះឆ្នោត និង​ថ្ងៃ​បោះឆ្នោត​ដែល​មាន​រយៈពេល ៣១​ថ្ងៃ។ នៅ​ក្នុង​សេចក្តីណែ​នាំ​ដែល​ចុះហត្ថលេខា​ដោយ​លោក​អ៊ុក ប្រាថ្នា ក្នុងនាម​ជា​រដ្ឋមន្រ្តី​ស្តីទី​ក្រសួង​ព័ត៌មាន​ក៏​បាន​ព្រមាន​ផង​ដែរ​ថា​នឹង​"ចាត់​វិធាន​ការ​តាម​ផ្លូវ​ច្បាប់ "​ចំពោះ​វិទ្យុ​FM​ណា​ដែល​រំលោភ​លើ​បម្រាម​នេះ។ មន្ត្រី​ក្រសួង​ព័ត៌មាន ក៏​ដូច​ជា​មន្ត្រី​រដ្ឋាភិបាល​ដែរ​មិន​អាច​សុំ​ការ​ពន្យល់​បន្ថែម​ណា​មួយ​អំពី​បម្រាម​នេះ​បាន​ទេ​រហូត​មក​ទល់​នឹង​ថ្ងៃសៅរ៍​នេះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI