កម្ពុជា

ឆ្នាំ​នេះ​​នួន​ ជា​ និង​​ខៀវ​ សំផន​ មិន​​ប្រារព្ធ​​ពិធី​​បុណ្យ​​ភ្ជុំ​បិណ្ឌ​​ទេ​

លោកនួន ជា​ ​ឆ្លើយដោះសារចំពោះមុខតុលាការ
លោកនួន ជា​ ​ឆ្លើយដោះសារចំពោះមុខតុលាការ RFI/ស៊ីវ​ ចាន់ណា

ខុស​​ពី​​ឆ្នាំ​​មុនៗ​ ឆ្នាំ​នេះ ​អតីត​មេដឹកនាំ​កំពូល​ខ្មែរក្រហម​ទាំងពីរ​ដែល​កំពុង​ជាប់​ក្នុង​មន្ទីរ​ឃុំឃាំង​នៃ​សាលាក្តី​ខ្មែរក្រហម​ គឺ​​នួន ជា​ និង​ ខៀវ សំផន ​មិន​បាន​ស្នើ​សុំ​រៀបចំ​ប្រារព្ធ​ពិធី​សាសនា​​ក្នុង​ឱកាស​បុណ្យ​ភ្ជុំបិណ្ឌ​នេះ​ទេ។ ​ ប៉ុន្តែ​ នៅ​ក្នុង​បន្ទប់​ឃុំឃាំង​របស់​ជន​ជាប់ចោទ​ទាំងពីរ​មាន​អាសនៈ​ដែល​​តាំង​រូប​ព្រះពុទ្ធបដិមា​សម្រាប់​ឲ្យពួកគេ​គោរព​បូជា​តាម​គន្លង​ព្រះពុទ្ធសាសនា​ជាប្រចាំ។​

ផ្សាយពាណិជ្ជកម្ម

ជារៀង​រាល់​ឆ្នាំ​ នៅ​ពេល​មាន​ពិធី​បុណ្យ​ប្រពៃណី​សាសនា​ធំៗ​ដូច​ជា​ ចូល​ឆ្នាំ ​និង​បុណ្យ​ភ្ជុំបិណ្ឌ ​ជាដើម​ អតីត​មេដឹកនាំ​ជាន់ខ្ពស់​ខ្មែរក្រហម​ដែល​​កំពុង​ជាប់​ក្នុង​មន្ទីរ​ឃុំឃាំង​តែង​​​ស្នើ​សុំ​ទៅ​អ្នក​គ្រប់គ្រង​ពន្ធនាគារ​ដើម្បី​បា្ររព្ធ​ពិធី​សាសនា។​ ពិធី​នោះ​មាន​ដូច​ជា​​ការ​និមន្ត​ព្រះសង្ឃ​សូត្រ​មន្ត​ និង​រាប់​បាត្រ​ជាដើម។​

 
ប៉ុន្តែ ​សម្រាប់​ពិធី​បុណ្យ​ភ្ជុំបិណ្ឌ​ឆ្នាំ​នេះ​ ជនជាប់ចោទ​ទាំងពីរ​ដែល​នៅ​សល់​ចុងក្រោយ​គឺ​ នួន​ ជា​ និង​ខៀវ ​សំផន​ មិន​បាន​ប្រារព្ធ​​ពិធី​សាសនា​ទេ។ ​គេ​មិន​ដឹង​មូលហេតុ​អ្វី​ពិត​ប្រាកដ​ដែល​ជន​ជាប់ចោទ​​ទាំងពីរ​​មិន​ប្រារព្ធ​បុណ្យ​ភ្ជុំ​បិណ្ឌ​នោះ​ទេ​ ប៉ុន្តែ ​លោក​ ឌឹម​ សុវណ្ណារុំ​ ប្រធាន​ផ្នែក​កិច្ចការ​សាធារណៈ​របស់​​សាលាក្តី​ខ្មែរក្រហម​បាន​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​នេះ​ថា​ មូលហេតុ​ដែល​អ្នក​​ទាំងពីរ​មិន​បាន​ប្រារព្ធ​ពិធី​សាសនា​ដូច​សព្វដង​ពី​ព្រោះតែ​នៅ​ក្នុង​បន្ទប់​ឃុំឃាំង​នីមួយៗ​​សុទ្ធតែ​មាន​អាសនៈ​តម្កល់​ព្រះពុទ្ធបដិមា​សម្រាប់​ឲ្យ​ពួកគេ​គោរព​បូជា​គ្រប់​ពេល​វេលា​បាន។​

បើយោង​តាម​លោក ​ឌឹម​ សុវណ្ណារុំ ​អាសនៈ​ព្រះដែល​មាន​នៅ​ក្នុង​បន្ទប់​ឃុំឃាំង​នោះ​​ត្រូ​វ​បាន​នាយកដ្ឋាន​ពន្ធនាគារ​រៀបចំ​ឡើង​ដើម្បី​ជា​ការគោរព​សេរីភាព​ជំនឿ​សាសនា​របស់​​ជនជាប់​ចោទ។ ​ក្រៅពី​កាំង ​ហ្គិចអ៊ាវ​ ហៅ​ឌុច​ អតីត​ប្រធាន​មន្ទីរ​សន្តិសុខ ​ស២១ ​ដែល​​បាន​​ប្តូរ​សាសនា​ពី​ព្រះពុទ្ធ​ទៅ​កាន់​សាសនា​គ្រឹះ​វិញ​នោះ​ ជនជាប់ចោទ​ផ្សេង​ទៀត​នៃ​​សាលាក្តី​ខ្មែរក្រហម​នៅតែ​កាន់​ព្រះពុទ្ធសាសនា​ដដែល។​ ពួកគេ​នៅតែ​ជាពុទ្ធសាសនិក​ជន​ដ៏​សកម្ម​បើ​ទោះ​បី​ជា​ជាប់​ចោទ​ពី​បទ​ឧក្រិដ្ឋកម្ម​ប្រឆាំង​មនុស្សជាតិ​​ក៏ដោយ។​ សូម្បី​តែ​នៅ​ក្នុង​បន្ទប់​ឃុំឃាំង​ក៏​មាន​តម្កល់​ព្រះពុទ្ធបដិមា​​សម្រាប់​គោរព​បូជា​ដែរ។​​​​​

គួរ​បញ្ជាក់​ថា ​សំណុំរឿង ​០០២​ វគ្គទី​១​ បាន​ឈាន​ដល់​ទីបញ្ចប់​ហើយ។ ​សវនាការ​​ដើម្បី​​ធ្វើ​សេចក្តី​សន្និដ្ឋាន​បិទ​បញ្ចប់​ការដេញដោល​សំណុំ​រឿង​នេះ​ត្រូវ​គេ​គ្រោង​នឹង​បើក​ធ្វើនៅ​ថ្ងៃ​ទី​ ១៦​ តុលា​គឺ​ក្រោយ​ពី​បញ្ចប់​បុណ្យ​ភ្ជុំបិណ្ឌ។ ​ជនជាប់ចោទ​ទាំងពីរ​គឺ​ ខៀវ សំផន ​និង​នួន ជា​ ដែល​តែង​បដិសេធ​មិន​ទទួល​ខុសត្រូវ​ចំពោះ​បទឧក្រិដ្ឋ​ក្នុង​របប​ដែល​ខ្លួន​ដឹកនាំ​នោះ ​បាន​ត្រៀម​ខ្លួន​រួចរាល់​ហើយ​ដើម្បី​ឆ្លើយ​ដោះសារ​ប្រឆាំង​​នឹង​ការចោទ​ប្រកាន់។ ​នេះ​បើ​តាម​ប្រធាន​ផ្នែក​កិច្ចការសាធារណៈ​​នៃ​សាលាក្តី​ខ្មែរក្រហម៕​
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI