កម្ពុជា

សមាគមរោងចក្រ​ និងILO​ រក​ឃើញ​បញ្ហា​ប្រឈម​៤ចំណុច​នៅ​ជា​ឧបសគ្គ​ដល់​បរិយាកាស​កាងារ​នៅ​កម្ពុជា​

កម្មករ​​កម្មការិនី​កម្ពុជា
កម្មករ​​កម្មការិនី​កម្ពុជា RFI

សហព័ន្ធ​និយោជក និង​សមាគម​ពាណិជ្ជកម្ម​កម្ពុជា និង​អង្គការ​ពលកម្ម រកឃើញ​បញ្ហា​ប្រឈម៤ចំណុច​ដើម្បី​ធានាឱ្យមាន​បរិយាកាស​ជា​ចិ​រ​ភាព​នៃ​វិស័យ​សហគ្រាស​នៅ​កម្ពុជា។ ចំណុច​ទាំង​បួន​នោះ​រួមមាន បញ្ហា​វិជ្ជាជីវៈ​នៅមានកំរិត បញ្ហា​ច្បាប់​និង​អភិបាលកិច្ច និង​បញ្ហា​បរិយាកាស​ការងារ រួមទាំង​បញ្ហា​អំពើពុករលួយ​ជាដើម។ សមាគម​រោងចក្រ​អំពាវនាវ​ឱ្យ​រដ្ឋាភិបាល​ចាត់វិធានការ​ជាបន្ទាន់។ ជាការ​ឆ្លើយតប​ក្រសួង​ការងារ​បាន​អះអាងថា ខ្លួន​មិនបាន​ព្រងើយកន្តើយ​ចំពោះ​បញ្ហា​ដែល​លើកឡើង​នោះទេ។  

ផ្សាយពាណិជ្ជកម្ម

នៅមាន​បញ្ហា​ប្រឈម​ចំនួន៤ចំណុច​ដែល​កំពុង​ជា​ឧបសគ្គ​រារាំង​ដល់​បរិយាកាស​ការងារ​ល្អ ក្នុង​វិស័យ​កាត់ដេរ និង​សហគ្រាស​នៅ​កម្ពុជា។ នេះ​បើតាម​ការរកឃើញ​រប​ស់​សមាគម​រោងចក្រ​កាត់ដេរ​នៅ​កម្ពុជា និង​អង្គការ​អន្តរជាតិ​ខាង​ការងារ​ហៅ​កាត់​ថា ILO។ ក្នុង​ពិធី​សម្ពោធ និង​ផ្សព្វផ្សាយ ឯកសារ​គោលនយោបាយ​របស់​សមាគម​រោងចក្រ​កាត់ដេរ និង​របាយការណ៍​រប​ស់​អង្គការ ILO នៅ​ថ្ងៃ​ពុធ​ទី១២ មីនា​នេះ ដោយមាន​ការចូលរួម​ពី​រដ្ឋមន្ត្រីក្រសួង​ការងារ លោក អ៊ិត សំហេង​ផងដែរ​នោះ សមាគម​រោងចក្រ និង​ILO បាន​បង្ហាញថា បញ្ហា​ប្រឈម​ទាំង​បួន​នោះ​រួមមាន ទី១ កង្វះ​កម្មករ​ជំនាញ​ដើម្បី​ប្រកួតប្រជែង ទី២ ការលើកកម្ពស់​គុណភាព​នៃ​ទំនាក់ទំនង​នៅ​កន្លែងធ្វើការ ទី៣ ការកសាង​បទដ្ឋាន និង​បទបញ្ញត្តិ​ដែល​ផ្តល់​ទំនុកចិត្ត​ជូន​អ្នកវិនិយោគ​ទន់ រួមទាំង​បញ្ហា​អភិបាលកិច្ច​ល្អ និង​អំពើពុករលួយ​ផងដែរ។

 
ក្នុង​របាយការណ៍​រយៈ​ពេល១២ខែ​របស់ខ្លួន បញ្ហា​ចំបង​ជាងគេ​ដែល​ក្រុម​សមាគម​រោងចក្រ​សង្កត់ធ្ងន់​នោះ​គឺ​អំពើពុករលួយ។ សមាគម​រោងចក្រ​បញ្ជាក់ថា “ផលវិបាក​នៃ​ការបដិសេធ​មិន​បង់ប្រាក់​សំរួល​ការងារ​បានធ្វើឱ្យ​ក្រុមហ៊ុន​ចំនួន៧០ភាគរយ ទ​ទូល​បាន​សេវា​យឺតយ៉ាវ ឬ​ពុំ​ទទួលបាន​សេវា​សោះតែ​ម្តង។ សមាគម​រោងចក្រ​កាត់ដេរ​តាមរយៈ​លោក វ៉ាន់ ស៊ូ​អៀង ប្រធាន​សហព័ន្ធ​និយោជក និង​សមាគម​ពាណិជ្ជកម្ម​កម្ពុជា បាន​សង្កត់ធ្ងន់ថា ទង្វើ​ទាំងនេះ​មិនអាច​ទទួលយក​បានទេ ហើយ​អំពើពុករលួយ​នេះ​នៅតែ​ជា​ឧបសគ្គ​សំខាន់ បើទោះបី​ជាមាន​អង្គភាព​ប្រឆាំង​អំពើពុករលួយ​ដែល​កំពុងធ្វើការ​ងារ​លុប​បំបាត់​ក៏ដោយ។ តាមរយៈ​លោក វ៉ាន់ ស៊ូ​អៀង សមាគម​រោងចក្រ​បានប្រកាសថា​ខ្លួន​រីករាយ​ឱ្យមាន​អង្គភាព​ប្រឆាំង​អំពើពុករលួយ​បើក​ការស៊ើបអង្កេត​ផងដែរ។
 

ថ្លែង​ក្រោយ​ការបញ្ចប់​សន្ទរកថារ​បស់​ខ្លួន លោក អ៊ិត សំហេង​រដ្ឋមន្ត្រីក្រសួង​ការងារ​និង​បណ្តុះបណ្តាល​វិជ្ជាជីវៈ បាន​អះអាងថា ចំណុច​ទាំង៤ដែល​ក្រុម​សមាគម​រោងចក្រ និង​អង្គការ​អន្តរជាតិ​ខាង​ការងារ​លើកឡើង​នោះ រដ្ឋាភិបាល​គឺ​កំពុងតែ​ដោះស្រាយ ហើយ​ខ្លួន​មិន​ព្រងើយកន្តើយ​នោះឡើយ។ យ៉ាងណាក៏ដោយ លោក រដ្ឋមន្ត្រី បាន​បញ្ជាក់ថា ចំពោះ​បញ្ហា​អំពើពុករលួយ​រដ្ឋា​ភី​បាល​ផ្សព្វផ្សាយ​រួចហើយ​ចំពោះ​ការយក​កម្រៃ​សេវាកម្ម​ផ្លូវ​ការដែល​ស្របតាម​ច្បាប់​របស់​រដ្ឋ។ សូម​រំលឹកថា ការដាក់​បង្ហាញ​របាយ​ការណ៍​ស្តីពី​បញ្ហា​ប្រឈម​របស់​ក្រុម​សមាគម​រោងចក្រ​នេះ គឺ​នៅ​ចំពេល​ដែលមាន​បញ្ហា​តានតឹង​រវាង​ក្រុម​សហជីព​និង​ក្រុម​រោងចក្រ​ស្តីពី​ការដំឡើង​ប្រាក់ខែ​អប្បរ​មា​របស់​កម្មករ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI