កម្ពុជា

មន្ត្រី​សហជីព​៨​រូប​បន្ត​ជាប់​ឃុំ ​ខណៈ​ដែល​មាន​ការ​តវ៉ា​ពី​កម្មករ​នៅ​ល្ងាច​ថ្ងៃសៅរ៍​

ការហែញត្តិរបស់សហជីព និង កម្មករ(រូបភាពឯកសារ)
ការហែញត្តិរបស់សហជីព និង កម្មករ(រូបភាពឯកសារ) RFI/ Siv Channa

ក្រុមកម្មករ​រាប់រយ​នាក់​នៅ​ខេត្តតាកែវ បាន​តវ៉ា​នៅខាងមុខ​ស្នងការ​ប៉ូលីស​ខេត្តតាកែវ ដើម្បី​ទាមទារ​ឲ្យ​អាជ្ញាធរ​ដោះលែង​សកម្មជន​សហជីព​ដែល​បាន​ចាប់ខ្លួន​កាលពី​ថ្ងៃ​សុក្រ។មន្ត្រី​អង្គការ​ឃ្លាំមើល​នានា​ផ្នែក​ការងារ​ថ្លែងថា ការចាប់ខ្លួន​មេដឹកនាំ​សហជីព គឺជា​ការរំលោភ​ទៅលើសិទ្ធិ​បំពេញការងារ​របស់​អង្គការ​វិជ្ជាជីវៈ ក្នុង​ការជួយ​ដោះស្រាយ​ទុក្ខលំបាក​របស់​កម្មករ។ ក៏ប៉ុន្តែ​អាជ្ញាធរ​ថ្លែងថា នោះ​គឺជា​ការអនុវត្ត​ច្បាប់​ក្រោម​បញ្ជារ​របស់​ព្រះ​រា​ជ្ញ​អាជ្ញា​តុលាការខេត្ត។

ផ្សាយពាណិជ្ជកម្ម

 

មន្ត្រី​សហជីព​ប្រជាធិបតេយ្យ កម្មករ​កាត់ដេរ​កម្ពុ​ជា (ហៅ​កាត់ ស៊ី​ខៅ​ឌូ) ចំនួន៨នាក់ ដែល​ចោទថា​បាន​ដឹកនាំ​កម្មករ កម្មការិនី ធ្វើបាតុកម្ម កូដកម្ម នៅ​រោងចក្រ ជេ.អេស.ឌី នៅ​មិនទាន់
មានការ​ដោះលែង​នៅឡើយ​ទេ​មកទល់​ល្ងាច​ថ្ងៃ​សៅរ៍ បន្ទាប់ពី​ពួកគេ​ត្រូវបាន​ចាប់ខ្លួន​ដោយ
ប៉ូលីស និង​កងរាជអាវុធហត្ថ​កាលពី​រសៀល​ថ្ងៃទី២៣ឧសភា។

លោក មឿង តុលា ប្រធាន​កម្មវិធី​ការងារ​មជ្ឈមណ្ឌល​អប់​រំ​ច្បាប់​សម្រាប់​សហគមន៍ ដែល​បាន​ឃ្លាំមើល​ការចាប់ខ្លួន​សកម្មជន​សហជីព​ទាំងនោះ​ថ្លែងថា កម្មករ​ប្រមាណ​ជា៥០០នាក់​កាលពី​រសៀល​ថ្ងៃ​សៅរ៍​បាន​ប្រមូល​ផ្តុំគ្នា​ទៅខាង​មុខ​ស្នងការ​ប៉ូលីស​និង តុលាការ ដែល​ស្ថិតនៅ​កន្លែង​តែមួយ ដើម្បី​ទាមទារ​ឲ្យ​មានការ​ដោះលែង​មន្ត្រី​សហជីព​ដែល​បាន​ចាប់ខ្លួន។

លោក​ថា អាជ្ញាធរ​បាន​រំលោភ​លើ​សិទ្ធិ​សហជីព​នៅពេលដែល​ពួកគេ​បាន​បំពេញការងារ​ស្របតាម​ច្បាប់​ក្នុង​ការធ្វើសកម្មភាព​ជួយ​ទៅដល់​សមាជិក​របស់​ពួកគេ​ដែល​ជួបប្រទះ​ជាមួយ​បញ្ហារំលោភសិទ្ធិ​ផ្សេង។ មន្ត្រី​ឃ្លាំមើល​កម្មវិធី​ការងារ​រូបនេះ​សម្តែង​ការសោកស្តាយ​ចំពោះ​ការចាប់ខ្លួន​អ្នក​សហជីព​ផងដែរ។

ក៏ប៉ុន្តែ លោក អ៊ុក សំណាង ស្នងការ​ប៉ូលីស​ខេត្តតាកែវ​បាន​ថ្លែងថា ក្នុងនាម​ជា​មន្ត្រីនគរបាល​យុត្តិធម៌ លោក​ត្រឹមតែ​អនុវត្ត​ទៅតាម​បញ្ជារ​របស់​ព្រះរាជអាជ្ញា​តែប៉ុណ្ណោះ។

ជាមួយគ្នានេះ លោក អាត់ ធន់ ប្រធាន​សហជីព​ស៊ី​ខៅ​ឌូ ដែល​បាន​ចុះទៅ​អន្តរាគមន៍​ខេត្តតាកែវ​​ដែរនោះ​បាន​ថ្លែងថា លោក​តំណាង​ឲ្យ​កម្មករ​នៅ​រោងចក្រ ជេ.អេស.ឌី ត្រូវ​ជួបប្រជុំ​គ្នា​ជាមួយ​តំណាង​រោងចក្រ និង​ក្រុមហ៊ុន​បញ្ជា​រទិញ​ផលិតផល​ពី​រោងចក្រ​ឈ្មោះ Indertex នៅពេល​ល្ងាច​ថ្ងៃ​សៅរ៍​ឯ​ភ្នំពេញ ដើម្បី​ស្វែងរក​ដំណោះស្រាយ ពោលគឺ​លោក​ស្នើ​ឲ្យ​ក្រុមហ៊ុន​ដក​បណ្តឹង​ជា​ស្ថាពរ​ប្រឆាំង​សហជីព។

សូមបញ្ជាក់ថា​កម្មករ​កាត់ដេរ​នៅ​រោងចក្រ ជេ.អេស.ឌី នៅក្នុង​ខេត្តតាកែវ​បានធ្វើ​បាតុកម្ម​អស់
រយៈពេល​ប្រមាណ​ជា​មួយខែ​មកហើយ​ដើម្បី​ទាំ​ទារ​លក្ខខណ្ឌ​ការងារ​មួយចំនួន។ក៏ប៉ុន្តែ​ការ​តវ៉ា​​នោះ​មិន​ត្រូវបាន​ដោះស្រាយ​ឡើយ។ កាលពី​សប្តាហ៍​មុន​ក្រុមកម្មករ​បានស្នើ​សុំ​អន្តរាគមន៍​ពី​សហជីព ស៊ី​ខៅ​ឌូ ដើម្បី​ជួយ​ដល់​ពួកគេ​ក្នុងការ​ទាំ​ទារ​តាមផ្លូវ​ច្បាប់។ ក៏ប៉ុន្តែ​មន្ត្រី​សហជីព​ស៊ី​​ខៅ​​ឌូ​​ ចំនួន​​៨​​នាក់​​​ត្រូវ​​បាន​ចាប់ខ្លួន​កណ្តាលផ្លូវ​ខណៈ​ដែល​ពួកគេ​បាន​វិល​ត្រលប់មក​ភ្នំពេញ​វិញ​កាលពី​រសៀល​ថ្ងៃ​សុក្រ ហើយ​បញ្ជូនទៅ​ឃុំខ្លួន​នៅ​ស្នងការ​ប៉ូលីស​ខេត្ត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI