អានតួអត្ថបទ
កម្ពុជា

អ្នក​សហជីព​ពិភាក្សា​គ្នា រឿង​ស្តង់​ដារ​ការងារ​កម្ពុជា ដែល​មិន​ទាន់​សមរម្យ​

លោក អាត់ ធន់ ប្រធាន​សហភាព​ការងារ​កម្ពុជា
លោក អាត់ ធន់ ប្រធាន​សហភាព​ការងារ​កម្ពុជា ©វណ្ណារ៉ា
ដោយ៖ ញឹម សុផល
១៣ នាទី

សហភាព​ការងារ​កម្ពុជា របស់​លោក អាត់ ធន់ បាន​បើក​សន្និសីទ​រយៈពេល​មួយថ្ងៃ​នៅ​ថ្ងៃ​ពុធ​ទី០២ កក្កដា​នេះ ដើម្បី​ជា​ការ​បើក​ឲ្យ​អនុវត្ត​គម្រោង ស្តី​ពី​ការ​លើក​កំពស់​ស្តង់ដារ​ការងារ​ស្នូល ឆ្ពោះ​ទៅ​កាន់​ការងារ​សមរម្យ សម្រាប់​កម្មករ​និយោជិត។ ការ​បើក​កិច្ច​ប្រជុំ ស្តីពី​គម្រោង​ដែល​គាំទ្រ​ដោយ សហភាព​អឺរ៉ុប និង​មូលនិធិ​អន្តរជាតិ ស៊ី.អ៊ិន.វី នា​ពេល​នេះ គឺ​ដោយសារ​ក្រុម​អ្នក​សហជីព​មើល​ឃើញ​ថា កម្ពុជា​នៅ​មិន​ទាន់​មាន ស្តង់ដារ​ការងារ​សមរ​ម្យ​នៅ​ឡើយ។

ផ្សាយពាណិជ្ជកម្ម

ប្រធាន​សហភាព​ការងារ​កម្ពុជា លោក អាត់ ធន់ បាន​ថ្លែង​ថា​កិច្ចប្រជុំ​ដែល​រៀបចំឡើង​រយៈ​ពេល​​មួយថ្ងៃ នៅ​ទី​ក្រុង​ភ្នំពេញ​នា​ពេល​នេះ បាន​ទ​ទូល​ការចាប់អារម្មណ៍​យ៉ាង​ខ្លាំង ពី​អ្នក​ចូលរួម​ និង​ស្ថាប័ន​ពាក់ព័ន្ធ​នានា ជា​ពិសេស​ពី​សហជីព​អន្តរជាតិ និង​សហភាព​អឺរ៉ុប ទៅ​លើ​ប្រធានបទ​ធ្វើ​ឲ្យ​ប្រសើរឡើង​នូវ​ស្តង់ដារ​ការងារ​ក្នុង​ប្រទេស​កម្ពុជា។

ការ​ថ្លែង​របស់​មេ​សហជីព​រូប​នេះ បាន​ធ្វើ​ឡើង បន្ទាប់ពី​មាន​ការ​បើក​សន្និសីទ នៅ​ថ្ងៃ​ពុធ​ទី០២ ខែកក្កដា​នេះ ដើម្បី​បើក​ឲ្យ​អនុវត្ត​គម្រោង ស្តីពី​ការ​លើក​កំពស់​ស្តង់ដារ​ការងារ​ស្នួល ឆ្ពោះ​ទៅ​កាន់​​ការងារ​សមរម្យ​សម្រាប់​កម្មករ និ​យោ​ជិត​ នៅ​កម្ពុជា ដែល​ជា​ប្រទេស​មួយ បានផ្តល់​សច្ចាប័ន​​ទៅ​លើ​អនុសញ្ញា​អន្តរជាតិ​លេខ​៩៨ របស់​អង្គការ​អន្តរជាតិ​ខាង​ការងារ ILO។

សន្និសីទ​ដែល​គាំទ្រ​ដោយ​មូលនិធិ​អន្តរជាតិ ស៊ី.អ៊ិន.វី និង​សហភាព​អឺរ៉ុប មាន​វត្ថុបំណង​សំខាន់​ទៅ​លើ​ការ​លើក​កម្ពស់​ស្តង់ដារ​​ការងារ​ស្នូល ដោយ​ផ្តោត​សំខាន់​លើ​ការ​លើក​កម្ពស់​សិទ្ធិ​កម្ម​ករ និ​យោ​ជិ​ត​ ក្នុង​ការ​បង្កើត​សហជីព និង​ឈាន​ទៅ​ដល់​ការ​ចរចា​អនុសញ្ញា​រួម។

តាម​ការប្រកាស​ឲ្យ​ដឹង​ពី​អង្គ​សន្និសីទ​រយៈពេល​មួយ​ថ្ងៃ​នេះ គម្រោង​ដែល​បាន​រៀបចំ​ឡើង និង​ដាក់​ជា​ការ​ពិភាក្សា​នា​ពេលនេះ ត្រូវ​គេ​ផ្តោត​ទៅ​លើ​ការអនុវត្តន៍​​សកម្មភាព​តស៊ូ​មតិ និង​ការ​លើក​កម្ពស់ សិទ្ធិ​របស់​កម្មករ​ជា​ស្ត្រី សិទ្ធិ​របស់​កម្មករ​វ័យ​ក្មេង ជា​ពិសេស​លើក​កម្ពស់​ស្តង់ដារ​​ការងារ​ស្នូល ឆ្ពោះ​ទៅ​កាន់​ការងារ​សម​រម្យ​សម្រាប់​កម្មករ​និយោជិត នៅ​កម្ពុជា។

មន្ត្រី​ក្រសួង​ការងារ និង​ក្រសួង​កិច្ចការ​នារី​កម្ពុជា ដែល​បាន​អញ្ជើញ​ចូលរួម ក្នុង​ពិធី​ដែរ​នោះ មិន​មាន​អត្ថាធិប្បាយ​អ្វី​ទេ ទាក់ទង​ទៅ​នឹង​ភាព​យ៉ាប់យ៉ឺន​នៃ​ស្តង់ដា​រ​ការងារ​កម្ពុជា ដែល​ជា​ការ​លើក​ឡើង​របស់​ក្រុម​អ្នក​សហជីព៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ