អានតួអត្ថបទ
កម្ពុជា

សហគមន៍​ជនជាតិ​ភាគ​តិច​នៅ​ក្នុង​ខេត្ត​ព្រះវិហារ​ជំរុញ​ឲ្យ​លុប​ចោល​ដី​សម្បទាន​សេដ្ឋកិច្ច​

ប្រជាជន​ជនជាតិ​ដើម​ភាគតិច​គួយ​ក្នុង​ខេត្ត​ព្រះវិហារ​តវ៉ាបញ្ហាដីធ្លី។
ប្រជាជន​ជនជាតិ​ដើម​ភាគតិច​គួយ​ក្នុង​ខេត្ត​ព្រះវិហារ​តវ៉ាបញ្ហាដីធ្លី។ RFI/Chan Lida
១៥ នាទី

ជម្លោះ​ដី​ធ្លី រវាង​ប្រជា​សហគមន៍ នៅ​ឃុំ​ប្រមេរ ខេត្ត​ព្រះវិហារ ជាមួយ​នឹង​ក្រុមហ៊ុន​សម្បទាន​សេដ្ឋកិច្ច​ចំនួន​២ ដែល​ឈាន​ដល់​ការ​ប្តឹងផ្តល់​គ្នា​នោះ បាន​អូស​បន្លាយ​រយៈពេល​ជាង​បី​ឆ្នាំ​ហើយ តែ​រហូត​មក​ទល់​ពេល​នេះ នៅ​តែ​គ្មាន​ដំណោះស្រាយ​នៅ​ឡើយ។ ប្រជា​សហគមន៍​បាន​សម្តែង​នូវ​ក្តីកង្វល់ និង​ជំរុញ​ឲ្យ​លុបចោល​ដី​សម្បទាន​សេដ្ឋកិច្ច​ពី​ក្រុមហ៊ុន​ទាំង២នោះ។ សំណើ​នេះ​បានធ្វើ​ឡើង​នៅ​ព្រឹក​ថ្ងៃ​ទី​២៣ កក្កដា​នេះ នៅ​ឯ​សន្និសីទកាសែត រៀបចំឡើង​នៅ​វេទិការ​អង្គការ​មិនមែន​រដ្ឋាភិបាល។

ផ្សាយពាណិជ្ជកម្ម

ប្រជា​សហគមន៍​ចំនួន​បី តំណាង​គ្រួសារ​ជនជាតិដើម​ភាគតិច​ចំនួន ៣៦៧​គ្រួសារ នៅ​ឃុំ​ប្រមេរ ស្រុក​ត្បែងមានជ័យ ខេត្តព្រះវិហារ បាន​ទទូច​ឲ្យ​រដ្ឋាភិបាល​លុបចោល​នូវ​កិច្ច​សន្យា​ផ្តល់​ដី​សម្បទាន​សេដ្ឋកិច្ច​ឲ្យ​ក្រុមហ៊ុន ឡាន ហ្វេ​ង និង រូយ ហ្វេ​ង និង​សុំ​ឲ្យ​រដ្ឋាភិបាល​ចេញ​វិធាន​ការការពារ​បណ្តោះអាសន្ន​នូវ​ដី​សហគមន៍​ជនជាតិ​ដើម​ភាគតិច​កួ​យ ព្រមទាំង​ពន្លឿន​ការ​ចុះ​បញ្ជី​ដី​សមូហភាព​របស់​សហមគន៍​ផងដែរ។

ប្រជា​សហគមន៍​បានចេញ​សេចក្តីថ្លែងការណ៍​រួម ដោយ​ចោទ​ក្រុមហ៊ុន​ទាំងពីរ​ថា បាន​ឈូស​ឆាយ​ដី​សហគមន៍ និង​បានធ្វើ​ឲ្យ​ប៉ះពាល់​យ៉ាងធ្ងន់ធ្ងរ​ដល់​ជីវភាព​រស់នៅ វប្បធម៌​ប្រពៃណី អត្តសញ្ញាណ ដីចម្ការ ដី​បម្រុង​ទុក និង​ជំនឿ​សាសនា​របស់​ពួកគាត់​ជាដើម។ សេចក្តី​ថ្លែងការណ៍​​​រួម​បាន​បន្តថា សកម្មភាព​របស់​ក្រុមហ៊ុន​ក៏បាន​ធ្វើ​ឲ្យ​ប៉ះពាល់​ដល់​ខឿន​ប្រាសាទ​បុរាណ​​មួយចំនួន​ដូចជា ប្រាសាទ​យា​ក់​ព្លួក ប្រាសាទត្រពាំងស្វាយ និង​ប្រាសាទ​មួយចំនួនទៀត។

លោកស្រី ស៊ិ​ង សាំ សមាជិក​សហគមន៍​ប្រមេរ បាន​សម្តែង​ការសោកស្តាយ​យ៉ាងខ្លាំង ដោយសារ​លោកស្រី​បាត់បង់​ដី​ធ្វើ​ចម្ការ បាត់បង់​ព្រៃ ប៉ះពាល់​ជីវភាព​របស់លោក​ស្រី។ លោក​ស្រី​ ​បាន​បន្ថែមថា កន្លងមក​ខាង​អាជ្ញារ​មិន​ត្រឹមតែ​មិន​អើពើ​ចំពោះ​សហគមន៍​ជន​ជាតិ​ភាគ​តិច​​​ប៉ុណ្ណោះ​ទេ ប៉ុន្តែ ប្រជា​សហគមន៍​ជនជាតិភាគតិច​កួយ​ដែល​រស់នៅ​ដោយ​អាស្រ័យ​ផល​ពី​ការ​ដង​ជ័រទឹក បោច​វ​ល្លិ៍ ធ្វើស្រែ​ចម្ការ​ជាដើម​នោះ​បែរជា​រង​ការ​គំរាម​គំហែង​ទៀតផង។

លោកស្រី  ទេព ទឹម តំណាង​អង្គការ OPKO បាន​ឲ្យ​ដឹងថា កន្លងមក ប្រជា​សហគមន៍​បាន​ជំរុញ​ដល់​អជ្ញាធរ​មាន​សមត្ថ​កិច្ច និង​ក្រសួង​ពាក់ព័ន្ធ​ឲ្យ​ដោះស្រាយ​ដែរ ក៏ប៉ុន្តែ​ហាក់​គ្មាន​ដំណោះស្រាយ​នោះឡើយ។

សូម​ជម្រាប​ដែរ​ថា ក្រុមហ៊ុន រូ​យ ហ្វេ​ង បានទទួល​សិទ្ធិ​ឲ្យ​ធ្វើការ​វិនិយោគ​ដាំ​កៅស៊ូ អំពៅ និង​អាកាស្យា លើ​ផ្ទៃដី​ចំនួន​ជាង ៨០០០ ហិច​តា ពី​រដ្ឋាភិបាល​កាលពី​ឆ្នាំ២០១១ ខណៈ​ក្រុមហ៊ុន ឡាន ហ្វេ​ង ទទួលបាន​ដី​សម្បទាន​សេដ្ឋកិច្ច​ចំនួន​ជាង ៩០០០ ហិច​តា។

សូមបញ្ជាក់​ផងដែរ​ថា តុលារ​បាន​កោះហៅ ប្រជា​សហគមន៍​ចំនួន៣នាក់ រួម​នឹង​បុគ្គលិក​អង្គការ​ពន្លក​ខ្មែរ​ម្នាក់​ផង ក្រោម​បទ​ចោទថា បំផ្លេចបំផ្លាញ​ទ្រព្យសម្បត្តិ​អ្នកដទៃ​ដោយ​ចេតនា ឲ្យ​ចូល​បំភ្លឺ​នៅ​ថ្ងៃទី៣០ កក្កដា ខាងមុខនេះ។ រហូតមកទល់​ពេលនេះ​តុលាការ​បាន​កោះហៅ​អ្នក​ទាំង៤ ចំនួន​បី​លើក​មកហើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ