អានតួអត្ថបទ
កម្ពុជា

WB ៖ នគរូបនីយកម្ម​ដែលមាន​ល្បឿន​លឿន ​ជា​បញ្ហា​ប្រឈម​ ដែល​ថ្នាក់​ដឹកនាំ​ត្រូវ​ចាត់​វិធានការ​ ដើម្បី​រួមចំនែក​ជួយ​ដល់​ប្រជាជន​ក្រីក្រ​

សំណង់អគារ​រីកដុះ​ដូចផ្សិត​នៅ​កម្ពុជា ប៉ុន្តែ គុណភាព​សំណង់​គឺ​ជា​បញ្ហា​ចោទ​ដល់​សុវត្ថិភាព
សំណង់អគារ​រីកដុះ​ដូចផ្សិត​នៅ​កម្ពុជា ប៉ុន្តែ គុណភាព​សំណង់​គឺ​ជា​បញ្ហា​ចោទ​ដល់​សុវត្ថិភាព RFI/Bona Pen
ដោយ៖ រិទ្ធិ ម៉ូនីកា
១៧ នាទី

ក្រុមធនាគារពិភពលោក​នៅ​ថ្ងៃ​ចន្ទ ទី ២៦ មករា នេះ បានបង្ហាញ​របាយការណ៍​មួយ​ដែល ផ្តល់​ជា​ជំនួយស្មារតី ដើម្បីអោយ​ការងារ​អភិវឌ្ឍន៍​ក្រុង​នៅក្នុង​តំបន់​អាស៊ី​បូព៌ា​ផ្តល់​ផលប្រយោជន៍​ដល់​ជនក្រីក្រ។ តាម​សេចក្តីប្រកាស នគររូបនីយកម្ម​ដែលមាន​ល្បឿន​លឿន គឺជា បញ្ហា​ប្រឈម​ធំ​មួយ ដែល​មេដឹកនាំ​ត្រូវតែ​យល់ដឹង ។

ផ្សាយពាណិជ្ជកម្ម

 

រាជធានី​នៃ​ប្រទេស​កម្ពុជា មាន​ទំហំ​តូច​ជាងគេ​បំផុត​លំដាប់​ទី៤ នៅក្នុង​តំបន់​អាស៊ីបូព៌ា ប៉ុន្តែ​កំនើន​ប្រជាជន​ក្នុង​ក្រុងមាន​ល្បឿន​លឿន​ជាងគេ​បំផុត គឺ កើនឡើង​ពី​៤.៤ភាគរយ​ក្នុង​មួយឆ្នាំ ហើយ​ការពង្រីក​ទំហំ​ទីក្រុង​ក៏មាន​ល្បឿន​លឿន​ជាងគេ​បំផុត​លំដាប់​ទី២ នៅក្នុង​តំបន់​ផងដែរ ។ នេះ​បើតាម​ទិន្ន​យ័​ថ្មី នៃ​របាយការណ៍​ធនាគារ​ពិភពលោក ដោយ​បង្ហាញថា ប្រជាជន​ក្នុង​ក្រុងភ្នំពេញ​កើនឡើង​ពី ជាង៩សែន នាក់ ដល់ ១លាន៤សែន នាក់ នៅ​ចន្លោះ​ពី​ឆ្នាំ ២០០០ ដល់ ឆ្នាំ ២០១០ ហើយ ចំនួន​ផ្ទៃដី​បាន​កើនឡើង​ពី ១១០គីឡូម៉ែត្រ​ក្រឡា​នៅ​ឆ្នាំ ២០០០ ដល់ ១៦០គីឡូ​ម៉ែត​ក្រឡា​នៅ​ឆ្នាំ ២០១០។

លោក អាក់​សែល វ៉ាន់ ត្រុតសេនប៊ើហ្គ អនុប្រធាន​ធនាគារពិភពលោក​ប្រចាំ​តំបន់​អាស៊ីបូព៌ា និង ប៉ាស៊ីហ្វិក មានប្រសាសន៍ថា នគរូបនីយកម្ម​ដែលមាន​ល្បឿន​លឿន គឺជា​បញ្ហា​ប្រឈម​ដ៏​ធំ​មួយ​សម្រាប់​តំបន់​អាស៊ីបូព៌ា ប៉ុន្តែ​យើង​មិន​អាច​គ្រប់គ្រង​នូវ​អ្វីដែល​យើង​មិនអាច​វាស់វែង​បានទេ។ ដូច្នេះ​មេដឹកនាំ​នៅ​ទីក្រុង តាមរយៈ​ទិន្ននយ័ អាច​យល់​ដឹង​កាន់តែ​ប្រសើរ​ថែមទៀត​អំពី​រូបរាង និង ចាត់វិធានការ ដើម្បី​ធានាថា ការរីកលូតលាស់​នៅក្នុង​តំបន់​ទីក្រុង រួមចំនែក​ជួយ​ដល់​ប្រជាពលរដ្ឋ​ដែល​កំពុង​រស់នៅក្នុង​ទីក្រុង​កាន់​តែ​ច្រើន​ឡើងៗ​ជា​ពិសេស​ប្រជាពលរដ្ឋ​ក្រីក្រ។

ចំនែក លោក អាប់បាស ចា ប្រធាន​គ្រប់គ្រង​ផ្នែក​ប្រតិបត្តិ​សាកល​នៃ​កិច្ចការ​សង្គម ទីក្រុង ជនបទ និង​ភាព​ធន់ របស់​ក្រុម​ធនាគារពិភពលោក​បាន​បញ្ជាក់ថា ការ​សម្របសម្រួល​លើ​ផ្នែក​រចនា​សម្ពន្ធ័ ទីក្រុង ដង់ស៊ីតេ និង​រដ្ឋបាល​អោយ​បាន​ត្រឹមត្រូវ នឹង​មាន​សារៈសំខាន់​ក្នុង​ការជួយ​បញ្ចប់​ភាព​ក្រីក្រ​តោកយ៉ាក និង​ជម្រុញអោយមាន​វិបុលភាព​សម្រាប់​ទាំងអស់គ្នា។

ចំពោះ​ផែនការ​អភិវឌ្ឍន៍​ក្រុងភ្នំពេញ​ដែលមាន​កំនើនប្រជាជន​យ៉ាង​លឿន​នោះ លោក ឡុង ឌីម៉ង់ អ្នកនាំពាក្យ​សាលា​រាជធានី​ភ្នំពេញ បាន​បញ្ជាក់ថា ប្លង់​មេ ឬ Master plan ពង្រីក​ក្រុង របស់​សាលា​រាជធានី​ភ្នំពេញ គឺ​ផ្តោតលើ​ប្រយោជន៍​សាធារណៈ​ជាធំ។ លោក បន្តថា បើទោះបីជា​កន្លែង​ខ្លះ​ត្រូវ​ចាក់ដី​បំពេញ តែ​អាជ្ញាធរ​ក៏បាន​គិតគូ​ថា​កន្លែង​ណា​ដែល​ត្រូវដាក់​ប្រពន្ធ័​លូ រឺ​ប្រលាយទឹក ដែរ។ ក្រៅពីនេះ លោក​បាន​ទាមទារ អោយមាន​ការចូលរួម​សហការ​ពី​ប្រជាពលរដ្ឋ​ដើម្បី​ដោះស្រាយ​បញ្ហាធំៗ និង ថា បញ្ហា​ហេ​ដ្ឋា​រចនា​សម្ពន្ធ័ បរិស្ថាន និង ការផ្តល់​សេវាសាធារណៈ​ជាដើម គឺជា​បញ្ហា​អាទិភាព​ដែល​អាជ្ញាធរ​គិតគូរ​ផងដែរ។

សូម​បញ្ចាក់ថា របាយការណ៍​ថ្មី​នេះ ជា​របាយការណ៍​លើក​ដំបូង របស់​ធនាគារពិភពលោក ដែល​បង្ហាញ​ពី​ទិន្ននយ័​ប្រៀបធៀប​រវាង​តំបន់​ទីក្រុង​និង​ចំនួន​ប្រជាជន នៅក្នុង​ទីក្រុង​នៅ​ទូទាំង​តំបន់​អាស៊ី​បូព៌ា  ដើម្បី​ជម្រុញ​អោយ​រដ្ឋាភិបាល​និង​មេដឹកនាំ​ក្នុង​បណ្តា​ប្រទេស​ទាំងនោះ​អាច​រៀបចំ​ទីក្រុង​អោយ​បាន​ត្រឹមត្រូវ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ