គ.ជ.ប ថ្មីត្រូវ​គេរំពឹងថា​ ប្រសើរជាង​គ.ជ.ប ​ចាស់

សំឡេង ០៤:១៤
សមាជិក​គ.ជ.​ប​ចាស់​ដែល​ត្រូវ​ប្តូរ​ដោយ​សមាជិក​គ.ជ.ប​ថ្មី​
សមាជិក​គ.ជ.​ប​ចាស់​ដែល​ត្រូវ​ប្តូរ​ដោយ​សមាជិក​គ.ជ.ប​ថ្មី​ ©Reuters

បន្ទាប់ពី​សមាជិកថ្មី​នៃគណៈកម្មាធិការ​ជាតិ​រៀបចំ​ការបោះឆ្នោត​ គ.ជ.ប ​ចំនួន៩រូប ត្រូវបាន ជ្រើសរើស​ជាផ្លូវការ​​ដោយ​រដ្ឋសភាជាតិ អ្នក​តាមដាន​សភាពការណ៍​នយោបាយ​នៅប្រទេស កម្ពុជា​​មើល​ឃើញ​ថា ជាប្រវត្តិសាស្ត្រថ្មីមួយ ដែល​ប្រទេសកម្ពុជា​សង្ឃឹមថា​នឹងពាក់ស្លាក ឯករាជ្យ អព្យាក្រិត្យ នៅមានកំរិត។ ក៏ប៉ុន្តែ​ក្តីបារម្ភ​នៅតែមាន ដោយសារ​សមាសភាព​សមាជិក​ គ.ជ.ប ថ្មីនេះជាអតីត​អ្នកគាំទ្រ​គណបក្ស​ជាប់ឆ្នោត​ទាំងពីរ។ទោះចង់​មិនចង់​ទាំងអ្នកអបអរ ទាំងអ្នក​រិះគន់​ចាំបាច់​ត្រូវតែ​ទទួលយក ដោយសារ​ទំនាស់ដ៏​ធំបំផុត​ក្រោយការបោះឆ្នោត​កន្លងមក​ត្រូវគេ​ទំលាក់​ទៅលើ​អាជ្ញាកណ្តាល​គឺ គ.ជ.ប។

ផ្សាយពាណិជ្ជកម្ម

ភាព​ចម្រូង​ចម្រាស់​ទាក់ទង​ទៅ​នឹង​ការ​បោះឆ្នោត​ស្ទើរ គ្រប់​អាណត្តិ​នៅ​ប្រទេស​កម្ពុជា​កន្លង​មក ​គឺ​ត្រូវ​បាន​​គេ​ទំលាក់​ការ​ទទួល​ខុសត្រូវ​ទៅលើ​អាជ្ញាកណ្តាល ពោលគឺ​គណៈកម្មាធិការ​ជាតិ​​​រៀប​ចំ​ការបោះឆ្នោត​(គ.ជ.ប)​នេះឯង។ក៏ប៉ុន្តែ​សម្រាប់​ការបោះឆ្នោត​ជាលើក​ដំបូងរបស់
ប្រទេស​​នេះ​នៅ​ឆ្នាំ១៩៩៣ គឺគេ​បន្ទោស​ម្តងដែរ​ទៅលើ​អង្គការសហ​ប្រជាជាតិ​ដែលជា​អ្នក​រៀប​ចំ​​ការ​បោះឆ្នោត​នៅពេលនោះ។

យើង​ឃើញថា​អស់រយៈពេល​ជាង២២ឆ្នាំ​មកនេះ ប្រទេសកម្ពុជា​ទើបតែរក​​ឃើញ​អាជ្ញាកណ្តាល មួយ​ក្រុម​​មានគ្នា​៩នាក់ ដែល​គេសង្ឃឹមថា​ការបោះឆ្នោត​លើកក្រោយៗ​នឹង​ទទួល​​​បាន​ភាព​កក់ក្តៅ​ និងជឿទុកចិត្ត​បានកំរិតណា​មួយពី​គ្រប់ភាគី​នយោបាយ ដែល​ពាក់​ព័ន្ធ។

តាមរយៈ​ការផ្តល់​សេចក្តីទុកចិត្ត​ពីសំណាក់​សមាជិកសភា​កាលពីម្សិលមិញ​ដោយសម្លេង ១១៣ លើ១១៧ បង្ហាញថា​នៅ​ពេលនេះ​ គ.ជ.ប ថ្មី បានចេញ​រូបរាង​ឡើង ដោយ​មាន​សមាស​ភាពចំរុះ ខុសពី​គ.ជ.ប ​មុនៗដែល​សមាសភាព​នៃស្ថាប័ននេះ ប្រកប​ដោយការ​រិះគន់។
ជាការ​ពិតអ្វីៗតែង​មានការ​វិវត្តន៍​ទៅមុខ មានការ​ប្រែប្រួល​ និង​ទៅតាម​លំអាន​នៃ​ការផ្លាស់ប្តូរ តួយ៉ាង​ដូចជា​ស្ថាប័ន​រៀបចំ​ការ​បោះឆ្នោត​ គ.ជ.ប​ជាដើម។ កំណែទម្រង់​លើកនេះ ​ស្រប​តាម​ការ​ចង់​បាន​របស់​មហាជន​មួយចំនួន​ ក៏ប៉ុន្តែ​មួយចំនួន​ទៀត​ក៏សម្តែង​ការមិន​សប្បាយ​ចិត្តដែរ ដោយ​មាន​ការចោទ​ប្រកាន់ថា​ គ.ជ.ប ​ថ្មីនេះ នឹង​នាំមកនូវ​ស្រមោល​ការងារ​មិនខុសពី គ.ជ.ប ចាស់នោះទេ។

ការមាន​ជំនឿ​ឬ​គ្មាន​ជំនឿ​លើស្ថាប័ន ​គ.ជ.ប​ ថ្មី អាស្រ័យ​ទៅលើ​ការអនុវត្ត​ជាក់ស្តែង របស់​មនុស្ស​៩រូប​ បូករួម​នឹង​ផ្នែក​ពាក់ព័ន្ធ និងច្បាប់​ដែល​បានចែង​ស្តីពី​ការ​ប្រព្រឹត្ត​ទៅ​នៃ​ស្ថាប័ន​នេះ។

ជា​ទូទៅ​ការមាន​ស្ថាប័ន​រៀបចំ​ការបោះឆ្នោត​មួយដែល​អព្យាក្រិត្យ ហើយ​គ្រប់គ្នា​ទន្ទឹង​រង់​ចាំ​យូរ​មក​ហើយនោះ​ មិនមែន​ជាការ​រង់ចាំ​ស្រមោល​មិនល្អ​ពី​អតីតកាល​ត្រលប់​មកវិញ​នោះទេ។ទម្រាំ​​បាន​ប៉ុណ្ណេះ គណបក្ស​នយោបាយ​ទាំងពីរ​បានពុះពារ កាត់​ព្យុះភ្លៀង​ និង​ការបាញ់​ចម្រុះ​ពាក្យ​សម្តី​ប្រៀបបាន​នឹងផ្លែព្រួញ​របស់​ទាហ៊ាន​ប្រយុទ្ធ​គ្នាក្នុង​រឿងសាមកុក។ ក៏ប៉ុន្តែ​មតិ​បាញ់​ចម្រុះ​​ដូចផ្លែ​ព្រួញ ដែលមាន​បំណងចង់​ឲ្យមាន​ការ​កែប្រែ​ល្អដែរ​នោះ មិនអាច​រារាំង​ដំណើរ​វិវត្តន៍​ទៅមុខ ក្នុងការ​បង្កើត គ.ជ.ប មួយដែល​ត្រូវការ​ចាំបាច់ និង​បន្ទាន់នោះ​បានទេ។

វាមិន​ថ្វីទេ ប្រសិន​បើដំណើរការ​ការងារ​របស់ គ.ជ.ប ថ្មីនេះ ប្រព្រឹត្តិទៅ ដោយ​ស៊ីសង្វាក់​គ្នា
និង​មានការ​យោគយល់​គ្នា ហើយ​ការអនុវត្ត​ប្រកាន់ខ្ជាប់​នូវ​មូលដ្ឋាន​ច្បាប់ អាច​ចាត់ទុក​ថា​ជាការ​ប្រែប្រួល​មួយ​ដ៏ធំ ដែលនាំ​ទៅកាត់​បន្ថយ​ភាពចម្រូងចម្រាស់​បានច្រើន ដែល​ខ្មែរធ្លាប់​មានបន្ទាប់​ពី​មាន​ការ​​បោះឆ្នោត​ម្តងៗ។

ចំណុច​មួយទៀត​ដែលគេ​មើលឃើញ​នោះគឺ​ស្មារតី​ការងារ​អព្យាក្រិត្យ​ក្នុងចំណោម​សមាជិក
គ.ជ.ប​ ទាំងអស់​សំខាន់ណាស់ ព្រោះថា​កាយវិការ​នេះជួយ​ឲ្យស្ថាប័ន​ថ្មីនេះ​ចៀសផុត​ពី​ការ​រិះគន់​ជាប្រវត្តិសាស្ត្រ ​បើទោះ​ណាជា​កំណែតម្រង់​នេះ ត្រូវគេ​ជឿថា​នឹង​មិនអាច​ប្រព្រឹត្តិ​ទៅ​បាន​ ១០០ភាគរយ​ ក៏ដោយ​ក៏គេយល់​ថា​មានការ​ប្រែប្រួល​មួយចំនួន​ធំដែរ។

ផ្ទុយទៅវិញ បើសមាជិក គ.ជ.ប ថ្មី​ដែលមាន​អតីតភាព​ជាអ្នក​គាំទ្រ​គណបក្ស​នយោបាយ​នោះមិនមា​នឆន្ទៈ​ក្នុងការ​​ចូលរួម លើក​ស្ទួយស្ថាប័ន​ដ៏សំខាន់​នេះពិតប្រាកដ ហើយ​នៅតែ​មាន​ភាពលម្អៀង​ទៅរក​គណ​បក្ស​រៀងៗខ្លួន​ទេ នោះ​មិនដឹង​ពេលណា​ទេ ដែល​ពលរដ្ឋ​ខ្មែរ​មាន​ គ.ជ.ប មួយ​ឯករាជ្យ​ និង​អព្យាក្រិត្យ ដែល​ពួក​គេ​ស្រម៉ៃ​ចង់បាន​ដូចជា​បណ្តា​ប្រទេស​ដែល​មានការអភិវឌ្ឍន៍នានា​នៅលើពិភពលោក។ហើយ​ក៏មិន​ដឹងពេល​ណាទេ​ដែលវិវាទ​ក្រោយការបោះឆ្នោត​ត្រូវបាន​បិទបញ្ចប់។

ទោះយ៉ាង​នេះក្តី​ គ.ជ.ប ​ដែលមាន​ការ​ចាប់អារម្មណ៍​ច្រើន​ពីមហាជន និង​មានការ​តាម​ឃ្លាំ​មើល​​ចាប់តាំង​ពីដំណើរការ​ដំបូងរហូត​ដល់ចុងបញ្ចប់ ព្រមទាំង​បន្ត​ឃ្លាំមើល​ពី​ការអនុវត្ត​ជាក់ស្តែង​ទៅ​អនាគត​ទៀត​នោះ នឹងមាន​លក្ខណៈ​ប្រសើរ​ជាង គ.ជ.ប ពីមុន ដែល​ស្ថាប័ន​នេះត្រូវគេ​វាយតម្លៃ​ថាជា​កម្មវត្ថុ​នៃភាព​ប្រេះឆា​រវាង​ខ្មែរ​នឹង​ខ្មែរ​បន្ទាប់​ពីមាន​ការ​បោះឆ្នោត​ម្តងៗ។

ក៏ប៉ុន្តែ​មតិនានា​ដែល​សម្តែង​ការព្រួយបារម្ភ​កន្លង​មក ចាត់ទុកថា វាជាការដល់​ពេលហើយ ដែល ខែ្មរចាប់​ផ្តើម​មាន​ទំនុកចិត្ត​នឹងគ្នា នៅពេល​ប្រកួតប្រជែង ក្រោមការ​មើលខុស​ត្រូវពី
អាជ្ញា​កណ្តាល​មួយ ដែល​ម្ចាស់ឆ្នោត​ទន្ទឹង​រង់ចាំ​ជាង២០ឆ្នាំ​មកហើយ​នោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI