កម្ពុជា

ក្រុម​ស្រាវជ្រាវ ចេញ​ផ្សាយ​របាយការណ៍​ពី​ការ​កាប់​ឈើ ខណៈ​ក្រសួង​បរិស្ថាន​ថា​ ការ​ស្រាវជ្រាវ​នៅ​ស្ទើរ​ហើយ​ទាមទារ​ឲ្យ​កែ​សិន

របាយការណ៍ស្តីពីការកាប់ឈើខុសច្បាប់ ក្នុងខេត្តរតនគិរី និងស្ទឹងត្រែង ក្នុងប្រទេសកម្ពុជា។
របាយការណ៍ស្តីពីការកាប់ឈើខុសច្បាប់ ក្នុងខេត្តរតនគិរី និងស្ទឹងត្រែង ក្នុងប្រទេសកម្ពុជា។ RFI

ក្រុម​កិច្ច​ការ​ស្រាវជ្រាវ ដោយ​សហការ​ជាមួយ​នឹង​អង្គការ​ក្រៅ​រដ្ឋាភិបាល​មួយ​ចំនួន នៅ​ព្រឹក​ពុធ ទី​២៦​សីហា​នេះ បាន​ចេញ​ផ្សាយ​ជា​ផ្លូវ​ការ​នូវ​របាយការណ៍​មួយ ស្តី​ពី​ការ​កាប់​ឈើ​ខុស​ច្បាប់​ជា​ប្រព័ន្ធ ការ​បំផ្លាញ​ព្រៃឈើ​រដ្ឋ និង​តំបន់​ការពារ ក្នុង​ខេត្ត​រតនគិរី និង​ខេត្ត​ស្ទឹងត្រែង។ ជា​របាយការណ៍​ផ្តោត​សំខាន់​លើ​ការ​កាប់​ឈើ របស់​ក្រុមហ៊ុន​ទ្រី​ភាព​គ្រុប ដែល​តំណាង​ភាគី​រដ្ឋាភិបាល យល់​ថា​មាន​លក្ខណៈ​មិន​ទាន់​ស៊ី​ជម្រៅ ហើយ​ទាមទារ​ឲ្យ​កែ​តម្រូវ​នូវ​និន្នន័យ​មួយ​ចំនួន​សិន មុន​ចេញ​ផ្សាយ។ ប៉ុន្តែ​ក្រុម​ស្រាវជ្រាវ​បញ្ជាក់​ថា គេ​អាច​កែ​ត្រឹម​អក្ខរាវិរុទ្ធ​ប៉ុណ្ណោះ ហើយ​ចំពោះ​ស្ថិតិ និង​ទន្និន័យ គឺ​គេ​បាន​ស្រាវជ្រាវ​យ៉ាង​លម្អិត មាន​ភស្តុតាង​គ្រប់​គ្រាន់ ល្មម​នឹង​អាច​ចេញ​ផ្សាយ​ជា​ផ្លូវ​ការ​បាន ដោយ​មិន​បាច់​កែប្រែ​អ្វី​ទាំង​អស់។

ផ្សាយពាណិជ្ជកម្ម

របាយការណ៍​កម្រាស់​ប្រមាណ​ជាង​ ១២០​ទំព័រ​របស់​ក្រុមកិច្ច​ការ​ស្រាវជ្រាវ​ ដែល​បាន​ស៊ើប​អង្កេត​ដោយ​សម្ងាត់​ពី​សកម្មភាព​នានា​របស់​ក្រុមហ៊ុន​ទ្រី ភាព​គ្រុប បាន​រក​ឃើញ​ថា ក្រុមហ៊ុន​ទ្រីភាព​គ្រុប នៅ​ក្នុង​ខេត្ត​រតនគិរី និង​ស្ទឹងត្រែង បាន​រំលោភ​លើ​ច្បាប់​នៃ​ប្រទេស​កម្ពុជា និង​ច្បាប់​អន្តរជាតិ​ ក្រោម​មធ្យោបាយ​ជា​ច្រើន រួម​មាន​ការ​កិបកេង​បន្លំ​ពន្ធ​លើ​ប្រាក់​ចំណូល​ថវិកា​រដ្ឋ និង​ការ​ប្រឹក្សា​យោបល់​ចំពោះ​ការ​ផ្តល់​កិច្ច​សន្យា​កាប់​ឈើ ការ​កាប់​ឈើ និង​ការ​ធ្វើ​ឯកសារ​ក្លែង​បន្លំ​ជា​ដើម។ ក្នុង​របាយការណ៍​នេះ ក៏​មាន​ការ​​បង្ហាញ​ពី​រចនាសម្ព័ន្ធ ការ​ចែកចាយ និង​ដឹកជញ្ជូន​ឈើ​ប្រណិត ថៅកែ​ឈើ និង​មេការ​នានា​របស់​ក្រុម​ហ៊ុនទ្រីភាព​នេះ​ទៀត​ផង។

ឆ្លង​តាម​ការ​ស្រាវជ្រាវ ក្រុម​នេះ ថែម​ទាំង​ហ៊ាន​អះអាង​ក្នុង​របាយការណ៍​របស់​ខ្លួន​ទៀត​ថា សកម្មភាព​កាប់​ឈើ​ទាំង​នេះ មាន​ការ​គាំទ្រ​ដោយ​រដ្ឋាភិបាល អាជ្ញាធរ​មិន​អនុវត្ត​ច្បាប់ ឬ​អនុវត្ត​ច្បាប់​ការពារ​ព្រៃឈើ​តិចតួច​បំផុត។ ហើយ​ប៉ូលិស ទាហាន ប៉េអឹម មន្ត្រី​បរិស្ថាន ទាហាន​ការពារ​ព្រំដែន អាជ្ញាធរ​មូលដ្ឋាន ​និង​សហគមន៍​ព្រៃឈើ​មួយ​ចំនួន ក៏​បាន​ចូលរួម​ពាក់ព័ន្ធ​តាម​ដំណាក់​កាល​ជា​ច្រើន ក្នុង​ខ្សែ​សង្វាក់​រក​ស៊ី​កាប់​ឈើ​ផង​ដែរ។

លើស​ពី​នេះ ក្រុម​នេះ ក៏​បាន​បង្ហាញ​ពី​ស្ថិតិ និង​ទិន្នន័យ​ជាក់​លាក់​ពី​ក្រុមហ៊ុន​សម្បទាន​ដី​សេដ្ឋកិច្ច និង​ទំហំ​ដី​ជា​ច្រើន ដែល​បាន​បាត់​បង់​ព្រៃឈើ ដោយសារ​តែ​សកម្មភាព​របស់​ក្រុមហ៊ុន​ទាំង​នេះ​ផង​ដែរ។ ប៉ុន្តែ​ផ្ទុយ​ពី​ការ​បង្ហាញ​នៅ​ក្នុង​របាយការណ៍ តំណាង​ក្រសួង​បរិស្ថាន ដែល​បាន​ចូលរួម​ក្នុង​ពិធី​ផ្សាយ​របាយការណ៍​នេះ បាន​អះអាង​ថា ស្ថិតិ និង​ទិន្នន័យ ជា​ពិសេស​ភស្តុតាង ដែល​បង្ហាញ​ក្នុង​របាយការណ៍​ មាន​លក្ខណៈ​មិន​គ្រប់​ជ្រុង​ជ្រោយ មិន​ស៊ី​ជម្រៅ និង​ខ្វះ​ការ​សហការ​ពី​រដ្ឋាភិបាល។

លោក​ស្រ៊ុន ដារិទ្ធិ តំណាង​ក្រសួង​បរិស្ថាន បាន​ទទួល​ស្គាល់​នៅ​ចំនុច​ខ្វះខាត ក្នុង​ការ​អនុវត្ត​ច្បាប់។ តែ​ក៏​បាន​សំណូម​ពរ​ឲ្យ​មាន​ការ​ស្រាវជ្រាវ​ជា​ថ្មី ដើម្បី​ចៀសវាង​បញ្ហា​ចោទ​ប្រកាន់​តាម​ផ្លូវ​ច្បាប់ ទៅ​កាន់​អ្នក​ស្រាវជ្រាវ។ លោក​ថា របាយការណ៍​ពេល​នេះ ហាក់​ដូចជា​មាន​ចេតនា​ចោទ​រដ្ឋាភិបាល ដោយ​ខ្វះ​ភស្តុតាង ដូច្នេះ​អ្នក​ស្រាវជ្រាវ អាច​នឹង​ក្លាយ​ជា​ជន​រងគ្រោះ​វិញ ប្រសិន​បើ​រក​ឃើញ​ថា មាន​ជាប់​ពាក់​ព័ន្ធ​នឹង​ការ​បរិហាកេរ្តិ៍ ការ​បន្លំ​ក្រដាស​ពន្ធ ឬ​ការ​ក្លែង​ឯកសារ​ជា​ដើម។

ជុំវិញ​បញ្ហា​នេះ លោក​សុត ពិសិដ្ឋ តំណាង​ក្រុម​ស្រាវជ្រាវ​របាយការណ៍​នេះ បាន​បញ្ជាក់​ថា ពួក​គេ​ក៏​បាន​ត្រៀម​ខ្លួន​ហើយ​ ដើម្បី​ប្រឈម​ជាមួយ​នឹង​រដ្ឋាភិបាល។ ហើយ​គេ​នឹង​មិន​កែប្រែ​អ្វី​ដែល​បាន​រក​ឃើញ​នោះ​ទេ លើក​លែង​តែ​ការ​ពិនិត្យ​លើ​អក្ខរាវិរុទ្ធ​ឡើង​វិញ។ មិន​កែប្រែ ព្រោះ​ក្រុម​ស្រាវជ្រាវ អះអាង​ថា​ បាន​ធ្វើ​ឡើង​ដោយ​ផ្អែក​លើ​ភស្តុតាង សាក្សី និង​បាន​ចំណាយ​ពេល​វេលា​យ៉ាង​យូរ លើ​ការ​វិភាគ​ផ្នែក​ច្បាប់​រួច​រាល់​ហើយ។

សូម​បញ្ជាក់​ថា ការ​ចេញ​ផ្សាយ​របាយការណ៍​នេះ ធ្វើ​ឡើង​ស្រប​ពេល​ដែល​ប្រជាសហគមន៍​មួយ​ចំនួន ​បាន​ព្យាយាម​ស្វែង​រក​អន្តរាគមន៍ ដោយសារ​មាន​ទុក​កង្វល់​ពី​ការ​បាត់បង់​ព្រៃឈើ ដែល​បាន​បណ្តាល​ឲ្យ​មាន​ការ​ប្រែ​ប្រួល​អាកាស​ធាតុ និង​ធ្វើ​ឲ្យ​ជីវភាព​របស់​ជនជាតិ​ភាគ​តិច កាន់​តែ​ក្រីក្រ។ របាយការណ៍​នា​ពេល​នេះ ក៏​ស្រប​ពេល​ដែល​រដ្ឋាភិបាល ទើប​ប្រកាស​ដក​សិទ្ធិ​ពី​ក្រុមហ៊ុន​សម្បទានដី​សេដ្ឋកិច្ច​មួយ​ចំនួន​ ដែល​មិន​មាន​សកម្មភាព​ផង​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI