ទស្សនៈព្រឹត្តិការណ៍ខ្មែរ

ព្រះ​បរម​សារីរិកធាតុ៖ អំពើ​ចោរកម្ម​និង​ការរក​ឃើញ​វិញ

សំឡេង ០៤:៣០
ព្រះ​បរម​សារីរិកធាតុ និង​ព្រះ​សុវណ្ណ​កោដ្ឋ ដែលត្រូវបានរកឃើញវិញ នៅថ្ងៃទី០៦ ខែកុម្ភៈ ឆ្នាំ២០១៤។
ព្រះ​បរម​សារីរិកធាតុ និង​ព្រះ​សុវណ្ណ​កោដ្ឋ ដែលត្រូវបានរកឃើញវិញ នៅថ្ងៃទី០៦ ខែកុម្ភៈ ឆ្នាំ២០១៤។
ដោយ៖ អ៊ឹម រចនា
២៧ នាទី

ក្នុង​ឱកាស​ពិធី​បុណ្យ​​វិសាខ​បូជា​​នៅ​​ថ្ងៃ​សុក្រ​នេះ ព្រះ​បរម​សារីរិកធាតុ ត្រូវ​ដង្ហែ​ចេញ​ពី​ព្រះ​បរម​រាជវាំង ទៅ​តម្កល់​នៅ​ព្រះ​មហា​សក្យមុនី​ចេតីយ៍​នៅ​ភ្នំ​ឧត្តុង្គ​វិញ​។ អ៊ឹម រចនា សូម​ឆ្លៀត​ពេល​នេះ រំលឹក​ឡើង​វិញ​ លំដាប់​លំដោយ​នៃ​អំពើ​ចោរកម្ម​ព្រះ​បរម​សារីរិកធាតុ​នៅ​ភ្នំ​ឧត្តុង្គ​កាល​ពី​ចុង​ឆ្នាំ​២០១៣ ការ​រក​ឃើញ​វិញ​នៅ​ក្នុង​រយៈ​ពេល​២​ខែ​បន្ទាប់​មក និង​ដំណើរការ​កាត់​សេចក្ដី​លើ​ជន​ល្មើស​នៅ​ក្នុង​សំណុំ​រឿង​នេះ​។

ផ្សាយពាណិជ្ជកម្ម

ជាង​ពីរ​ឆ្នាំ​មុន ពោល​គឺ​ពេញ​មួយ​ថ្ងៃ​ពុធ​ទី​១១​ខែ​ធ្នូ​ឆ្នាំ​២០១៣ ប្រជាពលរដ្ឋ​ខ្មែរ​ជាទូទៅ​ភ្ញាក់​ផ្អើលនិង​ហួស​ចិត្ត​យ៉ាង​ខ្លាំង នៅ​ពេល​សារព័ត៌មាន​ខ្មែរ​ទាំង​អស់​ចុះ​ផ្សាយ​ថា ព្រះ​សុវណ្ណ​កោដ្ឋ​​តម្កល់​ព្រះ​បរម​សារីរិកធាតុ​ជា​ទី​សក្ការៈ ត្រូវ​ក្រុម​ចោរ​លួច​ចេញ​ពី​ព្រះ​សក្យមុនី​ចេតិយ៍​នៅ​យប់​​ថ្ងៃ​ចន្ទ ទី​១០​ខែ​ធ្នូ​ឆ្នាំ​២០១៣​។ ភាព​ភ្ញាក់​ផ្អើល​ត្រូវ​តាម​មក​ពី​ក្រោយ​ដោយ​កំហឹង​និង​សំណួរ​ជា​ច្រើន​៖ តើ​នរណា​លួច​យក​ព្រះ​សារីរិកធាតុ? លួច​ដើម្បី​អ្វី?  និង​ជា​ពិសេស លួច​ដោយ​របៀប​ណា ខណៈ​ ព្រះ​សក្យមុនី​ចេតិយ៍​មាន​ឆ្មាំ​យាមជាង​២០​នាក់​?

ភ្លាម​ៗ​បន្ទាប់ពី​ព្រះ​បរម​សារីរិកធាតុ​ត្រូវ​បាន​លួច​យក​ទៅ​បាត់ គណៈកម្មការ​ចម្រុះ​មួយ​ត្រូវ​បាន​បង្កើត​ឡើង ដើម្បី​ធ្វើ​ការ​ស៊ើប​អង្កេត​រឿង​នេះ​។ គណៈកម្មការ​ចម្រុះ​នោះ​មាន​សមាសភាព​​មក​ពី ក្រសួង​មហាផ្ទៃ ក្រសួង​វប្បធម៌​និង​វិចិត្រ​សិល្បៈ ក្រសួង​ធម្មការ​និង​សាសនា អាជ្ញាធរ​ខេត្ត​កណ្ដាល​និង​ស្រុក​ពញាឭ​។

ពីរ​ខែ​បន្ទាប់​ពី​នោះ គឺ​នៅ​ថ្ងៃ​ទី​៦​ខែ​កុម្ភៈ​ឆ្នាំ​២០១៤ ព្រះ​សារីរិកធាតុ​និង​វត្ថុ​មាន​តម្លៃ​មួយ​ចំនួន​ទៀត​ត្រូវ​បាន​សមត្ថកិច្ច​កម្ពុជា​រក​ឃើញ​វិញ​ នៅ​ខេត្ត​តាកែវ។ សមត្ថកិច្ច​បាន​ឃាត់​ខ្លួន​អ្នក​ពាក់​ព័ន្ធ​ចំនួន​២​នាក់​។ ម្នាក់​ជា​បុរស​ដែល​បាន​សារភាព​ថា ខ្លួន​ជា​អ្នក​កាត់​សោរ​ព្រះ​សក្យមុនី​ចេតិយ៍​ដើម្បី​លួច​កោដ្ឋ​ដែល​ដាក់​ព្រះ​សារីរិកធាតុ និង​ព្រះ​ពុទ្ធ​អង្គ​ធ្វើ​ពី​មាស​។ ម្នាក់​ទៀត​ជា​ស្ដ្រី​មាន​មុខ​របរ​ទិញ​លក់​មាស​នៅ​ក្នុង​ផ្សារ​ខេត្ត​តាកែវ​។ អ្នក​ទាំង​ពីរ​ត្រូវ​បាន​តុលាការ​ចោទ​ប្រកាន់​​និង​បញ្ជូន​ទៅ​កាន់​ពន្ធនាគារ ទាក់ទិន​នឹង​ការ​លួច​និង​ទិញ​ព្រះ​សុវណ្ណកោដ្ឋដាក់​ព្រះ​បរម​សារីរិកធាតុ ព្រម​ទាំង​​វត្ថុ​មាន​តម្លៃ​ផ្សេង​ទៀត​ពី​ព្រះ​សក្យមុនី​ចេតិយ៍​ភ្នំ​ឧត្តុង្គ​។

ក្រៅ​ពី​អ្នក​ទាំង​ពីរ​នេះ ឆ្មាំ​យាម​នៅ​ភ្នំ​ឧត្តុង្គ​ចំនួន​៤​នាក់ ព្រម​ទាំង​អ្នក​ភូមិ​ម្នាក់​ក៏​ត្រូវ​បាន​ឃាត់​ខ្លួន ដើម្បី​ធ្វើ​ការ​សាកសួរ​ពាក់ព័ន្ធ​នឹង​សំណុំ​រឿង​នេះ​​ផង​ដែរ​។ ក្រោយ​ការ​ស៊ើប​អង្កេត តុលាការ​សម្រេច​លើក​លែង​ការ​ចោទ​ប្រកាន់​និង​ដោះ​លែង​​អ្នក​ភូមិ​ម្នាក់​បន្ទាប់​ពី​ជាប់​ពន្ធនាគារ​បាន​២​ឆ្នាំ ខណៈ​ឆ្មាំ​យាម​ទាំង​៤​នាក់ រួម​ទាំង​បុរស​ជា​ជន​ដៃ​ដល់ ត្រូវ​បាន​តុលាការ​សម្រេច​ផ្ដន្ទាទោស​ដាក់​ពន្ធនាគារ​ម្នាក់​ៗ​៧​ឆ្នាំ និង​ពិន័យ​ជា​ប្រាក់​ចំនួន​៨​លាន​រៀល​។ ដោយ​ឡែក ស្ដ្រី​ជា​អាជីវករ​ទិញ​ដូរ​មាស តុលាការ​សម្រេច​ផ្ដន្ទាទោស​ដាក់​ពន្ធនាគារ​២​ឆ្នាំ​កន្លះ​។

​ដោយ​ឡែក ព្រះ​បរម​សារីរិកធាតុ​​ និង​វត្ថុ​មាន​តម្លៃ​ច្រើន​ទៀត​ដែល​រក​ឃើញ ត្រូវ​បាន​ដង្ហែ​យក​ទៅ​តម្កល់​នៅ​ក្នុង​ព្រះ​បរម​រាជវាំង រង​ចាំ​ពេល​វេលា​ល្អ​ណាមួយ​ដើម្បី​ដង្ហែ​ទៅ​កាន់​ភ្នំ​ឧត្តុង្គ​​វិញ។

ជា​ការ​កត់​សម្គាល់ បើ​ទោះ​បី​ជា​ព្រះ​បរម​សារីរិកធាតុ​ត្រូវ​បាន​រក​ឃើញ​វិញ​ហើយ​ក៏​ដោយ ក៏​មជ្ឈដ្ឋាន​មួយ​ចំនួន​បាន​សម្ដែង​មន្ទិល​សង្ស័យថា កោដ្ឋ​តម្កល់​ព្រះ​សារីរិកធាតុ​ដែល​បាន​រក​ឃើញ​នោះ អាច​ជា​កោដ្ឋ​ក្លែង​ក្លាយ ហើយ​ជន​ដែល​ត្រូវ​ចាប់​ខ្លួន​នោះ អាច​ជា​អ្នក​ដែល​គេ​ឲ្យ​ទទួល​ទោស​ជំនួស​អ្នក​ដទៃ​។ ប៉ុន្តែ​ទាំង​មន្ដ្រី​រដ្ឋាភិបាល ទាំង​មន្ដ្រី​សង្ឃ សុទ្ធ​តែ​បាន​បញ្ជាក់​ថា ព្រះ​សុវណ្ណកោដ្ឋ​និង​ព្រះ​បរម​សារីរិកធាតុ​នៃ​ព្រះ​សម្មាសម្ពុទ្ធ​ដែល​រក​ឃើញ​វិញ​នោះ ឥត​មាន​ប្រែ​ប្រួល​អ្វី​ទេ ដោយ​សារ​ជន​ល្មើស​មិន​បាន​កែទម្រង់​វត្ថុ​ទាំង​ពីរ​មុខ​នេះ​ឡើយ​។

ព្រះ​បរមសារីរិក​ធាតុ ត្រូវ​បាន​នាំ​មក​ដល់​ប្រទេស​កម្ពុជា​ក្នុង​ឆ្នាំ ១៩៥៧ ពី​ប្រទេស​សេរី​លង្កា ដោយ​អតីត​ព្រះ​មហាវីរក្សត្រ ព្រះ​បរម​រតនកោដ្ឋ នរោត្តម សីហនុ​។ ជា​ព្រះ​សារីរិកធាតុ ដែល​មាន​ទំហំ​ប៉ុន​កំណាត់​គ្រាប់​សណ្ដែក​បាយ មាន​សម្បុរ​ដូច​មាស​។ ព្រះ​អង្គ​បាន​ធ្វើ​ពិធី​ដង្ហែ​ព្រះសារីរិកធាតុ ពី​ព្រះ​សក្យមុនី​ចេតិយ​នៅ​ភ្នំពេញ យក​ទៅ​តម្កល់​នៅ​ព្រះ​សក្យមុនី​ចេតិយ​ថ្មី នៅ​ភ្នំ​ឧត្តុង្គ នាថ្ងៃ ទី១៩ ខែ ធ្នូ ឆ្នាំ ២០០២។

សម្រាប់​​សាធារណមតិ​ទូទៅ​ អំពើ​ចោរកម្ម​វត្ថុ​ជា​ទី​សក្ការៈ​ដ៏​ខ្ពង់ខ្ពស់​នេះ ធ្វើ​ឲ្យ​​បាត់​បង់​តម្លៃ​របស់​ជាតិ និង​ជា​ការ​អាម៉ាស់​​មួយ​នៅ​ចំពោះ​មុខ​អ្នក​កាន់​ព្រះ​ពុទ្ធសាសនា​លើ​ពិភពលោក​។ បើ​ទោះ​បី​ជា​សមត្ថកិច្ច​ស្វែង​រក​ព្រះ​បរម​សារីរិកធាតុ​ឃើញ​វិញ​ក៏​ដោយ អំពើ​ចោរកម្ម​លើក​នេះ គឺ​ជា​ភស្តុតាង​បង្ហាញ​ឲ្យ​ឃើញ​បាន​យ៉ាង​ច្បាស់​អំពី​ការ​ធ្វេស​ប្រហែស​របស់​អាជ្ញាធរ​ ដែល​មិន​មាន​វិធាន​ការ​ការពារ​ទុក​ជាមុន​។

ត​ទៅ​នេះ ព្រះ​បរម​សារីរិកធាតុ គួរ​តែ​ត្រូវ​បាន​តម្កល់ទុក ក៏​ដូច​ជា​​ថែរក្សា​យ៉ាង​ម៉ត់ចត់​​និង​​ប្រយ័ត្ន​ប្រយែង​។ ការ​បាត់​បង់​ណា​មួយ​បន្ទាប់​ពី​នេះ គឺ​ជា​ការ​ទទួល​ខុស​ត្រូវ​ទាំង​ស្រុង​របស់​អាជ្ញាធរ ដែលនឹង​​ត្រូវ​សង​មក​វិញ​ដោយ​តម្លៃ​ខ្ពស់​បំផុត​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI