ទស្សនៈព្រឹត្តិការណ៍ខ្មែរ

ការ​កក​ស្ទះ​ចរាចរណ៍​ជា​ឧបសគ្គ​ចំបង​ក្នុង​ការ​បញ្ជូន​អ្នក​ជំងឺ​ ឬ​អ្នក​របួស​ដោយ​រថយន្ត​សង្គ្រោះ

សំឡេង ០៥:៥១
ចរាចរណ៍​ស្ទះ ដោយសារ​អ្នក​បើកបរ​​មិន​គោរព​ច្បាប់​ និង​ខ្វះ​សីលធម៌​។
ចរាចរណ៍​ស្ទះ ដោយសារ​អ្នក​បើកបរ​​មិន​គោរព​ច្បាប់​ និង​ខ្វះ​សីលធម៌​។ @Troll Page

ឥរិយាបទ​ដែល​ជា​ទម្លាប់​របស់​អ្នក​បើកបរ​មួយ​ចំនួន ធ្វើ​ឲ្យ​ប៉ះពាល់​ទៅ​ដល់​សិទ្ធិ​អត្ថិភាព​របស់​រថយន្ត​សង្គ្រោះ​បន្ទាន់។ កង្វះ​ខាត​ការ​យល់​ដឹង​ពី​សិទ្ធិ​អត្ថិភាព​របស់​រថយន្ត​សង្គ្រោះ​លើ​វិស័យ​សុខាភិបាល​នេះ បាន​ធ្វើ​ឲ្យ​ប៉ះពាល់​ដល់​ការ​បញ្ជូន​អ្នក​ជំងឺ ឬ​អ្នក​របួស​ទៅ​កាន់​មន្ទីរពេទ្យ។ ទាំង​នេះ​ក៏​ដោយសារ​តែ ការ​មិន​គោរព​ច្បាប់​ចរាចរណ៍ និង​ការ​យល់​ដឹង​ពី​សិទ្ធិ​អត្ថិភាព​នៅ​មាន​កម្រិត។

ផ្សាយពាណិជ្ជកម្ម

រយៈពេល​២៤​ម៉ោង​ជា​ពិសេស​នៅ​រាជធានី​ភ្នំពេញ ជា​កន្លែង​ប្រមូល​ផ្តុំ​មនុស្ស​ម្នា​ចំរុះ​ព័ណ៌​ មាន​ពេល​តិច​តួច​ណាស់​ ដែល​ស្ងប់​សម្លេង​សេរ៉ែនឡាន​ពេទ្យ។ មិន​ចាញ់​គ្នា​ប៉ុន្មាន​ទេ សេរ៉ែនឡាន​ទឹក​ក៏​កើត​មាន​ញឹក​ញាប់​ផង​ដែរ។

​ក៏​ប៉ុន្តែ​អ្វី​ដែល​ជា​ការ​ចាប់​អារម្មណ៍​នោះ​គឺ ឡាន​ពេទ្យ ឬ​រថយន្ត​សង្គ្រោះ​បន្ទាន់​របស់​មន្ទីរ​ពេទ្យ​ ឬ​ហៅ​សាមញ្ញ​ថា ឡាន​សាមុយ។ ជា​ញឹកញាប់​គេ​ឃើញ​រថយន្ត​សង្គ្រោះ​របស់​មន្ទីរ​ពេទ្យ បាន​ជាប់​នៅ​កណ្តាល​ហ្វូង​រថយន្ត​ដទៃ​ទៀត ដែល​មាន​សភាព​ត្រៀបត្រា​នៅ​លើ​ទ្រូង​ផ្លូវ។ សេរ៉ែន​ប្រឹង​ស្រែក ភ្លើង​ព័ណ៌​ក្រហម-ខៀវ ប្រឹង​វិល​ក្រឡុក មើល​ទៅ​ក្នុង​រថយន្ត​វិញ មាន​ព្យួរ​សេរ៉ូម​រណេង​រណោង អម​ដោយ​សាច់​ញាតិ​ជន​រងគ្រោះ ឈរ​ច្រូង​ច្រាង។

សាច់​ញាតិ​អ្នក​ជំងឺ បន់​ឲ្យ​តែ​ឡាន​ទៅ​ដល់​មន្ទីរពេទ្យ​បាន​ឆាប់​រហ័ស ដើម្បី​ផ្តល់​ក្តី​សង្ឃឹម​ដល់​អ្នក​ជំងឺ​ឬ​អ្នក​របួស​ជាក់​លាក់​មួយ។ តែ​ពេល​ខ្លះ ចំងាយ​ផ្លូវ​មួយ​គីឡូ​ម៉ែត្រ ប្រៀប​បាន​នឹង​១០ ឬ២០​គីឡូម៉ែត្រ​ដូច្នេះ​ដែរ ដោយសារ​តែ​ការ​កក​ស្ទះ និង​មិន​មាន​ភាព​អនុ​គ្រោះ​ណាមួយ ដែល​អាច​ឲ្យ​រថយន្ត​សង្គ្រោះ ធ្វើ​ដំណើរ​ទៅ​មុខ​បាន​ដោយ​ស្រួល​ និង​មាន​សុវត្ថិភាព។ ស្ថានភាព​បែប​នេះ ពេល​ខ្លះ​ធ្វើ​ឲ្យ​អ្នក​ជំងឺ​ឬ​អ្នក​របួស​ប្រឈម​នឹង​សភាព​ធ្ងន់ធ្ងរ និង​អាច​បាត់បង់​ជីវិត​កណ្តាល​ផ្លូវ​ក៏​មាន។

តើ​មាន​ហេតុផល​អ្វីខ្លះ​បាន​ជា​ប្រទេស​កម្ពុជា​មាន​សេវា​រថយន្ត​សង្គ្រោះ​ដូចជា​ប្រទេស​ផ្សេង​ៗ​ដែរ តែ​បែរ​ជា​លទ្ធភាព​សង្គ្រោះ មើល​ទៅ​ហាក់​ដូច​ជា​មាន​ការ​លំបាក​យល់ ឬ​ចម្លែក​នោះ?

មាន​កត្តា​មួយ​ចំនួន ដែល​ជា​ការ​កត់​សម្គាល់​នៅ​ក្នុង​សង្គម​ខ្មែរ ចំពោះ​ការ​ធ្វើ​ចរាចរណ៍​តាម​ផ្លូវ​នោះ ទី​១​គឺ​ចំណេះ​ដឹង។ ជា​ការ​ពិត​អ្នក​បើកបរ​មិន​ត្រឹម​តែ​ចេះ​បើក​ឡាន​នោះ​ទេ តោង​ស្វែង​យល់​ពី​ចំណេះ​ដឹង​ផ្សេង​ពី​នេះ ដែល​ជា​ប្រយោជន៍​សាធារណៈ ​ឬ​ជា​ប្រយោជន៍​អ្នក​ដទៃ​ផង។ ជា​ទូទៅ មាន​អ្នក​បើកបរ​មួយ​ចំនួន​ក្នុង​ចំណោម​អ្នក​បើកបរ​នៅ​លើ​ទ្រូង​ផ្លូវ ដែល​បាន​ដឹង ឬ​ឃើញ​រថយន្ត​សង្គ្រោះ​មន្ទីរ​ពេទ្យ ហើយ​រមែង​មិន​អើពើ និង​មិន​បាន​ស្វះស្វែង​អែប​យាន​របស់​ខ្លួន​តាម​មធ្យោបាយ​សម​ស្រប​ណា​មួយ ទុក​គន្លង​អត្ថិភាព​ដល់​រថយន្ត​ពេទ្យ​បាន​ធ្វើ​ដំណើរ​ទៅ​មុខ​ដោយ​ងាយ​ៗ​នោះ។

ទី២ គឺ​ការ​បើកបរ​នៅ​កម្ពុជា មាន​ភាព​ឥត​សណ្តាប់​ធ្នាប់ មិន​គោរព​ច្បាប់ មិន​គោរព​សិទ្ធិ​អត្ថិភាព​អ្នក​ដទៃ ពោល​គឺ​ចង់​ទៅ​ត្រង់​តែ​ឈប់​គន្លង​ផ្លូវ​បត់​ឆ្វេង ត្រូវ​បត់​ស្តាំ​ទៅ​ឈប់​គន្លង​ផ្លូវ​អ្នក​ទៅ​ត្រង់ ឬ​សម្រាប់​អ្នក​បត់​ឆ្វេង។ ភាព​ឥត​សណ្តាប់​ធ្នាប់ មិន​គោរព​ច្បាប់​និង​សតិ​សម្បជ្ជញ្ញៈ អន់​ថយ​មួយ​ចំនួន ក្នុង​ការ​បើកបរ រួម​ផ្សំ​នឹង​ភាព​គ្មាន​ទោស នៅ​ពេល​ដែល​មាន​ការ​បង្ហាញ​ឥរិយាបទ​ខុស​ឆ្គង ឬ​មិន​អែប​ឲ្យ​រថយន្ត​អត្ថិភាព​ទៅ​មុន បាន​ក្លាយ​ជា​ទម្លាប់​ និង​ជា​ប្រពៃណី​នៅ​លើ​ទ្រូង​ផ្លូវ​ទៅ​ហើយ។

ការ​ឈប់​ភ្លើង​ស្តុប​មិន​គោរព​ទៅ​លើ​កន្លង​ផ្លូវ​ដែល​ត្រូវ​ទៅ បាន​បង្កើត​ភាព​ស្មុគស្មាញ បាត់​បង់​សណ្តាប់​ធ្នាប់​ដែល​ជា​ហេតុផល​ចំបង​នាំ​ឲ្យ​មាន​ការ​កក​ស្ទះ​ចរាចរណ៍ ស្ថានភាព​នេះ​ក៏​ជះ​ឥទ្ធិពល ទៅ​ដល់​យាន​អត្ថិភាព​ផង​ដែរ​ជា​ពិសេស​រថយន្ត​សង្គ្រោះ​របស់​មន្ទីរ​ពេទ្យ រថយន្ត​ពន្លត់​អគ្គីភ័យ និង​ម្តង​ម្កាល​ក្បួន​រថយន្ត​គណៈប្រតិភូ​ក៏​មាន​ដែរ។

ការ​បន្ទោស​ទៅ​លើ​ឥរិយាបទ​របស់​អ្នក​បើកបរ​មួយ​ចំនួន​ គឺ​ជា​ការ​ត្រឹមត្រូវ​ណាស់ ក៏​ប៉ុន្តែ​នៅ​មាន​កត្តា​រួម​ផ្សំ​មួយ​ចំនួន​ទៀត ដែល​ធ្វើ​ឲ្យ​រថយន្ត​សង្គ្រោះ​បន្ទាន់​មិន​អាច​ធ្វើ​ដំណើរ​ទៅ​មុខ​ប្រកប​ដោយ​អត្ថិភាព និង​សុវត្ថិភាព នោះ​គឺ​កត្តា​ផ្លូវ​ថ្នល់។ ផ្លូវ​ថ្នល់​នៅ​ស្រុក​ខ្មែរ​ជា​ពិសេស​ទីក្រុង​ភ្នំពេញ ដែល​ជា​ទីក្រុង​មាន​វ័យ​ចំណាស់ សំបូរ​ដោយ​ផ្លូវ​តូច​ៗ ពិត​ជា​មិន​សមមូល​ទៅ​នឹង​ចំនួន​ប្រជាពលរដ្ឋ។ ១ភាគ២ ឬ​១​ភាគ​៣​នៃ​ផ្លូវ​តូច​ៗ​ត្រូវ​បាន​ប្រើប្រាស់​ជា​ចំណត​ និង​អាជីវកម្ម។

ស្ថានភាព​ផ្លូវ​តូច​ចង្អៀត​បែប​នេះ ពេល​ខ្លះ​មិន​មាន​គន្លង​ផ្លូវ​ណា​សេសសល់​សម្រាប់​សម្រួល​ឲ្យ​រថយន្ត​សង្គ្រោះ​បន្ទាន់​បើកបរ​ទៅ​មុខ​ក៏​ថា​បាន​ដែរ។ ហេតុ​នេះ​ការ​សង្គ្រោះ​តាម​រយៈ​រថយន្ត​សាមុយ​ ដើម្បី​បញ្ជូន​អ្នក​ជំងឺ​ ឬ​អ្នក​របួស​ទៅ​កាន់​មន្ទីរពេទ្យ​ពិត​ជា​ប្រឈម​នឹង​ហានិភ័យ​ខ្ពស់ នៅ​ពេល​ដែល​មាន​ចរាចរណ៍​ណែនណាន់​តាន់​តាប់​ ពិសេស​នៅ​ពេល​ថ្ងៃ ហើយ​មិន​មាន​ជម្រើស​ណា​ផ្សេង​ក្រៅ​ពី​រំកិល​បន្ត​កន្ទុយ​គ្នា​នៅ​ពេល​ដែល​មាន​ការ​កក​ស្ទះ។

ដូច្នេះ ដើម្បី​សម្រួល​ឲ្យ​មាន​សិទ្ធិ​អត្ថិភាព​ពិត​ប្រាកដ​ដល់​រថយន្ត​សង្គ្រោះ ចាំ​បាច់​ត្រូវ​មាន​ការ​អប់រំ ណែនាំ ផ្សព្វផ្សាយ បន្ថែម​ទៀត ដោយ​មាន​ការ​បញ្ច្រៀត​ចូល​បញ្ហា​នេះ​ទៅ​ដល់​សិស្ស ​និស្សិត ឲ្យ​បាន​ច្បាស់លាស់​នៅ​តាម​សាលា។ បង្កើន​ការ​អប់រំ​ផ្សព្វផ្សាយ​ជា​សាធារណៈ​ដល់​ប្រជាពលរដ្ឋ​ទូទៅ និង​ចាត់​ទុក​បញ្ហា​សិទ្ធិ​អត្ថិភាព​នៅ​លើ​ទ្រូង​ផ្លូវ​នេះ​ជា​បញ្ហា​សំខាន់។

លើស​ពី​នេះ អ្វី​ដែល​មិន​អាច​បន្ធូរ​ដៃ​បាន​នោះ​ គឺ​ដំណើរ​ឆ្ពោះ​ទៅ​មុខ​ក្នុង​ការ​រឹត​បន្តឹង​នៃ​ការ​អនុវត្ត​ច្បាប់​ចរាចរណ៍​ផ្លូវ​គោក។ ការ​អប់រំ ផ្សព្វផ្សាយ​បន្ថែម បូក​នឹង​ការ​រឹត​បន្តឹង​ច្បាប់​ចរាចរណ៍​អាច​ជា​ក្តី​សង្ឃឹម​មួយ​ក្នុង​ការ​ជួយ​កែប្រែ​ឥរិយាបទ​ និង​ការ​ប្រព្រឹត្តិ​របស់​អ្នក​បើកបរ​ខ្មែរ​មួយ​ចំនួន ដែល​មាន​ឥរិយាបទ​យ៉ាប់​យ៉ឺន ឲ្យ​មាន​ការ​ផ្លាស់​ប្តូរ និង​វិល​ទៅ​រក​ការ​គោរព​ច្បាប់។ ជាមួយ​គ្នា​នេះ​រដ្ឋាភិបាល​ក៏​ត្រូវ​យក​ចិត្ត​ទុក​ដាក់​ផង​ដែរ ពី​ការ​រៀបចំ​សណ្តាប់​ធ្នាប់​លើ​ផ្លូវ​ថ្នល់ ចៀស​វាង​ការ​រិះ​គន់​ថា​ «និយាយ​ហើយ​មិន​ព្រម​ធ្វើ ឬ​ក៏​ធ្វើ​ក្នុង​កម្រិត​មួយ​ដែល​យឺត​យ៉ាវ»៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI