កម្ពុជា-នយោបាយ

អង្គ​ការ​លើក​លែង​ទោស​អន្តរ​ជាតិ​ទទូច​ឱ្យ​បញ្ឈប់​ការ​យា​យី​សកម្ម​ជន​បក្ស​ប្រ​ឆាំង​ដែល​ភៀស​ខ្លួន​ទៅ​ថៃ​

លោក សួន ចំរើន
លោក សួន ចំរើន @ សួន ចំរើន

អង្គការ​លើក​លែង​ទោស​អន្តរជាតិ​កាល​ពី​ម្សិល​មិញ បាន​ទទូច​ឱ្យ​រដ្ឋាភិបាល​កម្ពុជា​បញ្ឈប់​ការ​តាម​យា​យី​ទៅ​លើ​​សកម្មជន​គណ​បក្ស​ប្រឆាំង​ដែល​ភៀស​ខ្លួន​ផ្នែក​នយោបាយ​ទៅ​សំចត​នៅ​ប្រទេស​ថៃ​ដើម្បី​ស្វែង​រក​សិទ្ធិ​ជ្រក​កោណ​។ ​ការ​ទទួច​បែប​នេះ​ គឺ​បន្ទាប់​ពី​​សកម្មជន​អតីត​គណ​បក្ស​សង្រ្គោះជាតិ​ម្នាក់​​ត្រូវ​បាន​ជន​ស្លៀក​ពាក់​ស៊ីវិល​វាយ​ប្រហារ​លើ​រាង​កាយ​នៅ​ទីក្រុង​បាងកក​ កាល​ពី​យប់​ថ្ងៃ​ទី​២២​ ធ្នូ​ ​ហើយ​ដែល​ជន​​រង​គ្រោះ​អះអាង​ជា​កម្លាំង​សម្ងាត់​របស់​អាជ្ញាធរ​កម្ពុជា​បញ្ជួន​ទៅ​។

ផ្សាយពាណិជ្ជកម្ម

«អាជ្ញាធរ​កម្ពុជា​ត្រូវ​តែ​បញ្ឈប់​ការ​យាយី​និង​ការ​បំភិត​បំភ័យ​ជា​បន្ទាន់​ទៅ​សកម្មជន​គណ​បក្ស​សង្គ្រោះជាតិ​ដែល​ត្រូវ​បាន​រំលាយ​ ខណៈ​សកម្មជន​សំខាន់ៗ​នៃ​គណ​បក្ស​ប្រឆាំង​នេះ​ កំពុង​សំចត​នៅ​ប្រទេស​ថៃ​ដើម្បី​ស្វែង​រក​សិទ្ធិ​ជ្រក​កោណ»។​ នេះ​គឺ​ជា​លើក​ឡើង​នៅ​ក្នុង​សេចក្តី​ថ្លែង​ការណ៍​របស់​អង្គការ​លើក​លែង​ទោស​អន្តរជាតិ​ថ្ងៃ​ទី​២៧​ខែ​ធ្នូ​។

អង្គការ​ដដែល​គូស​បញ្ជាក់​ថា ខ្លួន​បាន​ទទួល​ព័ត៌​មាន​ថា​លោក​សួន ចំរើន អាយុ ៣៧ ឆ្នាំ​ជា​សកម្មជន​គណ​បក្ស​សង្រ្គោះ​ជាតិ​ប្រចាំ​ខេត្ត​បាត់​ដំបង ត្រូវ​រង​ការ​វាយ​ប្រហារ​ដោយ​បុរស​២នាក់​មក​លើ​រាង​កាយ​និង​ប៉ុន​ប៉ង​ចាប់​ដាក់​រថយន្ត​បញ្ជួន​មក​កម្ពុជា​វិញ​។​ លោក សួន ចំរើន ដែល​មាន​ស្នាម​ជាំ​លើ​រាង​ការយ បាន​អះអាង​ថា កាល​ពី​ម៉ោង ៩​កន្លះ យប់​ថ្ងៃ​ទី​២២​ ធ្នូ ​មាន​បុរស​ ២​នាក់​បាន​អះអាង​ថា ​ពួក​គេ​ជា​ប៉ូលិស​ខ្មែរ​ បាន​យក​ដំបង​ឆក់​កញ្ចឹង​ក​ និង​វាយ​ដំ​មក​​លើ​រូប​លោក​ជា​ច្រើន​កន្លែង ​ហើយ​ចាប់​បង្ខំ​រូប​លោក​ឱ្យ​ចូល​ក្នុង​រថយន្ត​ដែល​នៅចាំ​ក្បែនោះ​ដើម្បី​បញ្ជូន​ត្រឡប់​ទៅ​កម្ពុជា​វិញតែ​លោក​បាន​ស្រែក​ឲ្យ​គេ​ជួយ​ទាន់ពេល​។

បើ​តាម​អង្គការ​លើក​លែង​ទោស​អន្តរ​ជាតិ​ លោក ចំរើន គឺ​មនុស្ស​ម្នាក់​ក្នុង​ចំណោម​សកម្មជន​៣៩​នាក់​ដែល​ត្រូវ​បាន​ក្រសួង​ការ​បរទេស​កម្ពុជា​មោឃៈ​ភាព​ចោល​លិខិត​ឆ្លងដែន​របស់ពួកគេ​ ហើយ​ក៏​ជា​មនុស្ស​ម្នាក់​ក្នុង​ចំណោម​មន្ត្រី​ជាន់​ខ្ពស់​បក្ស​ប្រឆាំង​១៨​នាក់​ ដែល​ត្រូវ​បាន​ស្វែង​រក​ចាប់​ខ្លួន ក្រោម​ការ​ចោទ​ប្រកាន់​ពី លោក ហ៊ុន សែន ថា​ក្បត់​ជាតិ​។​ នេះ​បើ​តាម​Amnesty International។

ក្រៅពី​ទទួច​ដល់​អាជ្ញាធរ​កម្ពុជា​ឲ្យ​បញ្ឈប់​ការ​យាយី​លើ​សកម្មជន​បក្ស​ប្រ​ឆាំង​ដែល​រត់​ទៅ​ប្រទេស​ថៃ​ អង្គការ​នេះ ក៏​ទទួច​ឲ្យ​អាជ្ញាធរ​ថៃ ត្រូវ​តែ​ធានា​សុវត្ថិភាព​របស់​សកម្មជន​ទាំង​នោះ ​និង​មិន​ត្រូវ​បាន​ចាប់​ខ្លួន​តាម​ទំនើង​ចិត្ត​នោះ​ទេ។

សម្រាប់​អាជ្ញាធរ​កម្ពុជា​បាន​អះអាងថា​សមត្ថកិច្ច​កម្ពុជា​មិន​អាច​ទៅ​ចាប់​ខ្លួន​សកម្មជន​បក្ស​ប្រឆាំង​ដែល​រត់​ភៀស​ខ្លួន​នោះ ​នៅ​លើ​ទឹកដី​ថៃ​បាន​ឡើយ​ ហើយ​ថា​វា​ជា​ការ​ចោទ​ប្រកាន់​គ្មាន​មូលដ្ឋាន​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI