សភាពាណិជ្ជកម្មកម្ពុជា-ចិន បដិសេធ«ផ្ទុះកូរ៉ូណាថ្មី»នៅតំបន់សេដ្ឋកិច្ចពិសេសខេត្តព្រះសីហនុ
ចុះផ្សាយនៅថ្ងៃ៖ កែប្រែថ្ងៃទី៖
សភាពាណិជ្ជកម្មកម្ពុជា-ចិន ម្សិលិញនេះ បានបដិសេធចោលនូវការបង្ហោះលិខិតរបស់សមាគមចិនមួយនៅខេត្តព្រះសីហនុ ដែលមានខ្លឹមសារថា មានករណីសង្ស័យផ្ទុកមេរោគ«កូរ៉ូណា»ទៅលើជនជាតិពីរនាក់នៅក្នុងតំបន់សេដ្ឋកិច្ចពិសេសក្រុងព្រះសីហនុ។ ប៉ុន្តែគេបានទទួលស្គាល់ថា ក្នុងចំណោមជនជាតិចិនទាំងពីរនាក់នោះគឺមានម្នាក់កំពុងតែមានអាការៈក្អកជាច្រើនថ្ងៃមកហើយ ហើយត្រូវបានដាក់នៅដាច់ដោយឡែកពីគេ។
តាមរយៈសេចក្តីថ្លែងការណ៍នៅថ្ងៃទី៧ខែកុម្ភៈ សភាពាណិជ្ជកម្មកម្ពុជា-ចិន ប្រចាំខេត្តព្រះសីហនុ បានចាត់ទុកខ្លឹមសារលិខិតរបស់សមាគមសហព័ន្ធពាណិជ្ជកម្មខេត្តព្រះសីហនុ ដែលបង្ហោះតាមWECHAT នោះថាជាព័ត៌មានក្លែងក្លាយ។
យ៉ាងណាក៏ដោយ ក្រោយពីទទួលព័ត៌មាននេះ សភាពាណិជ្ជកម្មកម្ពុជា-ចិន នៅខេត្តព្រះសីហនុ បានសហការជាមួយក្រុមហ៊ុន សីហនុវីល ក្នុងតំបន់សេដ្ឋកិច្ចពិសេសក្រុងព្រះសីហនុ ចុះទៅស្វែងយល់ស្ថានភាពជាក់ស្តែង។ បន្ទាប់ពីផ្ទៀងផ្ទាត់យ៉ាងយកចិត្តទុកដាក់ សភាពាណិជ្ជកម្មកម្ពុជា-ចិន ប្រចាំខេត្តនេះ អះអាងថា មិនមានករណីឆ្លងមេរោគកូរ៉ូណាទៅលើជនជាតិពីរនាក់បន្ថែមទៀតទេ។ នេះបើតាមសេចក្តីថ្លែងការណ៍ដដែល។
ក្នុងសេចក្តីថ្លែងការណ៍នោះក៏បដិសេធផងដែរ ថា ជនជាតិចិនពីរនាក់នោះ មិនមែនមកកម្ពុជានៅថ្ងៃទី២៣ ខែមករាដូចមាននៅក្នុងលិខិតអះអាងទេ ពោលគឺម្នាក់មកកម្ពុជានៅថ្ងៃទី១ ខែកុម្ភៈ និងម្នាក់ទៀតមកនៅថ្ងៃទី៣ ខែកុម្ភៈ។ យ៉ាងណាក៏ដោយ ជនជាតិចិនទាំងពីរនាក់នោះត្រូវបានដាក់ឲ្យនៅបន្ទប់ដាច់ដោយឡែក ខណៈក្នុងចំណោមនោះ គឺម្នាក់មានអាការៈមិនស្រួលក្នុងបំពងក និងក្អក តាំងពីគាត់ចេញដំណើរពីទីក្រុងគុនមីងមកកាន់ខេត្តព្រះសីហនុនៅថ្ងៃទី៣ ខែកុម្ភៈ។ ប៉ុន្តែពេលនៅប្រទេសចិនគាត់បានទៅពិនិត្យនៅមន្ទីរពេទ្យពីរដងដែរ លទ្ធផលបង្ហាញថាគាត់មិនមានផ្ទុកមេរោគ«កូរ៉ូណា»ទេ។ រហូតដល់ពេលនេះ គាត់មានសីតុណ្ហភាពរាងកាយធម្មតា ប៉ុន្តែនៅតែក្អកដដែល។ នេះជាការអះអាងរបស់សភាពាណិជ្ជកម្មកម្ពុជា-ចិន។
ចំណែកជនជាតិចិនម្នាក់ទៀតដែលមកពីទីក្រុងក្វាងចូវមកដល់ខេត្តព្រះសីហនុថ្ងៃទី១ ខែកុម្ភៈ បច្ចុប្បន្នគាត់មានសីតុណ្ហភាពរាងកាយធម្មតា តែក៏តម្រូវឲ្យនៅដាច់ដោយឡែកពីគេផងដែរ។
សូមបញ្ជាក់ថា នៅថ្ងៃទី៦ ខែកុម្ភះ សមាគមសហព័ន្ធពាណិជ្ជកម្មខេត្តព្រះសីហនុ ដែលជាបណ្តុំក្រុមហ៊ុនចិននៅខេត្តនេះ បានបង្ហោះលិខិតមួយនៅក្នុងបណ្តាញសង្គមរបស់ចិនឈ្មោះ WECHAT ដោយថា លោកZhang Junwei ដែលជាអគ្គលេខាធិការអចិន្ត្រៃយ៍ បានទទួលទូរស័ព្ទចំនួន២ខ្សែមកពី តំបន់សេដ្ឋកិច្ចពិសេសក្រុងព្រះសីហនុ ដើម្បីសុំជំនួយ ដោយអះអាងថាពួកគេមានអាការៈពិបាកដកដង្ហើម ក្អក គ្រុនក្តៅ និង សុំជំនួយជាបន្ទាន់។បន្ទាប់មកសមាគមនេះបានជូនដំណឹងជាបន្ទាន់ដល់តំបន់សេដ្ឋកិច្ចពិសេសក្រុងព្រះសីហនុ ដើម្បីធ្វើការដាក់បុគ្គលទាំងពីរនាក់នេះឲ្យដាច់ពីគេ និងត្រួតពិនិត្យឲ្យបានតឹងរឹង ព្រមទាំងរាយការណ៍ទៅស្ថានទូតចិនឱ្យបានទាន់ពេលវេលា។ ប៉ុន្តែគិតត្រឹមថ្ងៃត្រង់នេះ មិនទាន់មានប្រតិកម្មពីស្ថានទូតចិន និងក្រសួងសុខាភិបាលកម្ពុជានៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ