កម្ពុជា

ឆ្លងឆ្នាំ៖ ប៉ូលីស​ជាតិ​បង្កើន​កម្លាំង​ការពារ​និង​អំពាវនាវ​ឲ្យ​ពលរដ្ឋ​ប្រុង​ប្រយ័ត្ន

រូបភាព៖ នេះ​គឺជា​ទិដ្ឋភាព​នៃ​ការ​បាញ់​កាំ​ជ្រួច​អប​អរ​ពិធី​ឆ្លង​ឆ្នាំ​កាល​ពី​ឆ្នាំ​កន្លង​មក
រូបភាព៖ នេះ​គឺជា​ទិដ្ឋភាព​នៃ​ការ​បាញ់​កាំ​ជ្រួច​អប​អរ​ពិធី​ឆ្លង​ឆ្នាំ​កាល​ពី​ឆ្នាំ​កន្លង​មក @RFI

ប៉ូលីសជាតិ​បាន​បង្កើន​កម្លាំង​ការពារ​នៅ​ខេត្ត​គោលដៅ​ទេសចរណ៍​សំខាន់ៗ​ រួម​ទាំង​រាជធានីភ្នំពេញ​ផង ​ក្នុង​គោល​បំណង​ការ​ពារ​សុវត្ថិភាព​ជូន​ពលរដ្ឋ ​នា​ឱកាស​នៃ​ពិធី​ឆ្លង​ឆ្នាំ​នៅ​យប់ថ្ងៃ​ទី​៣១​ធ្នូ​នេះ។ អ្នក​នាំ​ពាក្យ​ប៉ូលីស​ជាតិ​ក៏​បាន​អំពាវ​នាវទៅ​ពលរដ្ឋ​ ឲ្យ​មាន​ការ​ប្រុង​ប្រយ័ត្នការពារ​សុវត្ថិ​ភាព​​ខ្លួន​ឯង​បន្ថែម​ទៀត​ផង។

ផ្សាយពាណិជ្ជកម្ម

នៅ​រាជធានី​ភ្នំពេញ​ គោល​ដៅ​កម្សាន្ត​ដ៏​ពេញ​និយម​ កោះពេជ្រ​ នឹង​ត្រូវ​ដាក់​កម្លាំង​ការពារ​រាប់រយ​នាក់ ​ហើយ​នឹង​ដាក់​ពង្រាយ​បន្ថែម​ទៀត​អាស្រ័យ​ ទៅ​លើ​ស្ថានភាព​ជាក់​ស្ដែង។

កោះពេជ្រ​គឺ​ជា​ទីកន្លែង​ប្រមូល​ផ្ដុំ​នៃ​ការ​ជួប​ជុំ​ក្នុង​ពិធី​ឆ្លង​ឆ្នាំ ​នៅ​យប់​ថ្ងៃ​សៅរ៍​នេះ ​ដោយលាយ​ឡំ​ជាមួយ​ការ​ប្រគុំ​តន្ត្រី។ ក្រៅពី​នេះ​ គោលដៅ​ផ្សេង​ទៀត​នៅ​ក្នុង​រាជធានី​ភ្នំពេញ កម្លាំង​ការពារ​នឹង​ដាក់​ពង្រាយ​បន្ទាប់​បន្សំ។ តាម​គម្រោង ​ក៏​នឹង​មាន​ការ​បាញ់​កាំជ្រួច​រាប់ថយ​ក្រោយ​នៃ​ពិធី​ឆ្លង​ឆ្នាំ​នេះ​ផង​ដែរ។

ដោយឡែក​សម្រាប់​គោល​ដៅ​នៃ​ខេត្ត​ទេសចរណ៍​សំខាន់​រួម​មាន៖ សៀមរាប ព្រះសីហនុ​ជាដើម ​គឺ​ប៉ូលីស​ជាតិ​បាន​ណែនាំ​ទៅ​បណ្ដា​ស្នង​ការ​រាជធានី​ខេត្ត ​ឲ្យ​បង្កើន​កម្លាំង​ការពារនៅ​យប់​ឆ្លង​ឆ្នាំ​នេះ។ ថ្លែង​ប្រាប់​វិទ្យុ​បារាំង​អន្តរ​ជាតិ លោក គៀត ចន្ទថារិទ្ធ អ្នក​នាំ​ពាក្យប៉ូលីសជាតិ​បាន​បង្ហើប​ពី​លទ្ធភាព​នៃ​ការ​បញ្ចេញ​កង​កម្លាំង​ការពារ​សុវត្ថិភាព​ជូន​ពលរដ្ឋ នា​ឱកាស​នៃ​ពិធី​ឆ្លង​ឆ្នាំ ​រហូត​ដល់​ទៅ​រាប់​ពាន់​នាក់​ឯណោះ។

បន្ថែម​ពី​នេះ​ទៀត ​លោក គៀត ចន្ទថារិទ្ធ បាន​អំពាវ​នាវ​ឲ្យ​ពលរដ្ឋ​ការពារ​សុវត្ថិភាពផ្ទាល់​ខ្លួន​ផង​ តាម​រយៈ​ការ​បើកបរ​ដោយ​ការ​ប្រុង​ប្រយ័ត្ន ​ទាំង​នៅ​រាជធានី​ភ្នំពេញ​ និងពលរដ្ឋ​ដែល​ធ្វើ​ដំណើរ​ទៅ​តាម​បណ្ដា​ខេត្ត។ បើ​តាម​លោក គៀត ចន្ទថារិទ្ធ ពលរដ្ឋ​ក៏ត្រូវ​មាន​ការ​ប្រុង​ប្រយ័ត្ន​ចំពោះបញ្ហា​អគ្គិភ័យ​ផង ​ព្រោះ​ថា​រដូវនេះ​ជា​រដូវ​ធ្លាក់​ខ្យល់​។ ហើយ​ចំពោះ​ការ​ដើរកម្សាន្ត​នា​ពេល​យប់​ ពិសេស​ម៉ោង​រាប់​ថយ​ក្រោយ​នៃ​ពិធី​ឆ្លង​ឆ្នាំផ្ទាល់​តែ​ម្ដង ​ត្រូវ​មាន​ការ​ប្រុង​ប្រយ័ត្ន​ចំពោះ​របស់​ប្រើ​ប្រាស់​ផ្ទាល់​ខ្លួន​ដូច​ជា ទូរសព្ទ និងកាបូប​លុយ​ជា​ដើម។

បើ​ទោះ​បី​ជា​កម្ពុជា​មិនមែន​ជា​គោល​ដៅ​នៃ​ការ​ធ្វើ​ភេរវកម្ម​ពី​សំណាក់​ភេរវករ​ដូចបណ្ដា​ប្រទេ​ស​​​មួយ​ចំនួន​នៅ​ប៉ែក​អឺរ៉ុប​ក៏​ពិត​មែន តែ​លោក គៀត ចន្ទថារិទ្ធ បាន​អះ​អាង​ថា សមត្ថកិច្ច​នៅ​តែ​ប្រុង​ប្រយ័ត្ន ​និង​ ត្រៀម​ខ្លួន​ប្រុង​ជើង​ការ​ពារ​ជា​និច្ច៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI