អានតួអត្ថបទ
កម្ពុជា

ក្រសួង​ការ​បរទេស​​​មិន​ទាន់​មាន​​វិធានការ​​អំពី​​រឿង​​វៀតណាម​​បំផ្លាញ​​ដំណាំ​​ខ្មែរ​

លោកម៉ៅ មុនីវណ្ណ​ ពេល​ចុះ​ទៅ​ត្រួត​ពិនិត្យ​ចំណុច​ដែល​កង​កម្លាំង​សមត្ថកិច្ច​វៀតណាម​នាំ​ពលរដ្ឋ​ខ្លួន​បំផ្លាញ​ដំណាំ​ពលរដ្ឋ​ខ្មែរ​
លោកម៉ៅ មុនីវណ្ណ​ ពេល​ចុះ​ទៅ​ត្រួត​ពិនិត្យ​ចំណុច​ដែល​កង​កម្លាំង​សមត្ថកិច្ច​វៀតណាម​នាំ​ពលរដ្ឋ​ខ្លួន​បំផ្លាញ​ដំណាំ​ពលរដ្ឋ​ខ្មែរ​ @Mao Monyvann Page
ដោយ៖ វណ្ណ សុគន្ធា
១៥ នាទី

មក​ដល់ពេលនេះ ក្រសួងការបរទេស និង​សហប្រតិបត្តិការ​អន្តរជាតិ​កម្ពុជា មិនទាន់បាន​ឆ្លើយតប​យ៉ាងណា​នោះទេ​ចំពោះ​សំណើសុំ​ចាត់វិធានការ​ការរំលោភ​ឈ្លានពាន​របស់​កងកម្លាំង​សមត្ថកិច្ច​វៀតណាម​មកលើ​ផ្ទៃដី​ដាំ​ដំណាំ​របស់​ប្រជាកសិករ​ខ្មែរ។ នេះ​បើតាម​លោក​ម៉ៅ មុនី​វណ្ណ តំណាងរាស្ត្រ​គណបក្ស​សង្គ្រោះ​ជាតិ​ដែល​ធ្វើសំណើ​ជាមួយ​តំណាងរាស្ត្រ​ផ្សេងទៀត បានបញ្ជាក់​ប្រាប់​វិទ្យុ​បារាំង​អន្តរជាតិ​នៅ​ព្រឹក​ថ្ងៃ​សៅរ៍​នេះ។

ផ្សាយពាណិជ្ជកម្ម

លោក​ម៉ៅ មុនី​វណ្ណ តំណាងរាស្ត្រ​គណបក្ស​សង្គ្រោះ​ជាតិ និង​អនុប្រធាន​គណៈកម្មការ​ទី៩នៃ​រដ្ឋសភា បាន​បញ្ជាក់ថា មកដល់ពេលនេះ​លោក​ហោ ណាំហុង រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​កម្ពុជា មិនទាន់បាន​ឆ្លើយតប​ចំពោះ​សំណើ​របស់​ក្រុមតំណាងរាស្ត្រ​គណបក្ស​សង្គ្រោះ​ជាតិ​អំពី​រឿង​កម្លាំង​សមត្ថកិច្ច​វៀតណាម​នាំ​ប្រជាពលរដ្ឋ​ខ្លួន​ចូលមក​បំផ្លាញ​ដំណាំ​ពលរដ្ឋ​ខ្មែរ​នៅតាម​បណ្តោយ​ព្រំដែន​កម្ពុជា-វៀតណាម។

គួរ​បញ្ជាក់ថា កាលពី​ថ្ងៃទី២៩ មេសា​កន្លងទៅ ក្រុមតំណាងរាស្ត្រ​របស់​គណបក្ស​សង្គ្រោះ​ជាតិ​ចំនួន១១រូប បាន​ផ្ញើលិខិត​មួយច្បាប់​តាមរយៈ​លោក​កឹម សុខា អនុប្រធាន​ទី១នៃ​រដ្ឋសភា ទៅកាន់​លោក​ហោ ណាំហុង រដ្ឋមន្ត្រី​ក្រសួងការបរទេស និង​សហប្រតិបត្តិ​អន្តរជាតិ​កម្ពុជា។ លិខិត​នោះ គឺ​ក្រុមតំណាងរាស្ត្រ​បក្សប្រឆាំង បានស្នើ​ឲ្យ​លោក​ហោ ណាំហុង ចាត់វិធានការ​ចំពោះ​ការរំលោភ​ឈ្លានពាន​របស់​កក​ងក​ម្លាំ​ង​សមត្ថកិច្ច​វៀតណាម​មកលើ​ផ្ទៃដី​ដាំ​ដំណាំ​របស់​ប្រជាកសិករ​ខ្មែរ​នៅតាម​បណ្តោយ​ព្រំដែន​កម្ពុជា-វៀតណាម​ក្នុង​ខេត្ត​ត្បូងឃ្មុំ។

លិខិត​នោះដែរ បាន​ធ្វើឡើង​បន្ទាប់ពី​លោក​ម៉ៅ មុនី​វណ្ណ បាន​ដឹកនាំ​ក្រុមតំណាងរាស្ត្រ​កាលពី​ថ្ងៃទី២៦ មេសា បាន​ចុះទៅ​ត្រួតពិនិត្យ​ដោយផ្ទាល់​នូវ​ចំណុច​ដែល​កងកម្លាំង​វៀតណាម​បាន​នាំ​ពលរដ្ឋ​របស់ខ្លួន​ចូលធ្វើ​សកម្មភាព​បាញ់​ថ្មាំ​គីមី​ពុល​បំផ្លាញ​ដំណាំ​របស់​ប្រជាកសិករ​ស្ថិតនៅក្នុង​ចំណុច​ជាំ​ប្រាំ​ល្វែង ភូមិ​ជើង ឃុំ​ជាំ ស្រុក​មេមត់ ខេត្ត​ត្បូងឃ្មុំ។ បើតាម​តំណាងរាស្ត្រ​គណបក្ស​សង្គ្រោះ​ជាតិ ផលដំណាំ​ប្រជាកសិករ​ខ្មែរ​ចំនួន​ប្រមាណ១០ ហិកតា ត្រូវបាន​បំផ្លាញ និង​បង្ក​ផលប៉ះពាល់​ដល់​ប្រជាពលរដ្ឋ​ដោយផ្ទាល់​ចំនួន៩គ្រួសារ។ លោក​ម៉ៅ មុនី​វណ្ណ បាន​ហៅ​ទង្វើ​របស់​កងកម្លាំង​សមត្ថកិច្ច​វៀតណាម​នោះ​ថា បាន​រំលោភបំពាន​មាក់ងាយ​លើ​ប្រជាពលរដ្ឋ​ខ្មែរ និង​អធិបតេយ្យភាព​របស់​ក​ម្ពុ​ជា។

ជាថ្មី​ម្តងទៀត លោក​កុយ កួង អ្នកនាំពាក្យ​ក្រសួងការបរទេស និង​សហប្រតិបត្តិ​អន្តរជាតិ​កម្ពុជា នៅតែ​មិនអាច​ទាក់ទង​សុំ​ការបំភ្លឺ​បាន​នោះទេ​ជុំវិញ​ការឆ្លើយតប​ចំពោះ​សំណើសុំ​ឲ្យ​ចាត់វិធានការ​លើ​ករណី​នេះ។

យ៉ាងណាក៏ដោយ ចំពោះ​ការមិន​ទាន់​ឆ្លើយតប​របស់លោក​ហោ ណាំហុង​នេះ លោក​ម៉ៅ មុនី​វណ្ណ បាន​គូសបញ្ជាក់ថា លោក​នឹង​រង់ចាំ​រយៈពេល៧ថ្ងៃ​តាមច្បាប់​កំណត់ ក៏ប៉ុន្តែ​បើ​នៅតែ​មិនមាន​ការឆ្លើយតប​នោះ លោក​នឹងសិក្សា​ផ្លូវច្បាប់​បន្ថែមទៀត ថា​តើ​គួរ​ធ្វើយ៉ាងណា​បន្ត?៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ