ក្រុមអង្គការសង្គមស៊ីវិល៖ បើមិនទាន់មានឆន្ទៈធ្វើវិសោធនកម្ម ច្បាប់NGOs គួរត្រូវបាននិរាករណ៍
ចុះផ្សាយនៅថ្ងៃ៖
អង្គការសង្គមស៊ីវិលនៅកម្ពុជាចំនួន១០០ស្ថាប័ន បានចេញសេចក្តីថ្លែងការណ៍មួយម្សិលមិញដោយលើកឡើងថា ប្រសិនបើមិនមានឆន្ទៈធ្វើវិសោធនកម្មច្បាប់ស្តីពីសមាគម និងអង្គការមិនមែនរដ្ឋាភិបាលទេ ច្បាប់ដ៏ចម្រូងចម្រាស់នេះគួរតែត្រូវបាននិរាករណ៍ចោល។ ការលើកឡើងរបស់ក្រុមអង្គការទាំងនេះ គឺក្រោយពីមានកិច្ចប្រជុំចំនួន៤លើក រវាង ក្រសួងមហាផ្ទៃ និងអង្គការមិនមែនរដ្ឋាភិបាលក្នុងស្រុកដែលក្រុមអង្គការទាំងនោះ ចាត់ទុកថាបានបញ្ចប់ទៅដោយមិនមានលទ្ធផលជាវិជ្ជមាន។
«គ្មានភាពចាំបាច់ដើម្បីមានច្បាប់ស្ដីពីសមាគម និងអង្គការមិនមែនរដ្ឋាភិបាលនេះទេ»។ នេះគឺជាការលើកឡើងនៅក្នុងសេចក្តីថ្លែងការណ៍រួមដែលគាំទ្រដោយអង្គការសង្គមស៊ីវិលចំនួន១០០ស្ថាប័ននៅកម្ពុជា។ គ្មានភាពចាំបាច់ ដោយសារតែកម្ពុជាមានក្រមរដ្ឋប្បវេណី ដែលបានចែងពីបទបញ្ញត្តិ ដើម្បីគ្រប់គ្រងសមាគម និងអង្គការមិនមែនរដ្ឋាភិបាលរួចរាល់ហើយ។ ហើយរាល់បទល្មើសផ្សេងៗក៏មានចែងនៅក្នុងក្រមព្រហ្មទណ្ឌរបស់កម្ពុជាផងដែរ។ នេះជាការគូសបញ្ជាក់នៅក្នុងសេចក្តីថ្លែងការណ៍ដដែល។
បើតាមក្រុមអង្គការទាំងនោះ ច្បាប់ស្តីពីសមាគម និងអង្គការមិនមែនរដ្ឋាភិបាលគឺ«គ្រាន់តែជាឧបករណ៍បម្រើដល់ការរារាំង គំរាមកំហែង និងរឹតត្បិតសង្គមស៊ីវិល ដែលបានរាយការណ៍ជាញឹកញាប់និងរហូតមក អំពីការតាមដាន និងការគំរាមកំហែងក្រោមហេតុផលនៃច្បាប់មួយនេះតែប៉ុណ្ណោះ»។ ដូច្នេះហើយទើបសហគមន៍និងអង្គការសង្គមស៊ីវិល ចំនួន១០០ស្ថាប័ននោះ ទទូចឱ្យរដ្ឋាភិបាលកម្ពុជា ធ្វើការនិរាករណ៍ច្បាប់នេះឱ្យបានឆាប់រហ័ស។
យ៉ាងណាក៏ដោយមន្ត្រីរដ្ឋាភិបាលមួយចំនួនបានលើកឡើងថា គំនិតយោបល់ផ្សេងៗគ្នារបស់ក្រុមសង្គមស៊ីវិលរាប់ពាន់ស្ថាប័ន គឺជាហេតុផលដែលមិនអាចធ្វើវិសោធនកម្មច្បាប់នេះបាន ហើយតម្រូវឲ្យអង្គការទាំងនោះមានគំនិតយោបល់រួមជាឯកច្ឆន្ទសិន ទើបធ្វើវិសោធនកម្មច្បាប់នេះបាន។ ប៉ុន្តែក្រុមអង្គការសង្គមស៊ីវិល យល់ថាភាពខុសប្លែកគ្នានៅក្នុងរចនាសម្ព័ន្ធដឹកនាំ គោលបំណង និងតំណាងរបស់ សមាគម និងអង្គការ គឺជាភាពរឹងមាំនៃសង្គមស៊ីវិលមួយដែលមានលក្ខណៈសេរី ចម្រុះមជ្ឈដ្ឋាន និងឯករាជ្យ ហើយថាការតម្រូវរបស់ក្រសួងមហាផ្ទៃគឺកំពុងតែបង្ហាញពីការខ្វះឆន្ទៈរបស់ខ្លួននៅពីក្រោយភាពមិនអាចទៅរួចនៃការធ្វើវិសោធនកម្មនេះ។ តែលោក ប៊ុន ហុន រដ្ឋលេខាធិការក្រសួងមហាផ្ទៃ បានច្រានចោលនូវសេចក្តីថ្លែងការណ៍នេះ ដោយចាត់ទុកថា ធ្វើឡើងក្រោមហេតុផលនយោបាយ។
សូមជម្រាបថា ច្បាប់ស្ដីពីសមាគមនិងអង្គការមិនមែនរដ្ឋាភិបាល ត្រូវបានអនុម័តកាលពីខែកក្កដា ឆ្នាំ២០១៥។ ប៉ុន្តែច្បាប់នេះទទួលរងការរិះគន់យ៉ាងខ្លាំងពីសំណាក់ក្រុមសហគមន៍មូលដ្ឋាន សហជីព អង្គការមិនមែនរដ្ឋាភិបាល ក៏ដូចជាអង្គការសហប្រជាជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ