កម្ពុជា

​​ម៉ូតូ​កង់​បី​ផលិត​នៅ​​ឥណ្ឌា​១៧០​គ្រឿង ត្រូវ​អាជ្ញាធរ​ក្រុង​ភ្នំពេញ​ឃាត់​ទុក​ដើម្បីចុះ​បញ្ជី​និង​កិប​ស្លាក​លេខ

អ្នក​ដំណើរ​ជិះ​ក្នុង​ម៉ូតូ​កង់​បី​ផលិត​នៅ​ប្រទេស​ឥណ្ឌា កាត់​មុខ​រដ្ឋសភា​ជាតិ ថ្ងៃ​ទី​១០ កក្កដា ២០១៧
អ្នក​ដំណើរ​ជិះ​ក្នុង​ម៉ូតូ​កង់​បី​ផលិត​នៅ​ប្រទេស​ឥណ្ឌា កាត់​មុខ​រដ្ឋសភា​ជាតិ ថ្ងៃ​ទី​១០ កក្កដា ២០១៧ REUTERS/SAMRANG PRING

ចាប់​តាំង​ពី​ថ្ងៃ​ទី​១០​ខែ​វិច្ឆិកា​មក អាជ្ញាធរ​មាន​សមត្ថកិច្ច​ក្រុង​ភ្នំពេញបាន​ឃាត់​ម៉ូតូ​កង់​បីផលិត​នៅ​ប្រទេស​ឥណ្ឌា បាន​ចំនួន​១៧០​គ្រឿង​។ ជា​ម៉ូតូ​កង់​បី ដែល​កំពុង​តែ​ប្រកប​អាជីវកម្ម​ស៊ី​ឈ្នួល​ដឹក​អ្នក​ដំណើរ​តាម​ដង​ផ្លូវ​នានា​ទូទាំងក្រុង​​ភ្នំពេញ ដោយ​ពុំ​បាន​ចុះ​បញ្ជី និង​ពុំ​មាន​ស្លាក​លេខ​សម្គាល់​ត្រឹម​ត្រូវ​។ រហូត​មក​ទល់​​ថ្ងៃ​អាទិត្យ​ទី​១២​វិច្ឆិកា​នេះ មន្ទីរ​សាធារណការ​និង​ដឹក​ជញ្ជូន​ក្រុង​ភ្នំពេញបាន​សម្រេច​សហការ​ជាមួយ​ស្នងការ​ក្រុង ​រៀបចំ​បែប​បទ​ចុះ​បញ្ជី និង​ធ្វើ​ស្លាក​លេខ​ឲ្យម៉ូតូ​កង់​បី​ទាំង​១៧០​គ្រឿង ដោយ​គ្មាន​ការ​ផាក​ពិន័យ​ឡើយ​។

ផ្សាយពាណិជ្ជកម្ម

នៅ​ក្នុង​សន្និសីទ​កាសែត​នា​ព្រឹក​ថ្ងៃ​អាទិត្យ​ទី​១២​វិច្ឆិកា​នេះ​ក្នុង​បរិវេណ​អគ្គស្នងការ​ដ្ឋាន​នគរបាល​ជាតិ លោក ជួន សុវណ្ណ ស្នងការ​នគរបាល​រាជធានី​ភ្នំពេញ បាន​គូស​បញ្ជាក់​ថា ការ​ធ្វើ​ចរាចរណ៍​លើ​ដង​ផ្លូវ​ដោយ​ប្រើ​ប្រាស់​យានយន្តគ្មាន​ស្លាក​លេខ​​ត្រឹម​ត្រូវ ម្ចាស់​យានយន្ត​នឹង​ត្រូវ​ប្រឈម​មុខ​នឹង​ការ​ផាក​ពិន័យ​ចំនួន​៣​ម៉ឺន​រៀល ស្រប​តាម​ច្បាប់​ចរាចរណ៍​ផ្លូវ​គោក​។ ប៉ុន្តែ​សម្រាប់​ម៉ូតូ​កង់​៣​ទាំង​អស់ ដែល​ត្រូវ​បាន​សមត្ថកិច្ច​ឃាត់​ទុក​នា​ពេលនេះ នឹង​មិន​រង​ការ​ផាក​ពិន័យ​ឡើយ​។

បន្ថែម​ពី​លើ​នោះ លោក ជួន សុវណ្ណ បញ្ជាក់​ទៀត​ថា មន្ដ្រី​ជំនាញ​នៃ​មន្ទីរ​សាធារណការ​និង​ដឹក​ជញ្ជូន សហការ​ជាមួយ​ស្នងការដ្ឋាន​ក្រុង​ភ្នំពេញ នឹង​រៀបចំ​ធ្វើ​បែប​បទ​ចុះ​បញ្ជី​ធ្វើ​ស្លាក​លេខ​ជូន​ម៉ូតូ​កង់​៣​ទាំង​អស់ នៅ​ឯ​ស្នងការ​ដ្ឋាន​នគរបាល​ក្រុង​ភ្នំពេញ​ដោយ​ផ្ទាល់ ចាប់​ពី​ថ្ងៃ​អាទិត្យ​នេះ​ត​ទៅ​។ ការ​ធ្វើ​ស្លាក​លេខ​នេះ មាន​តម្លៃ​៤​ម៉ឺន​រៀល ខណៈ​ការ​ឆៀក​យានយន្ត​មាន​តម្លៃ​៧ពាន់​រៀល​។ ហើយ​គ្មាន​ការ​យក​សេវា​ក្រោម​តុ​ឡើយ​។ ក្រៅ​ពី​នោះ សមត្ថកិច្ច​ក៏​នឹង​ចែកជូន​សៀវភៅ​ច្បាប់​ចរាចរណ៍ដល់​ម្ចាស់​ម៉ូតូ​កង់​បី​ទាំង​អស់​ផង​ដែរ ដើម្បី​ឲ្យ​ពួក​គាត់​សិក្សា​រៀនសូត្រ មុន​នឹង​ទៅ​​ប្រឡង​យក​ប័ណ្ណ​បើក​បរ​។ នេះ​បើ​តាម​ការ​អះអាង​របស់​លោក​ស្នងការ​ ជួន សុវណ្ណ​។

សូម​ជម្រាប​ជូន​ថា រដ្ឋបាល​រាជធានី​​ភ្នំពេញ បាន​ចាប់​ផ្ដើម​ឃាត់​ម៉ូតូ​កង់​បី «ឡាំប្រឺតា» ដែល​ផលិត​នៅ​ប្រទេស​ឥណ្ឌា​នេះ តាំង​ពី​ថ្ងៃសុក្រ​ ដោយ​សារ​តែ​ម៉ូតូ​កង់​បី​ទាំង​នោះ ធ្វើ​ចរាចរណ៍​លើ​ដង​ផ្លូវដោយ​គ្មាន​ស្លាក​លេខសម្គាល់​​ត្រឹម​ត្រូវ​។ ក្រោយ​ការ​ឃាត់​ភ្លាម​ៗ ក្រុម​ម៉ូតូ​កង់​បី​បាន​ប្រមូល​ផ្ដុំ​គ្នា​តវ៉ា ដោយ​ប្រតិកម្ម​ថា អាជ្ញាធរ​ចាត់​វិធានការ​លើ​ខ្លួន​ដោយ​គ្មាន​ការ​ជូន​ដំណឹង​ជា​មុន​។ ប៉ុន្តែ​រដ្ឋបាល​រាជធានី​ភ្នំពេញ តាម​រយៈ​សេចក្ដី​ជូន​ដំណឹង​របស់​ខ្លួន​នៅ​យប់​ថ្ងៃ​ទី​១១​វិច្ឆិកា ពន្យល់​ថា រដ្ឋបាល​រាជធានី​ភ្នំពេញ ពុំ​មាន​ចេតនា​បង្ក​ការ​រំខាន​ឬ​ធ្វើ​ឲ្យ​រាំង​ស្ទះ ដល់​ការ​ប្រកប​អាជីវកម្ម​របស់​ម្ចាស់​ម៉ូតូ​កង់​បី​ទាំង​អស់​នេះ​ទេ។ ការ​ឃាត់​ម៉ូតូ​កង់​បី​នេះ ធ្វើ​ឡើង​ដើម្បី​​ពង្រឹង​ការ​អនុវត្ត​ច្បាប់តែ​ប៉ុណ្ណោះ​។ នេះ​បើ​តាម​រដ្ឋបាល​រាជធានី​ភ្នំពេញ​។

គួរ​ជម្រាប​ជូន​ថា ម៉ូតូ​កង់​បី ផលិត​នៅ​ប្រទេស​ឥណ្ឌា មាន​វត្តមាន​នៅ​កម្ពុជា​តាំង​ពី​ឆ្នាំ​២០១២​មក​ម្ល៉េះ​។ ប៉ុន្តែ​ទើប​តែ​នៅ​ឆ្នាំ​២០១៧​នេះ​ទេ ដែល​គេ​សង្កេត​ឃើញ​ថា មាន​ការ​ប្រើ​ប្រាស់​ម៉ូតូ​កង់​បី​ប្រភេទ​នេះ ច្រើន​ជាង​មុន​។ មាន​ហ្វ្រាំង​ជាន់​ដូច​ឡាន អាច​ឈប់​បាន​ក្នុង​រយៈ​ចម្ងាយ​បី​ម៉ែត្រ ម៉ូតូ​កង់​បី​ផលិត​នៅ​ឥណ្ឌា​នេះ អាច​រត់​បាន​ដោយ​ប្រើ​សាំង​ក៏​បា​នហ្គាស​ក៏​បាន ដោយ​មាន​ល្បឿន​មធ្យម​៥៥​គីឡូម៉ែត្រ​ក្នុង​មួយ​ម៉ោង និង​ត្រូវ​ដាក់​លក់​ក្នុង​តម្លៃ​ប្រមាណ​៣​ពាន់​ដុល្លារ​សហរដ្ឋ​អាមេរិក​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI