លោក សម រង្ស៊ី ចោទថា លោក ហ៊ុន សែន សុខចិត្តឲ្យពលរដ្ឋស្លាប់ដោយសារកូរ៉ូណាដើម្បីការពារអំណាច
ចុះផ្សាយនៅថ្ងៃ៖
មេដឹកនាំគណបក្សប្រឆាំងដែលកំពុងនៅក្រៅប្រទេសចោទប្រកាន់ប្រមុខរដ្ឋាភិបាលកម្ពុជា លោក ហ៊ុន សែន ថាសុខចិត្តទទួលយកហានិភ័យ ឲ្យប្រជាពលរដ្ឋខ្មែរ ស្លាប់ដោយជំងឺមកពីប្រទេសចិន ព្រោះត្រូវការចិនដើម្បីការពារអំណាចដែលគាត់ដឹកនាំសព្វថ្ងៃ។ ការចោទប្រកាន់បែបនេះរបស់លោក សម រង្ស៊ី គឺបន្ទាប់ពីលោកនាយករដ្ឋមន្ត្រី ហ៊ុន សែន ប្រកាសថាមិនមានការបិទជើងហោះហើររវាងកម្ពុជានិងចិន ដោយសារតែផ្ទុះមេរោគកូរ៉ូណាវីរុសឡើយ។
តាមរយៈសំណេរនៅលើហ្វេសប៊ុកនៅថ្ងៃទី៣១ខែមករា លោក សម រង្ស៊ី បានបន្ទោសធ្ងន់ៗទៅលើការសម្រេចចិត្តរបស់ប្រមុខរដ្ឋាភិបាលកម្ពុជា លោក ហ៊ុន សែន ដែលមិនបិទជើងហោះហើរពីប្រទេសចិន។ ចិនដែលកំពុងបន្តរីករាលដាលមេរោគកូរ៉ូណាវីរុស ដែលកើនឡើងដល់ជាងមួយម៉ឺនករណី និងសម្លាប់មនុស្សអស់ជាង២០០នាក់គិតត្រឹមថ្ងៃទី៣១មករា។
បើតាម លោក សម រង្ស៊ី ការដែលកម្ពុជាមិនបិទជើងហោះហើរពីប្រទេសចិននេះ មានន័យថា លោក ហ៊ុន សែន សុខចិត្តទទួលយកហានិភ័យ ឲ្យប្រជាពលរដ្ឋខ្មែរ ស្លាប់ដោយជំងឺមកពីប្រទេសចិននេះ ពីព្រោះគាត់ត្រូវការចិន ដើម្បីការពារអំណាចដែលគាត់ដឹកនាំសព្វថ្ងៃ។
យ៉ាងណាក៏ដោយ លោក ហ៊ុន សែន បានអះអាងថា បើបិទជើងហោះហើរទាំងអស់ពីចិន គឺស្មើនឹងសម្លាប់សេដ្ឋកិច្ចកម្ពុជានិងកាត់បន្ថយទំនាក់ទំនងការទូតរវាងកម្ពុជា-ចិនយ៉ាងដូច្នោះដែរ។
បើតាមប្រមុខរដ្ឋាភិបាលកម្ពុជា អ្នកដែលរងគ្រោះខ្លាំង គឺអ្នករកស៊ី និងទេសចរចិន ដែលមិនមានផលប៉ះពាល់ ខណៈលោកអះអាងថា លោកមិនខ្វល់ពីប្រទេសផ្សេងគិតយ៉ាងម៉េចនោះឡើយ ប៉ុន្តែកម្ពុជា មិនជម្លៀសពលរដ្ឋខ្មែរចេញពីចិននោះឡើយ។
ប៉ុន្តែអង្គការសុខភាពពិភពលោកបានប្រកាសភាពអាសន្នហើយ ឲ្យមានការទប់ស្កាត់វីរុសកូរ៉ូណា កុំឲ្យរាលដាលពីប្រទេសចិន ចូលមកប្រទេសផ្សេងទៀត។ តួយ៉ាងប្រទេសវៀតណាមដែលនៅក្បែរខាងកម្ពុជា ប្រទេសរុស្ស៊ី និងប្រទេសមួយចំនួន ដែលមានទំនាក់ទំនងយ៉ាងជិតស្និតជាមួយប្រទេសចិន គឺសុទ្ធតែបានសម្រេចបិទព្រំដែនរបស់ពួកគេ មិនឲ្យអ្នកធ្វើដំណើរពីប្រទេសចិនចូលបានឡើយ។
សូមបញ្ជាក់ថា នៅកម្ពុជាទើបតែរកឃើញករណីឆ្លងមេរោគកូរ៉ូណាវីរុសនេះមួយករណីប៉ុណ្ណោះទៅលើបុរសជនជាតិដែលមកពីទីក្រុងវូហាន ហើយកំពុងស្នាក់នៅខេត្តព្រះសីហនុ ដោយដាក់ឲ្យស្ថិតក្រោមការព្យាបាលដាច់ដោយឡែកពីគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ