កម្ពុជា-នយោបាយ

លោក​ សម​ រង្ស៊ី​ ចំអក​ជា​ថ្មី​ឲ្យ​តុលា​ការ​កាត់​ទោស​លោក​ទន្ទឹម​លោក​ កឹម​ សុខា​ ដែរ​

លោក សម រង្ស៊ី និង លោក កឹម សុខា
លោក សម រង្ស៊ី និង លោក កឹម សុខា @Internet

លោក សម រង្ស៊ី ​ដែល​ពេល​នេះ​កំពុង​នៅ​សហរដ្ឋ​អាមេរិក​បាន​ចេញ​សារ​នយោបាយ​នៅ​ថ្ងៃ​ទី​១៤​ខែ​ធ្នូ​ឆ្នាំ​២០១៩​នេះ ​ដោយ​ចំ​អក​ឲ្យ​តុលា​ការ​កម្ពុជា កាត់​ទោស​រូប​លោក​ ពី​បទ​ក្បត់​ជាតិ​ ទន្ទឹម​នឹង​លោក កឹម សុខា ដែរ ។ ​ការ​លើក​ឡើង​បែប​ចំ​អក​របស់​លោក សម រង្ស៊ី ​ជាថ្មី​ទៀត​នេះ ​គឺ​ស្រប​ដែល​ចៅក្រម​ស៊ើប​សួរ​បាន​សម្រេច​បញ្ជួន​សំណុំ​រឿង​លោក​ កឹម សុខា​ ដែល​តុលា​ការ​ចោទ​ថា​ក្បត់​ជាតិ​នោះ​ ទៅ​ធ្វើ​ការ​ជំនុំ​ជម្រៈ​នៅ​ថ្ងៃទី១៥​ខែមករា ឆ្នាំ​២០២០​ខាងមុខ។

ផ្សាយពាណិជ្ជកម្ម

ការ​ដែល​លោក សម រង្ស៊ី ចំ​អក​បែប​នេះ​ ត្រូវ បាន​មេ​ដឹក​នាំ​បក្ស​ប្រឆាំង​រូបនេះ​ អះអាង​ថា លោក​មាន​ការ«ពាក់​ព័ន្ធ​ច្រើន​ជាង ញឹក​ញាប់​ជាង ហើយ​ស៊ី​ជម្រៅ​ជាង​លោក កឹម សុខា ក្នុង​ការ​ទាក់​ទង​ជា​មួយ​អង្គ​ការ​អាមេរិ​កាំង​នានា ដើម្បី​នាំ​មក​នូវ​លទ្ធិ​ប្រ​ជា​ធិប​តេយ្យ​នៅ​កម្ពុជា ក្នុង​ឋានៈ​លោក​ជា​ប្រធាន​គណ​បក្សសង្គ្រោះ​ជាតិ កាល​ពី​ចុង​ឆ្នាំ ២០១៣ គឺ​នៅពេល​ដែល​គេ​ដក​ស្រង់​ពាក្យ​សម្តី​លោក កឹម សុខា ជា​អនុប្រធាន​គណ​បក្ស​សង្គ្រោះ​ជាតិ យក​មក​ធ្វើ​ជា​មូលដ្ឋាន នៃ​ការ​ចោទ​ប្រកាន់ ពី​បទ​ក្បត់​ជាតិ​នោះ"។ នេះ​បើតាម​ហ្វេសប៊ុក​លោក សម​រង្ស៊ី។​

លោក សម រង្ស៊ី បាន​រំឭក​ថា តាំងពី​លោក​នៅ​ជា​ប្រធាន​គណ​បក្ស សម រង្ស៊ី ម្ល៉េះ​គឺ នៅ​ឆ្នាំ​២០០២​លោក​មាន​ទំ​នាក់​ទំ​នង​ជា​មួយ​អង្គការ​អាមេរិ​កាំង​មួយ​ហៅកាត់​ថា​ IRI ​ដែល​ផ្តល់​ជំនួយ​ផ្លូវ​ចិត្ត ​ជំនួយ​សិក្ខា​សាលា ក្នុង​ដំណើរ​ការ​បក្ស​ប្រឆាំង​នៅ​កម្ពុជា​។

​បើ​តាម លោក សម រង្ស៊ី ប្រសិន​បើ តុលាការ​កម្ពុជា កាត់​ទោស ​លោក កឹម សុខា​ ​ដោយ​សារ​តែ​មាន​ទំនាក់​ទំនង​ជា​មួយ​បរទេស គឺ​គួរ​តែ​កាត់​ទោស លោក សម រង្ស៊ី និង​សហរដ្ឋ​អាមេរិក​ផង​ដែរ​។​

សូមបញ្ជាក់ថា កាល​ពី​ថ្ងៃទី៩ ខែធ្នូ សាលា​ឧទ្ធរណ៍ បាន​ច្រាន​ចោល​បណ្តឹង​ជំទាស់​របស់​សហ​មេធាវី​ការពារ​ក្តី លោក កឹម សុខា ប្រធាន​អតីត​គណ​បក្ស​សង្គ្រោះ​ជាតិ​ ដែលបាន​ប្តឹង​ជំទាស់​ទៅ​នឹង​ការ​សម្រេច​របស់​សាលា​ដំបូង​ដោយ​បញ្ជូន​សំណុំ​រឿង​លោក កឹម សុខា ទៅ​ជំនុំ​ជម្រះ ហើយ​តុលាការជាន់ទាបនេះ​គ្រោង​បើក​សវនាការ​លើ​ករណី​លោក កឹម សុខា នៅថ្ងៃ១៥​ខែ​មករា​ឆ្នាំ​២០២០។

សម្រាប់​លោក សម រង្ស៊ី បាន​សម្មត់​ជា​មុន​ហើយ​ថា​ការ​កាត់​ទោស​លោក កឹម សុខា នៅ​ថ្ងៃ ១៥ មករា ២០២០ ​ខាងមុខ​គឺ​បង្ហាញ​ពី​ភាព​ទាល់​ច្រក របស់​លោក ហ៊ុន សែន​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI