អានតួអត្ថបទ
ទស្សនៈព្រឹត្តិការណ៍ខ្មែរ

តើ​​គ្រឹះ​​របស់​​គណបក្ស​​សង្គ្រោះ​ជាតិ​​កំពុង​​រង្គើ​​មែន​ឬ​?​

សំឡេង ០៤:៤៧
វត្តមាន​នៃ​ការ​ចាប់ដៃ​គ្នា​របស់​​លោក​​សម រង្ស៊ី ​​​និង ​​​លោក​​កឹម សុខា​​​ បង្កើត​គណបក្ស​សង្រ្គោះជាតិ​ ទទួល​បាន​ការ​គាំទ្រ​យ៉ាង​ខ្លាំង​នៅ​ក្នុង​ការ​បោះឆ្នោត​ឆ្នាំ​២០១៣​
វត្តមាន​នៃ​ការ​ចាប់ដៃ​គ្នា​របស់​​លោក​​សម រង្ស៊ី ​​​និង ​​​លោក​​កឹម សុខា​​​ បង្កើត​គណបក្ស​សង្រ្គោះជាតិ​ ទទួល​បាន​ការ​គាំទ្រ​យ៉ាង​ខ្លាំង​នៅ​ក្នុង​ការ​បោះឆ្នោត​ឆ្នាំ​២០១៣​ rfi/siv channa
ដោយ៖ ប៉ែន បូណា
២៧ នាទី

គណបក្ស​សង្គ្រោះ​ជាតិ​​ដែល​​កើត​ចេញ​ពី​​ការ​រួមបញ្ចូល​​គ្នា​​រវាង​​គណបក្ស​សម រង្ស៊ី​ និង​​គណបក្ស​​សិទ្ធិ​មនុស្ស ​បាន​​កើន​​សំឡេងគាំ​ទ្រ​​យ៉ាង​​សន្ធឹក​សន្ធាប់​​ក្នុង​ការ​​បោះឆ្នោត​​កាល​ពី​​ខែ​កក្កដា​​ឆ្នាំ​ ២០១៣​​។ ​លទ្ធផល​​នេះ​​បាន​មក​ពី​​ការ​បង្រួប​បង្រួម​​ដែល​ជា​​គ្រឹះ​​របស់​​គណបក្ស​​សង្គ្រោះ​ជាតិ​។ ​ប៉ុន្តែ ​គណបក្ស​​នេះ​​មាន​​បញ្ហា​​ប្រឈម​​ជា​ច្រើន​​ដែល​​ត្រូវ​​ដោះស្រាយ​​ចំពោះមុខ​ ជា​ពិសេស​​ការ​រក្សា​​ឯកភាព​​ផ្ទៃក្នុង​​ជា​​បញ្ហា​សំខាន់​​ជាងគេ​​បំផុត​។ ​ប៉ុន្តែ ​ពេលនេះ ​សញ្ញា​​នៃ​​ការ​មិន​ចុះ​សម្រុង​គ្នា​​​​កំពុង​​បង្ហាញ​ឡើង​​ជា​ថ្មី​។​ តើ​​នេះ​​មាន​ន័យ​ថា​​ គ្រឹះ​​របស់​​​គណបក្ស​​សង្គ្រោះ​ជាតិ​​កំពុង​​រង្គើ​​មែន​ឬ?​

ផ្សាយពាណិជ្ជកម្ម

បន្ទាប់ពី​បានធ្វើ​ឲ្យ​គណបក្ស​ប្រជាជន​ជ្រុះ​អស់ ២២ កៅអី​ពី​ក្នុង​រដ្ឋសភា​មក គណបក្ស​សង្គ្រោះ​ជាតិ​បាន​ឡើង​ប្រជាប្រិយភាព​ដល់​កម្រិត​ខ្ពស់បំផុត​មួយ។ ដើម្បី​ឈានដល់​ដំណាក់កាល​នេះ គណបក្សប្រឆាំង​ពិតជា​មាន​ចំណុចខ្លាំង​របស់ខ្លួន៖

ចំណុចខ្លាំង​ទី១ គឺ​ការបង្រួបបង្រួម​នេះឯង។ នរណា​ក៏​ដឹង​ដែរ​ថា​ការបង្រួបបង្រួម​ជា​ផ្លូវ​តែមួយគត់​ដើម្បី​ក្លាយជា​គូប្រជែង​ពិតប្រាកដ​ជាមួយ​គណបក្ស​ប្រជាជន​កម្ពុជា​ដែល​កាន់អំណាច​ជាង ៣០ឆ្នាំ។ ទីបំផុត ក្រោម​សម្ពាធ​នៃ​ស្ថានការណ៍​ចាប់បង្ខំ ការ​បង្រួប​ប្រ​ងួ​មរ​វាង​គណបក្ស សម រង្ស៊ី និង​សិទ្ធិមនុស្ស​របស់លោកកឹម សុខា ក៏​កើតចេញ​ជា​រូបរាង​យ៉ាង​តក់ក្រហល់​កាលពី​ខែមេសា​ឆ្នាំ ២០១៣។ ការបង្រួបបង្រួម​នេះហើយ​ដែលជា​គ្រឹះ​ដ៏​រឹងមាំ​សម្រាប់​ការទាក់ទាញ​ការគាំទ្រ​ពី​អ្នកបោះឆ្នោត។

ចំណុចខ្លាំង​ទី២ ៖ មេដឹកនាំ​បក្សប្រឆាំង​គឺ​លោកសម រង្ស៊ី និង​លោកកឹម សុខា សុទ្ធតែជា​អ្នកប្រឆាំង​ដ៏​ល្បីល្បាញ​ជាមួយ​រដ្ឋាភិបាល​គណបក្ស​កាន់អំណាច​ជាពិសេស​គឺជា​មួយ​លោកនាយក​រដ្ឋមន្ត្រី ហ៊ុន សែន។ អ្នក​ទាំងពីរ​តែង​ហ៊ាន​ចេញមុខ​តវ៉ា​និង​ដឹកនាំ​បាតុកម្ម​តាម​ដងផ្លូវ​ដ៏​សកម្ម​ដើម្បី​ការពារ​ផលប្រយោជន៍​ពលរដ្ឋ​ដែល​រងគ្រោះ​ដោយ​អំពើ​អយុត្តិធម៌​ផ្សេង។ សកម្មភាព​ទាំងនេះហើយ​ដែល​បានផ្តល់​ភាពកក់ក្តៅ​ដល់​ពលរដ្ឋ​ក្រីក្រ​ជាពិសេស​អ្នករងគ្រោះ​ដោយ​បញ្ហា​ណាមួយ​ក្រោម​ការដឹកនាំ​របស់​រដ្ឋា​ភិ​បាល​គណបក្ស​អំណាច។

ចំ​ណុ​ខ្លាំង​ទី៣៖ គោលនយោបាយ​ដែល​វាយ​ចំ​ចំណុចខ្សោយ​របស់​គណបក្ស​កាន់អំណាច៖ ការដំឡើង​ប្រាក់ខែ​មន្ត្រីរាជការ​និង​កម្មករ ការផ្តល់ប្រាក់​ឧ​បត្ថ​ម្ភ​ដល់​ជន​ចាស់ជរា ផ្តល់​ការព្យាបាល​ជំងឺ​ដល់​អ្នកក្រីក្រ​ដោយ​ឥតគិតថ្លៃ រួមទាំង​គោលនយោបាយ​ដីធ្លី និង​ការ​បញ្ចុះតម្លៃ​ជី​កសិកម្ម និង​ប្រេងសាំង​ជាដើម គឺជា​ការទន្ទឹងរង់ចាំ​របស់​ប្រជាពលរដ្ឋ​ខ្មែរ​ជាច្រើន​តែ​គណបក្សកាន់អំណាច​មិនអាច​ធ្វើបាន។

ម្យ៉ាងទៀត សំណាង​និង​ឱកាស​ក៏​ជា​អំណោយផល​មួយទៀត​ដែល​ជួយ​បង្កើន​ថាមពល​ដល់​គណបក្សប្រឆាំង​ផងដែរ​ពោលគឺ​អ្នកបោះឆ្នោត​ឲ្យ​គណបក្ស​ផ្សេង​មួយចំនួន​រាប់ទាំង​អ្នក​ដែល​ធ្លាប់​បោះឆ្នោត​ឲ្យ​គណបក្ស​ប្រជាជន​មួយចំនួន​ផង​បោះ​បង្ខំចិត្ត​ទម្លាក់​សន្លឹកឆ្នោត​ឲ្យ​បក្ស​សង្គ្រោះ​ជាតិ​ដើម្បី​ជាការ​ព្រមាន​គណបក្សរ​បស់​ខ្លួន​ឲ្យ​ភ្ញាក់រលឹក​ធ្វើកំណែទម្រង់។

ប៉ុន្តែ ទន្ទឹមនឹង​ចំណុចខ្លាំង​ទាំងនេះ គណបក្ស​សង្គ្រោះ​ជាតិ​ក៏មាន​ចំណុច​ប្រឈម​ជាច្រើន​ដែរ។ ចំណុច​ប្រឈម​និង​ដ៏​រសើប​ជាងគេ​មួយ​គឺ​សម្ព័ន្ធភាព​មិនសូវ​មាំទាំ​រវាង​គណបក្សសម រង្ស៊ី និង​គណបក្ស​សិទ្ធិមនុស្ស។ ឥឡូវនេះ សញ្ញា​នៃ​ការមិនចុះសម្រុង​បាន​ស្តែង​ឲ្យ​ឃើញ​ជាថ្មី​ម្តងទៀត​តាមរយៈ​សេចក្តីថ្លែងការណ៍​មិន​ស៊ីសង្វាក់​គ្នា​រវាង​លោក កឹម សុខា និង​លោក សម រង្ស៊ី ទាក់ទង​នឹង​កិច្ចព្រមព្រៀង​ជាមួយ​គណបក្ស​ប្រជាជន​កម្ពុជា​កាលពី​ថ្ងៃទី ២២ក្កដា ឆ្នាំ ២០១៤។

ជាការ​ពិត ចាប់តាំងពី​គណបក្ស​សង្គ្រោះ​ជាតិ​យល់ព្រម​ចូលធ្វើការ​ក្នុង​សភា​មក អ្នកគាំទ្រ​គណបក្ស​នេះ​មួយចំនួន​បាន​ដក​សេចក្តីទុកចិត្ត។ នេះ​គឺជា​សម្ពាធ​យ៉ាងខ្លាំង​មួយ​ទៅលើ​បក្សប្រឆាំង​ដែល​អាចធ្វើ​ឲ្យ​សម្ព័ន្ធភាព​ដាច់​ខ្សែ​ក៏​ថា​បាន​ប្រសិនបើ​ភាគី​ទាំងពីរ​មិន​ប្រឹង​ទប់​ទេនោះ។ លោកកឹម សុខា ដែល​ទំនងជា​ទទួលយក​កិច្ចព្រមព្រៀង​នេះ​ដោយ​បង្ខំ​នោះបាន​ធ្លោយមាត់​ប្រាប់​អ្នកគាំទ្រ​អំពី​ការសោកស្តាយ​ក្នុងការ​ទទួលយក​កិច្ចព្រមព្រៀង​ជាមួយ​បក្ស​កាន់អំណាច​ដែល​លោក​អះអាងថា«មិនសូវ​ច្បាស់លាស់»។

ក្រៅពីនោះ អនុប្រធាន​បក្សប្រឆាំង​ដែល​ទំនងជា​រង​សម្ពាធ​ពី​អ្នកគាំទ្រ​នៅឯ​ក្រៅប្រទេស​ក៏បាន​ទទួលស្គាល់​អំពី«បរាជ័យ»នៃ​ការចង់​ឲ្យ​មានការ​ផ្លាស់ប្តូរ​រដ្ឋាភិបាល​លោកនាយក​រដ្ឋមន្ត្រី ហ៊ុន សែន។ សេចក្តីថ្លែងការណ៍​បែបនេះ​អាច​ឲ្យ​គេ​យល់បាន​អំពី​ស្ថានភាព​របស់​បក្សប្រឆាំង។

សរុប​មកវិញ ភាពរឹងមាំ​របស់​គណ​បក្ស​សង្គ្រោះ​ជាតិ​គឺ​អាស្រ័យ​ទាំងស្រុង​ទៅលើ​ភាពរឹងមាំ​នៃ​សម្ព័ន្ធភាព​រវាង​គណបក្ស​សិទ្ធិមនុស្ស និង គណបក្ស​សម រង្ស៊ី ។ ពេលនេះ បក្សប្រឆាំង​កំពុង​ឆ្លងកាត់​របត់​ដ៏​លំបាក​មួយ។ លំបាក​ដោយសារតែ​ការ​រង្គោះ​នៃ​សម្ព័ន្ធភាព ដោយសារ​សម្ពាធ​ពី​អ្នកគាំទ្រ និង​ដោយសារ​ការកកើតឡើង​នៃ​គណបក្សថ្មីៗមួយចំនួន។ នេះ​ជា​វិញ្ញាសា​ដ៏​សំខាន់​ណាស់​សម្រាប់​វាស់​ស្ទង់​ពី​ភាពរឹងមាំ​នៃ​គ្រឹះ​របស់​សង្គ្រោះ​ជាតិ​ខណៈដែល​ការបោះឆ្នោត​នឹង​ចូល​មកដល់​នាពេល​ខាងមុខនេះ។ ប្រសិនបើ​គណបក្ស​សង្គ្រោះ​ជាតិ​មិនអាច​រក្សា​សម្ព័ន្ធភាព​បានទេ ចប់​ហើយ​និ​ទាឃ​រដូវ​សម្រាប់​បក្សប្រឆាំង​នៅ​កម្ពុជា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ