ACU ទាត់ចោលបណ្តឹងបទពុករលួយលើមេដឹកនាំគ.ជ.ប
ចុះផ្សាយនៅថ្ងៃ៖
នៅព្រឹកថ្ងៃចន្ទនេះ ក្រុមការងារជំនាញរបស់អង្គភាពប្រឆាំងអំពើពុករលួយ(ACU) បានបើកកិច្ចប្រជុំពាក់ព័ន្ធនឹងពាក្យបណ្តឹងរបស់ លោក រស់ សារ៉ុម ប្រធានសមាគមជ័យលាភីបញ្ញាជន ដែលប្តឹងថ្នាក់ដឹកនាំ គ.ជ.ប អំពីរឿងពុករលួយ។ ក្រោយពីចំណាយពេលសួរដេញដោលប្រមាណជិតពីរម៉ោង អង្គភាពប្រឆាំងអំពើពុករលួយ បានសម្រេចមិនទទួលយកបណ្តឹងនេះនោះទេ។
លោកឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានលើកហេតុផលនៃការមិនទទួលយកពាក្យបណ្តឹងនេះថា គឺដោយសារតែសំណុំរឿងនេះអត់មានតម្រុយសូម្បីតែបន្តិចទាល់តែសោះ ក្នុងការឈានទៅដល់ការស៊ើបអង្កេត។ មួយវិញទៀត វាក៏អត់ពាក់ព័ន្ធនឹងអំពើពុករលួយនោះដែរ។ ការបដិសេធនេះ ធ្វើឡើង ក្រោយពីក្រុមការងារជំនាញផ្នែកពុករលួយ រួមទាំងម្ចាស់បណ្តឹងលោក រស់ សារ៉ុម និងតំណាងគណៈកម្មការធិការជាតិរៀបចំការបោះឆ្នោតផង បានជជែកដេញដោលគ្នាប្រមាណជាជិត២ម៉ោង។
លោក រស់ សារ៉ុម ប្រធានសមាគមជ័យលាភីបញ្ញាជនបានប្តឹង ថ្នាក់ដឹកនាំជាន់ខ្ពស់របស់គណៈកម្មាធិការជាតិរៀបចំការបោះឆ្នោត (គ.ជ.ប) ៤រូប គឺលោកស៊ិក ប៊ុនហុក ប្រធាន គ.ជ.ប លោក គួយ ប៊ុនរឿន អនុប្រធាន លោក ហង់ ពុទ្ធា អ្នកនាំពាក្យ និងលោក ម៉ៅ សុភារិទ្ធ អគ្គលេខាធិការរង គ.ជ.ប។ លោករស់ សារ៉ុមបានចោទពួកគេ ពីការឃុបឃិតគ្នាប្រព្រឹត្តអំពើពុករលួយក្នុងការតែងតាំង និងការធ្វើសមាហរណកម្ម មន្រ្តីរាជការក្នុងស្ថាប័នគណៈកម្មាធិការជាតិរៀបចំការបោះឆ្នោត ដែលបានប្រព្រឹត្តនៅក្នុងខែមករា ឆ្នាំ២០១៦។ នៅកិច្ចពិភាក្សាសួរដេញដោលគ្នា លោករស់ សារ៉ុម បានលើកឡើងជាច្រើនពីភាពមិនប្រក្រតីនៃការតែងតាំងមន្ត្រីរាជការក្នុងស្ថាប័ននេះ ដែលជាសែស្រឡាយជាមួយថ្នាក់ដឹកនាំ និងការទិញផ្ទះវីឡារបស់ថ្នាក់ដឹកនាំគ.ជ.បជាដើម។
លោកឱម យ៉ិនទៀង បានគូសបញ្ជាក់នៅចំពោះមុខលោករស់ សារ៉ុម ថាការតែងតាំងមន្ត្រីរាជការមិនត្រឹមត្រូវ គឺគួរតែមន្ត្រីនៅក្នុងស្ថាប័នគ.ជ.បទេ ជាអ្នកប្តឹងផ្តល់នោះ។ ជាមួយគ្នានេះ លោកក៏បានបញ្ជាក់ផងដែរថា ការបញ្ចូលសាច់ញាតិឲ្យធ្វើការជាមួយ គឺមិនទាន់មានច្បាប់ឯណាបានហាមឃាត់នោះឡើយ។ ដោយមើលឃើញថា ករណីទាំងនេះ មិនមានមូលដ្ឋានច្បាស់លាស់ និងមិនត្រូវនឹងដែនសមត្ថកិច្ចរបស់ខ្លួន លោកឱម យ៉ិនទៀង ក៏បានប្រកាសបដិសេធបណ្តឹងនេះចោលតែម្តងទៅ។ ចំណែក លោករស់ សារ៉ុម មិនបានជំទាស់អ្វីនឹងការសម្រេចនេះទេ តែលោកគ្រាន់តែស្នើឲ្យអង្គភាពប្រឆាំងអំពើពុករលួយចេញលិខិតបដិសេធជាផ្លូវការតែប៉ុណ្ណោះ។
ក្រោយអង្គភាពប្រឆាំងអំពើពុករលួយបដិសេធបណ្តឹងនេះ លោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ថា នៅពេលនេះ គ.ជ.ប មិនទាន់សម្រេចប្តឹងលោករស់ សារ៉ុម ទៅកាន់តុលាការពីបទបរិហារកេរ្តិ៍នៅឡើយទេ គឺកំពុងតែពិចារណា។ តែទោះជាយ៉ាងណា ប្រធានសមាគមជ័យលាភីបញ្ញាជន មិនបានខ្លាចរអានឹងការប្តឹងផ្តល់នេះទេ ផ្ទុយទៅវិញ លោកថែមទាំងជំរុញឲ្យគណៈកម្មាធិការជាតិរៀបចំការបោះឆ្នោតប្តឹងលោកទៅកាន់តុលាការចុះ ហើយលោកសុខចិត្តទៅតតាំងនៅក្នុងតុលាការតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ