កម្ពុជា

អង្គភាព​ប្រឆាំង​អំពើ​ពុក​រលួយ​កំណត់​ឲ្យ​សមាជិក​ក្រុម​ប្រឹក្សា​ឃុំ​សង្កាត់​ប្រកាស​ទ្រព្យ​សម្បត្តិ ក្នុង​រយៈ​ពេល​៣០​ថ្ងៃ

អង្គភាព​ប្រឆាំង​អំពើ​ពុក​រលួយ
អង្គភាព​ប្រឆាំង​អំពើ​ពុក​រលួយ

សមាជិក​ក្រុមប្រឹក្សា​ឃុំ​សង្កាត់​អាណត្តិ​ទី៤ ត្រូវ​តែប្រកាស​ទ្រព្យសម្បត្តិ​ និងបំណុល​របស់ខ្លួន​ទៅកាន់អង្គ​ភាព​ប្រឆាំង​អំពើពុក​រលួយ ចាប់ពីថ្ងៃ​ទី១៥​ កក្កដា​ ដល់​ ១៥សីហា។​ អង្គ​ភាព​ប្រឆាំង​អំពើ​ពុករលួយ​ បាន​ចេញ​សេចក្ដី​ជូន​ដំណឹង​នេះ​ នៅ​ថ្ងៃ​អង្គារ​ ទី​១១ ទៅ​ដល់​មន្ត្រី​ដែល​មាន​កាតព្វកិច្ច​ត្រូវ​ប្រកាស​ទ្រព្យ​សម្បត្តិ​ប្រមាណ​ជាង​៨​ពាន់​នាក់ ។

ផ្សាយពាណិជ្ជកម្ម

អត្ថបទ​ដោយៈ ទី​ កញ្ញា​ និង ប៊ុន​ សៅ​សុភនាថ​

សមាជិក​ក្រុម​ប្រឹក្សា​ឃុំ​សង្កាត់​នៅ​ទូទាំង​២៥ រាជធានី ខេត្ត​ ត្រូវ​ផ្ញើ​ឯកសារ​ទាំង​ឡាយ​ដែល​បញ្ជាក់​ចំនួន​ទ្រព្យ​សម្បត្តិ​របស់ខ្លួន​ ទៅតាមថ្ងៃ​កំណត់របស់អង្គភាព​ប្រឆាំង​អំពើពុករលួយ​។ សូមបញ្ជាក់​ថា អ្នក​ដែលជាប់កាតព្វ​កិច្ច​ប្រកាស​ ដែលមានចំនួន​សរុប​ ៨៦៥៩នាក់ គឺសំដៅលើអ្នក​ជាប់​ឆ្នោត​ថ្មី​ដែលមិនធ្លាប់​មានមុខតំណែង​ក្នុង​ក្រុម​ប្រឹក្សា​ឃុំ​សង្កាត់​ និង អ្នក​ដែល​លែង​មាន​តួ​នាទី​ជាសមាជិក​ក្រុម​ប្រឹក្សា​ឃុំសង្កាត់​។ នេះបើតាម​សេចក្តី​ជូន​ដំណឹង​របស់​នាយកដ្ឋាន​ប្រកាស​ទ្រព្យ​សម្បត្តិ​ និង​បំណុល​ នៃ​អង្គ​ភាព​ប្រឆាំង​អំពើពុករលួយ​។

លោកឱម​ យ៉ិន​ទៀង​ ប្រធាន​អង្គភាព​ប្រឆាំង​អំពើ​ពុករលួយ​ ធ្លាប់​បានគូស​បញ្ជាក់​ថា​ ការ​ប្រកាស​​ទ្រព្យ​សម្បត្តិ​របស់​មន្ត្រី​រាជការ​ មានសារៈសំខាន់​ក្នុង​ការអប់រំ​ និង​ទប់ស្កាត់​អំពើ​ពុករលួយ​។ ហើយនេះ​ជាមធ្យោបាយ​ស៊ើប​អង្កេត​ដ៏មាន​ប្រសិទ្ធិ​ភាព​ ពេល​មាន​បណ្តឹង​ទាក់ទង​រឿងពុករលួយ​ ក៏​ដូចជា​ ធ្វើ​ឲ្យ​មាន​ភាពងាយ​ស្រួល​ដល់ការ​អនុវត្ត​សាលក្រម​ ពេលរឹបអូស​ទ្រព្យសម្បត្តិ​ពុករលួយ​។

ទាក់ទង​នឹង​ច្បាប់​ប្រកាស​ទ្រព្យ​សម្បត្តិ​ ប្រសិន​បើមន្ត្រី​ជាប់ភារកិច្ច​ប្រកាស​ គេចវេស​ប្រកាស​ ឬមានកំណើន​ទ្រព្យ​សម្បត្តិ​ច្រើន​មិនអាច​ពន្យល់​បាន​ នោះ​នឹងត្រូវ​ពិន័យ​ជាទឹកប្រាក់​ រឹបអូសទ្រព្យ​សម្បត្តិ​ ឬ​អាច​ឈានដល់ការ​ជាប់​ពន្ធ​នាគារ​ទៀតផង​។

សូមជម្រាបថា សំណុំ​ឯកសារទ្រព្យ​សម្បត្តិ​អាចធ្វើ​ជាទម្រង់​អេឡិច​ត្រូនិក​ ដោយ​មាន​លេខ​សម្ងាត់ ឬ​ ធ្វើ​ជាលិខិត​ជា​ពីរ​ច្បាប់​តាមគំរូ​ដែល​កំណត់​ដោយ​អង្គភាព​ ហើយ​ដាក់​ក្នុង​ស្រោម​សំបុត្រ​ពីរ​ដាច់​ដោយ​ឡែក​ពីគ្នា ដែល​មួយ​ច្បាប់រក្សាទុក​ដោយ​សាមី​ខ្លួន និង​មួយច្បាប់​ទៀត​រក្សាទុក​នៅ​អង្គភាព​ប្រឆាំង​អំពើ​ពុករលួយ។

សូម​រំលឹក​ថា ច្បាប់​បញ្ញត្តិ​ស្តី​ពីការប្រកាស​ទ្រព្យ​សម្បត្តិ​បានចាប់ផ្តើម​អនុវត្ត​នៅក្នុង​ឆ្នាំ២០១១​ និង​ ត្រូវ​ធ្វើ​ជារៀងរាល់​២ឆ្នាំ​ម្តង​។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI