កម្ពុជា-កសិកម្ម

ស្ថាប័ន​ពាក់​ព័ន្ធ​មិន​អាច​អន្តរាគម​ភា្លមៗ​លើ​តម្លៃ​កសិផល

ការ​តវ៉ា​បិទ​ផ្លូវ ដើម្បី​សុំ​ការ​អន្តរាគមន៍​រក​តម្លៃ​ទីផ្សារ​ពោត និង​ដំឡូង​មី ដែល​កំពុង​ធ្លាក់​ថ្លៃ។
ការ​តវ៉ា​បិទ​ផ្លូវ ដើម្បី​សុំ​ការ​អន្តរាគមន៍​រក​តម្លៃ​ទីផ្សារ​ពោត និង​ដំឡូង​មី ដែល​កំពុង​ធ្លាក់​ថ្លៃ។

ក្រោយ​ពី​មាន​ការ​តវ៉ា​ទាម​ទារ​ឲ្យ​មាន​អន្តរាគមន៏​ជួយ​រក​តម្លៃ​ទី​ផ្សារ ដែល​ឈាន​ដល់​ការ​បិទ​ផ្លូវ​កាល​ពី​ម្សិល​មិញ ក្រសួង​ពាណិជ្ជកម្ម និង​ក្រសួង​កសិកម្ម​ឲ្យ​ដឹង​នៅ​ថ្ងៃ​នេះ​ថា ក្រសួង​មិន​ទាន់​មាន​លទ្ធភាព​ជួយ​ភ្លាមៗ​នោះ​ទេ និង​បាន​ហៅ​ការ​បិទ​ផ្លូវ​ថា​មិន​មែន​ជា​ដំណោះ​ស្រាយ​វៃ​ឆ្លាត​ទេ។

ផ្សាយពាណិជ្ជកម្ម

ឆ្លើយ​នឹង​សំនួរ​របស់​វិទ្យុ​បារាំង​អន្តរជាតិ ថា​តើ​មាន​ដំណោះ​ស្រាយ​បែប​ណា ដើម្បី​ជួយ​សម្រួល​ដល់​តម្លៃ​កសិផល​របស់​កសិករ កញ្ញា​សឹង សុផារី អ្នក​នាំ​ពាក្យ​ក្រសួង​ពាណិជ្ជកម្ម​បាន​ថ្លែង​ថា បើ​រដ្ឋាភិបាល​ធ្វើ​បែប​នេះ គឺ​នឹង​បបួល​គ្នា​(ប្រជាកសិករ)​ទៅ​សម្លាប់​ខ្លួន​ហើយ ព្រោះ​នេះ​គឺ​ជា​សេដ្ឋកិច្ច​ទីផ្សារ​សេរី។ អ្នក​នាំ​ពាក្យ​រូប​នេះ​បញ្ជាក់​ថា គេ​មិន​អាច​ជួយ​ឲ្យ​ឡើង​ថ្លៃ​ភ្លាមៗ​នោះ​ទេ តែ​ត្រូវ​ការ​ជំហាន​ជា​ច្រើន ដើម្បី​ដើរ​ដល់​ចំណុច​នេះ។

សូម​ជម្រាប​ជូន​ថា កាល​ពី​ថ្ងៃ​ទី​១៣ ខែ​កក្កដា នៅ​ស្រុក​កំរៀង ខេត្ត​បាត់ដំបង​ប្រជាពលរដ្ឋ​បាន​ផ្ទុះ​ការ​តវ៉ា​បិទ​ផ្លូវ ដើម្បី​សុំ​ការ​អន្តរាគមន៍​រក​តម្លៃ​ទី​ផ្សារ​ពោត និង​ដំឡូង​មី ដែល​កំពុង​ធ្លាក់​ថ្លៃ។ ក្រោយ​មក​ការ​តវ៉ា​នេះ ក៏​បាន​រំសាយ​ទៅ​វិញ បន្ទាប់​ពី​មាន​ការ​អន្តរាគម​ពី​អភិបាល​ខេត្ត​បាត់ដំបង។

នៅ​ថ្ងៃ​ទី​១៤ ​ខែ​កក្កដា​នេះ លោក​ច័ន្ទ សុផល អភិបាល​ខេត្ត​បាត់ដំបង​បាន​បញ្ជាក់​ប្រាប់​វិទ្យុ​បារាំង​យ៉ាង​ខ្លី​ថា ពេល​នេះ លោក​កំពុង​តែ​ប្រជុំ​ដោះ​ស្រាយ​លើ​បញ្ហា​កសិផល​របស់​ប្រជាកសិករ ដែល​បាន​តវ៉ា ក្នុង​ស្រុក​កំរៀង។

អ្នក​នាំ​ពាក្យ​ក្រសួង​កសិកម្ម​លោក​ហ៊ាន វណ្ណហន បញ្ជាក់​ថា​បញ្ហា​តម្លៃ​នេះ​គឺ​លោក​មិន​ចេះ​ទេ​ ហើយ​លោក​បញ្ជាក់​ទៀត​ថា​លោក​មិន​មាន​ការងារ​ទទួល​ខុស​ត្រូវ​លើ​រឿង​នេះ​ដែរ។ ប៉ុន្តែ​លោក​បន្ថែម​ថា ប្រសិន​បើ​កសិករ​ជួប​បញ្ហា ហើយ​មាន​កិច្ច​សន្យា​ជាមួយ​នឹង​ភាគី​មួយ​ទៀត ដែល​មាន​ការ​ចូល​រួម​ពី​នាយកដ្ឋាន​កសិកម្ម នោះ​នាយកដ្ឋាន​កសិកម្ម​នឹង​ចូល​រួម​ដោះ​ស្រាយ។

លោក​ច័ន្ទ សុផល អ្នក​សេដ្ឋកិច្ច និង​ជា​នាយក​មជ្ឈមណ្ឌល​សិក្សា​គោល​នយោបាយ​បាន​លើក​ឡើង​ថា តម្លៃ​កសិផល​គឺ​តែង​តែ​មាន​ឡើង​មាន​ចុះ ហើយ​លោក​មិន​ឯកភាព​ទេ​ចំពោះ​ការ​លើក​ឡើង​ថា ឲ្យ​តែ​កសិករ​ផលិត​បាន តម្លៃ​កសិផល​ធ្លាក់​ចុះ។ លោក​បន្ថែម​ថា​ការ​ចុះ​ថ្លៃ​កសិផល​នេះ គឺ​ជា​បញ្ហា​របស់​ពិភព​លោក​ទាំង​មូល​តែ​ម្តង។ លោក​លើក​ឡើង​ថា ដំណោះ​ស្រាយ​លើ​បញ្ហា​នេះ គឺ​អាស្រ័យ​លើ​រដ្ឋាភិបាល ពោល​គឺ​រដ្ឋ​អាច​ទិញ​ស្តុប​ទុក​នៅ​កន្លែង​ណា​មួយ ដើម្បី​លក់​ចេញ​នៅ​ពេល​ដែល​ផលិតផល​ទាំង​នោះ​មាន​តម្លៃ​ឡើង​វិញ។

គួរ​បញ្ជាក់​ថា កាល​ពី​ខែ​កញ្ញា ឆ្នាំ​២០១៦ កន្លង​ទៅ ​ក៏​មាន​កសិករ​​ ស្រុក​សង្កែ ​ខេត្ត​បាត់​ដំបង ​ប្រមាណ​៤០០​នាក់​ បាន​ប្រមូល​ផ្តុំ​គ្នា ​យក​គោ​យន្ត​ដឹក​ស្រូវ ​ដាក់​ពង្រាយ​លើ​ផ្លូវ​ជាតិ​លេខ​៥ ​ដើម្បី​បិទ​ផ្លូវ​ក្នុង​គោល​បំណង​ទាម​ទារ​តម្លៃ​ស្រូវ​​ដែល​រដ្ឋ​បាន​កំណត់​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI