អានតួអត្ថបទ
កម្ពុជា-អាស៊ាន

សមាជិក​សភា​អាស៊ាន​ដើម្បី​សិទិ្ធ​មនុស្ស៖ អនាគត​នៃ​លទ្ធិ​ប្រជា​ធិបតេយ្យ​តំបន់​អាស៊ាន​ស្ថិត​ក្នុង​ហានិភ័យ

សេចក្តី​ថ្លែងការណ៍​របស់សមាជិក​សភា​អាស៊ាន​ដើម្បី​សិទិ្ធ​មនុស្ស​ថ្ងៃទី១៩ ខែកញ្ញា​
សេចក្តី​ថ្លែងការណ៍​របស់សមាជិក​សភា​អាស៊ាន​ដើម្បី​សិទិ្ធ​មនុស្ស​ថ្ងៃទី១៩ ខែកញ្ញា​ RFI
ដោយ៖ សឿង ភារៈ
១៤ នាទី

នៅ​ថ្ងៃ​ទី១៩ ខែ​កញ្ញា​នេះ សមាជិក​សភា​អាស៊ាន​ដើម្បី​សិទិ្ធ​មនុស្ស​(APHR) បាន​លើក​ឡើង​ក្នុង​សេច​ក្តី​ថ្លែង​ការណ៍​ថា​តំបន់​អាស៊ាន​ប្រឈម​នឹង​វិបត្តិ​សិទ្ធិ​មនុស្ស ហើយ​អនាគត​នៃ​លទ្ធិ​ប្រជា​ធិបតេយ្យ​​ស្ថិត​​ក្នុង​ហានិភ័យ​។ ការ​លើក​ឡើង​នេះ បន្ទាប់​ពី​ប្រទេស​មួយ​ចំនួន​នៅ​ក្នុង​តំបន់​អាស៊ាន​កំពុង​មាន​ការំ​លោភ​សិទ្ធិ​មនុស្ស ការចាប់​ខ្លួនមេដឹក​នាំ​គណបក្ស​ប្រឆាំង និង​អ្នក​រិះគន់​រដ្ឋាភិបាល ក្នុង​នោះ​ក៏​មាន​កម្ពុជា​ដែរ​។

ផ្សាយពាណិជ្ជកម្ម

ពី​ក្រុង​ម៉ានីល ប្រធាន​សមាជិក​សភា​អាស៊ាន​ដើម្បី​សិទិ្ធ​មនុស្ស លោក Charles Santiago បាន​លើក​យក​បញ្ហា​នៅ​ក្នុង​ប្រទេស​អាស៊ាន​មួយ​ចំនួន​ដូច​ជា រដ្ឋាភិបាល​យោធា​នៅ​ក្នុង​ប្រទេស​ថៃ ដែល​បង្ហាញ​ការ​មិន​បោះ​បង់​ចោល​អំណាច​របស់​ខ្លួន បញ្ហា​ប្រល័យ​ពូជ​សាសន៍​នៅ​ក្នុង​ប្រទេស​ភូមា​ជា​ដើម​។

លោក​បន្ថែម​ថា​នៅ​ក្នុង​ប្រទេស​ហ្វីលីពីន​វិញ នីតិរដ្ឋ និង​គណនេយ្យ​ភាព​ហាក់​ដូច​ជា​ត្រូវ​បាន​គេ​ដក​ចេញ​ទាំង​ស្រុង ក្នុង​បរិបទ​សង្គ្រាម​ប្រឆាំង​គ្រឿង​ញៀន​របស់​រដ្ឋាភិបាល​។ ដោយ​ឡែក​នៅ​កម្ពុជា មាន​ការ​វាយ​ប្រហារ​មិន​ធ្លាប់​មាន មក​លើ​គណបក្ស​ប្រឆាំង និង​អង្គការ​សង្គម​ស៊ីវិល​។

សមាជិក​សភា​អាស៊ាន​ដើម្បី​សិទិ្ធ​មនុស្ស (APHR) ក៏​បាន​រំលឹក​ឡើង​វិញ​នូវ​ការ​អំពាវនាវ​របស់​ខ្លួន​ឱ្យ​មាន​ការ​ដោះ​លែង​ជា​បន្ទាន់ និង​ដោយ​គ្មាន​លក្ខខណ្ឌ ដូច​ជា​ប្រធាន​គណបក្ស​ប្រឆាំង​នៅ​កម្ពុជា​លោក​កឹម​សុខា ដែល​ត្រូវ​បាន​ចាប់​ខ្លួន​ដោយ​ចោទ​ប្រកាន់​ពី​បទ​ក្បត់​ជាតិ​។

លោក​ផៃ ស៊ីផាន អ្នក​នាំ​ពាក្យ​ទីស្តី​ការ​គណៈរដ្ឋ​មន្ត្រី​កម្ពុជា​ថា ការ​លើក​ឡើង​របស់​សមាជិក​សភា​អាស៊ាន​ដើម្បី​សិទ្ធិ​មនុស្ស គឺ​មិន​ឆ្លុះ​បញ្ចាំង​ការ​ពិត​ជាក់​ស្តែង​នៅ​ក្នុង​ប្រទេស​កម្ពុជា ដែល​ជា​សមាជិក​អាស៊ាន​នោះ​ទេ​។ លោក​ផៃ ស៊ីផាន​ថា​ នៅ​ក្នុង​អាស៊ាន​កម្ពុជា​មាន​ពហុបក្ស មាន​ការ​រៀប​ចំការ​បោះ​ឆ្នោត​ទៀង​ទាត់​ពេល​វេលា​។

លោក​បន្ថែម​ការ​បិទ​អង្គការ​មួយ​ចំនួន​នៅ​ក្នុង​ប្រទេស​កម្ពុជា​កន្លង​មក ដោយ​សារ​តែ​អង្គការ​ទាំង​នោះ ​ធ្វើ​ខុស​ច្បាប់​នៅ​ក្នុង​ប្រទេស​កម្ពុជា​។ ការ​បិទ​កាសែត​ខេម​បូឌាដេលី​កន្លង​មក ដោយ​សារ​កាសែត​នេះ មិន​បាន​បង់​ពន្ធ​ឲ្យ​រដ្ឋ។ ចំពោះ​ការ​បិទ​វិទ្យុ​ក្នុង​ស្រុក​ដទៃ​ទៀត គឺ​ដោយ​សារ​ពួក​គេ​មិន​គោរព​គោល​ការណ៍​របស់​ក្រសួង​ព័ត៌មាន​។

សូម​ជម្រាប​ជូន​ថា​ក្រៅ​ពី​សមាជិក​សភា​អាស៊ាន​ដើម្បី​សិទិ្ធ​មនុស្ស (APHR) អង្គការ​ក្រៅ​រដ្ឋាភិបាល​កម្ពុជា និង​សហគមន៍​អន្តរជាតិ​មួយ​ចំនួន​ទៀត​ក៏​បាន​ចេញ​សេច​ក្តី​ថ្លែង​ការណ៍​ជា​បន្ត​បន្ទាប់​បង្ហាញ​ការ​ព្រួយ​បារម្ភ​របស់ខ្លួន​ចំពោះ​ប្រជាធិប​តេយ្យ​នៅ​ជា​កម្ពុជា​ដែរ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ