អានតួអត្ថបទ
កម្ពុជា

សាលា​ក្រុង​កំពុង​ធ្វើ​ការ​រៀប​ចំ​បន្ថែម​សេវា​ធ្វើ​ដំណើរ​សាធារណៈ​ដល់​ប្រជាពលរដ្ឋ

រថយន្ត​ក្រុង​ថ្មី​ដែល​ចិន​ផ្តល់​ជា​ជំនួយ
រថយន្ត​ក្រុង​ថ្មី​ដែល​ចិន​ផ្តល់​ជា​ជំនួយ
១២ នាទី

បន្ទាប់​ពី​ទទួល​បាន​ជំនួយ​ឧបត្ថម្ភ​រថយន្ត​ថ្មី​១០០​គ្រឿង​ពី​រដ្ឋា​ភិបាល​ចិន​ កាល​ពី​ថ្ងៃ​ទី​១៣ កក្កដា ​ឆ្នាំ២០១៧​កន្លង​ទៅ សាលាក្រុង​ភ្នំពេញ​មាន​គោលដៅ​ដាក់​ផ្លូវ​ឡាន​ក្រុង​បន្ថែម ៧​ខ្សែ ទៅ​លើ​ផ្លូវ​ចាស់​៣ខ្សែ ឲ្យ​គ្រប់​១០​ខ្សែ សម្រាប់​ឲ្យ​សាធារណជន​ទាំងអស់​អាច​ចូល​រួម​ប្រើ​ប្រាស់​សេវា​ដឹក​ជញ្ជូន​នេះ ដើម្បី​កាត់​បន្ថយ​ការ​ស្ទះ​ចរាចរណ៍​ និង​ការ​ចំណាយ​ច្រើន។

ផ្សាយពាណិជ្ជកម្ម

អត្ថបទដោយ ប៊ុន សៅសុភនាថ

លោក​ម៉េត មាស​ភក្តី អ្នក​នាំ​ពាក្យ​សាលាក្រុង​រាជធានី​ភ្នំពេញ បាន​ប្រាប់​វិទ្យុ​បារាំង​អន្តរជាតិ នៅ​ព្រឹក​ថ្ងៃព្រហស្បតិ៍ ថា​សាលាក្រុង​នឹង​បង្កើត​ឲ្យ​មាន​រថយន្ត​ក្រុង​រត់​លើ​ផ្លូវ​សរុប​ចំនួន​១០ ខ្សែ។ លោក​បាន​បន្តថា ការ​ធ្វើ​បែបនេះ​គឺ​ត្រូវ​ធ្វើ​ជា​ដំណាក់​កាល ហើយ​ពេល​នេះ ជា​ដំណាក់​កាល​ទី១ ដែល​សាលា​ក្រុង​នឹងបន្ថែម ៣​ខ្សែ​សិន។

រថយន្ដ​១០០គ្រឿង ដែល​ក្នុង​នោះមាន ៩៨គ្រឿង​ជា​រថយន្ត​ដឹក​អ្នកដំណើរ នឹងយក​មក​ជំនួស​រថយន្តក្រុង​ចាស់ៗទាំងអស់ ដែលកំពុង​ប្រើប្រាស់​សព្វ​ថ្ងៃ ហើយ​ឡាន​ចាស់​ទាំងនោះ ត្រូវ​យក​ទៅ​ជួសជុល​ឡើង​វិញ។ សូម​បញ្ជាក់​ថា ខ្សែឡាន​កំពុង​ដំណើរ​ការ​ទាំង​៣ខ្សែ មាន​ឡាន​ក្រុង​ចំនួន ៥៧​គ្រឿង ធ្វើដំណើរ​ជា​ប្រចាំ។

ទាក់ទង​ទៅ​នឹង​ការ​បើក​សម្ពោធ​ឲ្យ​ប្រើប្រាស់​ផ្លូវ​ឡាន​ក្រុង ៣ខ្សែ​ថ្មី​នោះ មិន​ទាន់​មាន​ការដាក់​កំណត់ច្បាស់​លាស់ទេ ព្រោះត្រូវ​នៅ​ចាំ​រថយន្តចាស់ៗ​ឲ្យ​ជួសជុល​រួចរាល់​សិន ទើប​បើក​ឲ្យទាំង​ឡាន​ចាស់ និង​ថ្មី រត់​ព្រម​គ្នា​លើ​ផ្លូវ​ទាំង​៦​ ខ្សែ​តែម្តង។

ទោះ​យ៉ាង​ណា​ក៏ដោយ លោក​ម៉េត មាស​ភក្តី ថា​ មិន​មាន​ចំនួន​បញ្ជាក់​ពី​ការ​ចំណាយ​ទៅ​លើ​សេវាកម្ម​ដឹក​ជញ្ជូន​សាធារណៈ​នេះទេ។ តែ​លោក​ថា ការ​ដែល​ដាក់​សេវា​ដឹកជញ្ជូន​ឲ្យ​មាន​តម្លៃ​ទាប ត្រឹម​តែ១៥០០​រៀលក្នុង​មួយ​នាក់ គឺដើម្បី​ជួយ​សម្រួល​ការចំណាយ​របស់​ពលរដ្ឋ​ ក្នុង​ការ​ធ្វើ​ដំណើរ​ជាង​រៀងរាល់​ថ្ងៃ។ លោក​ក៏​បាន​រំពឹង​ថា នឹង​មាន​ប្រជាពលរដ្ឋ​ច្រើន​ជាងមុន ប្រើប្រាស់​ឡានក្រុង​ថ្មី​ទាំង​នេះ ហើយ​ក៏អាច​កាត់បន្ថយ​ការកកស្ទះ​ចរាចរណ៏​យានជំនិះ​លើ​ដង​ផ្លូវ​ផង​ដែរ។

សូម​ជំរាប​ថា សាលា​ក្រុង​រាជធានី​ភ្នំពេញ​នឹង​ប្រកាស​ជា​សាធារណៈ​ឲ្យ​ប្រជាពលរដ្ឋ​បាន​ដឹង​ពី​ទីតាំង​ខ្សែ​ឡានក្រុង​ថ្មី នៅ​ពេល​រៀប​ចំ​ផ្លូវ និង​ចំណត​រង់​ចាំ​រួច៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ