កម្ពុជា

សាលាក្រុង​ភ្នំពេញ​៖ រថយន្ត​ធុនធ្ងន់​ទាំង​អស់ មិន​អនុញ្ញាត​ឲ្យ​ចូល​ទីក្រុង​ភ្នំពេញ ចាប់​ពី​ឆ្នាំ ២០១៦!

ចរាចរណ៍​ណែនណាន់តាន់តាប់​ដោយគ្មានការគោរពច្បាប់ធ្វើឲ្យ​ស្ទះផ្លូវនៅក្នុងរាជធានី​ភ្នំពេញ
ចរាចរណ៍​ណែនណាន់តាន់តាប់​ដោយគ្មានការគោរពច្បាប់ធ្វើឲ្យ​ស្ទះផ្លូវនៅក្នុងរាជធានី​ភ្នំពេញ RFI/Siv Channa
១០ នាទី

សាលារាជធានី​ភ្នំពេញ ប្រកាស​ថា​នឹង​មិន​អនុញ្ញាត​ឲ្យ​រថយន្ត​ធន់​ធ្ងន់​ទាំង​អស់ រួម​មាន​រថយន្ត​ក្រុង​ដឹក​អ្នក​ដំណើរ​ និង​រថយន្ត​ដឹក​ទំនិញ ចេញ-ចូល​ក្នុង​ទីក្រុង​ភ្នំពេញ ចាប់​ពី​ឆ្នាំ​២០១៦​តទៅ ហើយ​តម្រូវ​ឲ្យ​មាន​ការ​បង្កើត​ចំណត​ក្រៅ​ក្រុង។ បំរាម​នេះ ត្រូវ​បាន​លើក​ធ្វើ​ឡើង នៅ​ក្នុង​កិច្ច​ប្រជុំ ស្តីពី​បញ្ហា​ក្រុមហ៊ុន​ដឹក​ជញ្ជូន​ធន់ធ្ងន់ និង​ក្រុមហ៊ុន​ដឹក​ជញ្ជូន​អ្នក​ដំណើរ កាល​ពី​ថ្ងៃ​ទី ២០សីហា​ម្សិលមិញ។

ផ្សាយពាណិជ្ជកម្ម

លោក​ឃួង ស្រេង អភិបាល​រងរាជធានី​ភ្នំពេញ បាន​ប្រាប់​វិទ្យុ​បារាំង​បន្ថែម នៅ​ព្រឹក​ថ្ងៃ​សុក្រ​នេះ​ថា ស្រប​នឹង​បំរាម​នេះ សាលារាជធានី ក៏​កំពុង​តែ​សិក្សា​ពីការ​រក​ទីតាំង​ចំណត សម្រាប់​ក្រុមហ៊ុន​ដឹក​ជញ្ជូន​ទាំង​នោះ​ផង​ដែរ។ ហើយ​សាលាក្រុង នឹង​ផ្តល់​ឲ្យ​មាន​ចំណត​រថយន្ត​ក្រុង​ជា​សាធារណៈ​គ្រប់​ខ្សែ ដើម្បី​សម្រួល​ដល់​អ្នក​ដំណើរ​ ដែល​ត្រូវ​ទៅរក​សេវារថយន្ត​ក្រុង​ទៅ​តាម​ខេត្ត​ទាំង​នោះ។ ការ​មិន​អនុញ្ញាត​ឲ្យ​រថយន្ត​ក្រុង ឬ​រថយន្ត​ដឹក​ទំនិញ ធន់ធំ ចូល​ក្នុង​ក្រុង​នេះ ត្រូវ​បាន​លោក​ឃួង ស្រេង ពន្យល់​ពី​មូលហេតុ និង​អត្ថប្រយោជន៍​ថា៖ សម្លេងលោក​ឃួង ស្រេង

បើ​តាម ប្រធាន​មន្ទីរ​សាធារណការ និង​ដឹកជញ្ជូន រាជធានី​ភ្នំពេញ បាន​ឲ្យ​ដឹង​ថា រហូត​មក​ដល់​ពេល​នេះ ​មាន​ក្រុម​ហ៊ុន​ដឹក​ទំនិញ និង​ក្រុមហ៊ុន​ដឹកជញ្ជូន​អ្នកដំណើរ​ ប្រមាណ​ ៦០​ក្រុមហ៊ុន បាន​ចុះ​បញ្ជី​ត្រឹមត្រូវ​ ជា​មួយ​មន្ទីរ​សាធារណការ។ ហើយ​កន្លង​មក មន្ទីរ​បាន​ចេញ​ប័ណ្ណ​អនុញ្ញាត សំរាប់​រថយន្ត​ដឹកជញ្ជូន​ធុន​ធំ​ បាន​ចំនួន​ជាង ៨ពាន់២០០រថយន្ត។ លើស​ពី​ផែនការ​ខាង​លើ​នេះ ដើម្បី​កាត់​បន្ថយ​ការ​កក​ស្ទះ​ចរាចរណ៍​ក្នុង​ទីក្រុង សាលា​រាជធានី​ភ្នំពេញ នឹង​ពង្រីក​ការ​អភិវឌ្ឍ ហេដ្ឋារចនាសម្ព័ន្ធ​ផ្លូវ​ថ្នល់ បង្កើន​ផ្លូវ​ក្រវាត់​ក្រុង​ជា​បន្តបន្ទាប់ ឱ្យអស់​នៅ​ឆ្នាំ​២០១៦។ ហើយ​សាលាក្រុង ក៏​មាន​គម្រោង​បង្កើត​ផ្លូវ​ដែក​លើ​អាកាស ៣ខ្សែ ឲ្យ​បាន​យ៉ាងយូរ ៥ឆ្នាំទៀត៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI