កម្ពុជា-នយោបាយ

គណបក្ស​សង្រ្គោះ​ជាតិ​នឹង​កោះ​ប្រជុំ​គណៈអចិន្ត្រៃយ៍​នៅ​សប្តាហ៍​ក្រោយ លើ​ករណី​អនុប្រធាន ៣​រូប

រូបភាពតំណាង៖ លោកកឹម​ សុខា ថ្លែង​ក្នុង​ទី​ស្នាក់​ការ​កណ្ដាល​គណបក្ស​សង្គ្រោះជាតិ​ក្នុង​វគ្គបណ្ដុះបណ្ដាលថ្នាក់​ដឹកនាំ​ខេត្ត​កណ្ដាលកាលពី​ពេល​កន្លង​មក
រូបភាពតំណាង៖ លោកកឹម​ សុខា ថ្លែង​ក្នុង​ទី​ស្នាក់​ការ​កណ្ដាល​គណបក្ស​សង្គ្រោះជាតិ​ក្នុង​វគ្គបណ្ដុះបណ្ដាលថ្នាក់​ដឹកនាំ​ខេត្ត​កណ្ដាលកាលពី​ពេល​កន្លង​មក @Kem Sokha

គណបក្ស​សង្រ្គោះ​ជាតិ នឹង​កោះ​ប្រជុំ​សមាជិក​គណៈកម្មាធិការ​អចិន្រ្តៃយ៍​របស់​ខ្លួន​នៅ​សប្តាហ៍​ក្រោយ​នេះ ដើម្បី​ជជែក​គ្នា​ឡើង​វិញ ជុំវិញ​បញ្ហា​បេក្ខភាព​អនុប្រធាន ៣​រូប​របស់​គណបក្ស​ប្រឆាំង។ ការ​កោះ​ប្រជុំ​នេះ គឺ​បន្ទាប់​ពី​ក្រសួង​មហាផ្ទៃ បាន​ប្រកាស​មិន​ទទួល​ស្គាល់​នូវ​បេក្ខភាព​អនុប្រធាន​គណបក្ស​ទាំង ៣​រូប ដោយ​អះអាង​ថា ការ​ជ្រើស​រើស​នោះ​ ខុស​នឹង​លក្ខន្តិកៈ​របស់​គណបក្ស​សង្រ្គោះ​ជាតិ​ដែល​តម្កល់​ទុក​នៅ​ឯ​ក្រសួង​មហាផ្ទៃ។

ផ្សាយពាណិជ្ជកម្ម

កិច្ច​ប្រជុំ​របស់​គណៈកម្មាធិការ​អចិន្រ្តៃយ៍​គណបក្ស​សង្រ្គោះ​ជាតិ​នៅ​សប្តាហ៍​ក្រោយ​នេះ នឹង​ធ្វើ​ឡើង​ក្រោម​វត្តមាន​របស់​លោក​ កឹម​ សុខា ប្រធាន​គណបក្ស​សង្រ្គោះ​ជាតិ ដើម្បី​សម្រេច​ជា​ថ្មី​លើ​បញ្ហា​បេក្ខភាព​អនុប្រធាន ៣​រូប ដែល​ត្រូវ​បាន​ច្រាន​ចោល​ដោយ​ក្រសួង​មហាផ្ទៃ។

មន្រ្តី​ជាន់​ខ្ពស់​គណបក្ស​សង្រ្គោះ​ជាតិ លោក ប៉ុល ហំម បាន​ថ្លែង​ប្រាប់​វិទ្យុ​បារាំង​អន្តរជាតិ RFI នៅ​ថ្ងៃ​អង្គារ​នេះ​ថា កិច្ច​ប្រជុំ​គណៈកម្មាធិការ​អចិន្រ្តៃយ៍​នេះ នឹង​ធ្វើ​ឡើង​នៅ​ក្រោយ​ពី​បិទ​បញ្ចប់​ពិធី​បុណ្យ​ចូល​ឆ្នាំ​ថ្មី​នៅ​ចុង​សប្តាហ៍​នេះ នឹង​ក្រោយ​ពី​ការ​វិល​ត្រលប់​មក​ពី​បំពេញ​ទស្សនកិច្ច​នៅ​ក្រៅ​ប្រទេស​វិញ​របស់​លោក កឹម​ សុខា និង​មន្រ្តី​ជាន់​ខ្ពស់​គណបក្ស​ប្រឆាំង​ជា​ច្រើន​រូប​ទៀត ដែល​ក្នុង​នោះ​ក៏​មាន​លោក​ស្រី មួរ សុខហួរ និង​លោក អេង ឆៃអ៊ាង ផង​ដែរ។
នៅ​ថ្ងៃ​នេះ លោក កឹម សុខា និង​លោក អេង ឆៃអ៊ាង ដែល​កំពុង​ស្ថិត​នៅ​ក្នុង​ប្រទេស​ណូវ៉េសេឡង់ ដើម្បី​ជួប​ពិភាក្សា​ការងារ​ជាមួយ​សមាជិក​រដ្ឋសភា​នៃ​ប្រទេស​នេះ។ ចំណែក​ឯ​លោកស្រី មួរ សុខហួរ កំពុង​ស្ថិត​នៅ​ក្នុង​ប្រទេស​បារាំង។

សូម​បញ្ជាក់​ថា ការ​ជ្រើស​រើស​ក្បាល​ម៉ាស៊ីន​ថ្មី​ដឹក​នាំ​គណបក្ស​ប្រឆាំង បាន​ជួប​នឹង​បញ្ហា​ជា​ថ្មី ក្រោយ​ពី​លិខិត​របស់​ក្រសួង​មហាផ្ទៃ ចុះ​ថ្ងៃ​ទី ៥ មេសា ​បាន​ទទួល​យក​ការ​លុប​ចោល​ពាក្យ​ស្លោក “ដូរ​មេឃុំ​បម្រើ​បក្ស ដាក់​មេឃុំ​បម្រើ​រាស្រ្ត” និង​យល់​ព្រម​ទទួល​ស្គាល់​លោក កឹម សុខា ជា​ប្រធាន​ថ្មី របស់​បក្ស​សង្គ្រោះ​ជាតិ, ប៉ុន្តែ​លិខិត​នោះ មិន​បាន​ទទួល​ស្គាល់ លោក ប៉ុល ហំម លោកស្រី មួរ សុខហួរ និងលោក អេង ឆៃអ៊ាង ជា​អនុប្រធាន​គណបក្ស​សង្រ្គោះ​ជាតិ តាម​រយៈ​សមាជ​វិសាមញ្ញ​របស់​គណបក្ស ចុះ​ថ្ងៃ​ទី​ ២​មីនា​នោះ​ទេ។ ត្បិត​ការ​ជ្រើស​តាំង​នោះ​ គឺ​វា​ខុសនឹង​ប្រការ​ ៤៧​ថ្មី​នៃ​លក្ខន្តិកៈ​របស់​គណបក្ស​សង្គ្រោះ​ជាតិ ដោយសារ​តែ​ការ​ជ្រើស​តាំង​នេះ វា​ហួស​រយៈ​ពេល ​៣០ថ្ងៃ គិត​ចាប់​ពី​ថ្ងៃ​ដែល​លោក សម រង្ស៊ី បាន​លា​លែង​ពី​ប្រធាន​គណបក្ស​មក។

លោក ខៀវ សុភ័គ អ្នក​នាំ​ពាក្យ​ក្រសួង​មហាផ្ទៃ​បាន​ថ្លែង​ថា ឲ្យ​តែ​គណបក្ស​សង្រ្គោះ​ជាតិ អនុវត្ត​ទៅ​តាម​លក្ខន្តិកៈ​របស់​គណបក្ស​ដែល​មាន​តម្កល់​ទុក​នៅ​ឯ​ក្រសួង​មហាផ្ទៃ នោះ​បញ្ហា​នឹង​ត្រូវ​បញ្ចប់។ ប៉ុន្តែ​លោក​បាន​បដិសេធ​អត្ថាធិប្បាយ​ទៅ​នឹង​សំណួរ​ថា តើ​គណបក្ស​សង្រ្គោះ​ជាតិ​គួរ​ធ្វើ​បែប​ណា ដើម្បី​ឲ្យ​ត្រូវ​នឹង​ការ​ចង់​បាន​របស់​ក្រសួង​មហាផ្ទៃ​នោះ?

សូម​បញ្ជាក់​ដែរ​ថា បើ​គ្មាន​ការ​ប្រែ​ប្រួល​ទេ លោក កឹម​ សុខា ប្រធាន​គណបក្ស​សង្រ្គោះ​ជាតិ នឹង​វិល​ត្រលប់​មក​ពី​បំពេញ​ទស្សនកិច្ច​នៅ​ក្រៅ​ប្រទេស​វិញ នៅ​ថ្ងៃ​ទី​ ១៨ ឬ ១៩​មេសា ខាង​មុខ ដើម្បី​ដឹក​នាំ​កិច្ច​ប្រជុំ​នេះ។ នេះ​បើ​តាម​ការ​បញ្ជាក់​ពី​លោក ប៉ុល ហំម៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI