គណៈកម្មការទី១នៃរដ្ឋសភា គ្រោងកោះហៅរដ្ឋមន្ដ្រីក្រសួងយុត្តិធម៌ទៅបំភ្លឺពីឯករាជ្យភាពនៃប្រព័ន្ធតុលាការ
ចុះផ្សាយនៅថ្ងៃ៖ កែប្រែថ្ងៃទី៖
គណៈកម្មការទី១នៃរដ្ឋសភា គ្រោងកោះហៅរដ្ឋមន្ដ្រីក្រសួងយុត្តិធម៌ទៅបំភ្លឺអំពីឯករាជ្យភាពនៃប្រព័ន្ធតុលាការកម្ពុជា នៅខែមីនាខាងមុខ។ នេះបើតាមការឲ្យដឹងពីលោក អេង ឆៃអ៊ាង ប្រធានគណៈកម្មការទី១នៃរដ្ឋសភា ទទួលបន្ទុកសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា-ព្រឹទ្ធសភា។ តាមរយៈការកោះហៅនេះ លោក អេង ឆៃអ៊ាង សង្ឃឹមថា វានឹងជួយជំរុញឲ្យមានយុត្តិធម៌នៅក្នុងប្រព័ន្ធតុលាការ ក៏ដូចជាកាត់បន្ថយការរំលោភសិទ្ធិមនុស្សនៅកម្ពុជា។
មូលហេតុដែលជំរុញឲ្យគណៈកម្មការទី១នៃរដ្ឋសភា កោះហៅរដ្ឋមន្ដ្រីក្រសួងយុត្តិធម៌ទៅបំភ្លឺ គឺដោយសារតែភាពឯករាជ្យនៃប្រព័ន្ធតុលាការកម្ពុជា បានទទួលរងការរិះគន់ និងត្អូញត្អែរជាច្រើនពីសំណាក់សាធារណៈមតិ ទាំងជាតិនិងអន្ដរជាតិ។ ការកោះហៅនេះ គឺជាកិច្ចខិតខំប្រឹងប្រែងមួយរបស់គណៈកម្មការទី១ ដើម្បីជំរុញឲ្យប្រព័ន្ធតុលាការកម្ពុជា មានភាពឯករាជ្យ ប្រាសចាកផុតពីអំពើពុករលួយ និងឥទ្ធិពលនយោបាយ។
នៅក្នុងកិច្ចសន្ទនាតាមទូរសព្ទជាមួយវិទ្យុបារាំង លោក អេង ឆៃអ៊ាង ប្រធានគណៈកម្មការទី១នៃរដ្ឋសភា បង្ហាញពីសង្ឃឹមថា ចំណាត់ការនេះ នឹងជួយជំរុញឲ្យមានយុត្តិធម៌នៅក្នុងប្រព័ន្ធតុលាការ ក៏ដូចជាកាត់បន្ថយការរំលោភសិទ្ធិមនុស្សនៅកម្ពុជា។
ការកោះហៅរដ្ឋមន្ដ្រីក្រសួងយុត្តិធម៌ទៅបំភ្លឺពីរឿងឯករាជ្យភាពនៃប្រព័ន្ធតុលាការ ត្រូវបានប្រធានគណៈកម្មការទី១នៃរដ្ឋសភា គ្រោងធ្វើឡើងនៅខែមីនាខាងមុខនេះ។
មិនមែនមានតែគណៈកម្មការទី១នៃរដ្ឋសភាប៉ុណ្ណោះទេ ដែលយកចិត្តទុកដាក់ពីប្រព័ន្ធយុត្តិធម៌ និងឯករាជ្យភាពនៃតុលាការកម្ពុជា។ ក្រសួងយុត្តិធម៌ខ្លួនឯង ក៏បានធ្វើកំណែទម្រង់មួយចំនួន ឆ្លើយតបនឹងការរិះគន់ពីសំណាក់សាធារណៈមតិផងដែរ។ ជាក់ស្ដែង កាលពីថ្ងៃទី២៨មករាកន្លងទៅ ក្រសួងយុត្តិធម៌បានប្រកាសពីគម្រោងដំឡើងប្រាក់ខែដល់ចៅក្រមនិងព្រះរាជអាជ្ញា ដែលមានចំនួនបន្ថែមប្រមាណ៤០ទៅ៥០ភាគរយទៅលើប្រាក់ខែបច្ចុប្បន្ន។ ប្រាក់ខែបច្ចុប្បន្ន ដែលទាបបំផុតមានចំនួន៣០០ដុល្លារអាមេរិក ក្នុងមួយខែ។
អ្នកនាំពាក្យក្រសួងយុត្តិធម៌ លោក ជិន ម៉ាលីន លើកឡើងថា ការដំឡើងប្រាក់ខែដល់ចៅក្រម និងព្រះរាជអាជ្ញានេះ គឺជាកត្តាសំខាន់មួយក្នុងការប្រយុទ្ធប្រឆាំងនឹងអំពើពុករលួយនៅក្នុងប្រព័ន្ធតុលាការកម្ពុជា។ លើសពីនេះ វាក៏ជាយន្តការនៃការកែទម្រង់ប្រព័ន្ធយុត្តិធម៌ក្នុងការលើកទឹកចិត្ត ដើម្បីធ្វើយ៉ាងណាឲ្យការអនុវត្តច្បាប់របស់ចៅក្រមនិងព្រះរាជអាជ្ញា កាន់តែមានប្រសិទ្ធភាព។
ប៉ុន្តែនាយកប្រត្តិបត្តិអង្គការតម្លាភាពកម្ពុជា លោក ព្រាប កុល អះអាងថា ការដំឡើងប្រាក់ខែតែមួយមុខ មិនអាចធ្វើឲ្យកំណែទម្រង់ប្រព័ន្ធយុត្តិធម៌ទទួលជោគជ័យនោះទេ។ ដើម្បីកែទម្រង់ប្រព័ន្ធយុត្តិធម៌នៅកម្ពុជា សម្រាប់ លោក ព្រាប កុល រដ្ឋាភិបាលនិងក្រសួងយុត្តិធម៌ ត្រូវធានាឲ្យបានថា ដំណើរការទាំងឡាយនៅក្នុងប្រព័ន្ធតុលាការត្រូវធ្វើឡើងដោយតម្លាភាព ជាពិសេសការជ្រើសរើសចៅក្រមព្រះរាជអាជ្ញា និងការប្រកាសសាលក្រមជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ