កម្ពុជាសម្តែងក្តីបារម្ភបន្ទាប់ពីកូរ៉េខាងជើងបាញ់សាកល្បងនុយក្លែអ៊ែរដោយជោគជ័យ
ចុះផ្សាយនៅថ្ងៃ៖ កែប្រែថ្ងៃទី៖
កម្ពុជាបង្ហាញក្តីបារម្ភយ៉ាងខ្លាំង បន្ទាប់ពីប្រទេសកូរ៉េខាងជើង បានបាញ់សាកល្បងនុយក្លែអ៊ែរ ដោយជោគជ័យ កាលពីថ្ងៃទី ៦ មករា និង ចាត់ទុកថា វាគឺជាការរំលោភទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ។ នេះបើតាមសេចក្តីថ្លែងការណ៍ របស់ក្រសួងការបរទេស កាលពីថ្ងៃទី ៨ មករា។ ជាមួយគ្នានេះ ប្រជាជនកូរ៉េ ដែលកំពុងរស់នៅក្រុងភ្នំពេញ ក៏បានចេញនូវសេចក្តីថ្លែងការណ៍រួមមួយ ថ្កោលទោសចំពោះទង្វើររបស់កូរ៉េខាងជើង និងបានស្នើសុំឲ្យសហគមន៍អន្តរជាតិ ចាត់វិធានការណ៍ទៅលើបញ្ហានេះផងដែរ។ (អត្ថបទដោយ សរ ពិសី)
ក្រសួងការបរទេស កាលពីថ្ងៃទី ៨ មករា បានចេញសេចក្តីថ្លែងការណ៍មួយ ស្តីពីការព្រួយបារម្ភរបស់កម្ពុជា បន្ទាប់ពីមានការបាញ់សាកល្បងនុយក្លែអ៊ែរ ឬ គ្រាប់បែកអ៊ីដ្រូសែន របស់ទីក្រុងព្យុងយ៉ាង ប្រទេសកូរ៉េខាងជើង កាលពីថ្ងៃទី ៦ មករា កន្លងទៅនេះ។
នៅក្នុងសេចក្តីថ្លែងការណ៍ដដែល បញ្ជាក់ថា កម្ពុជា ចាត់ទុក ទង្វើររបស់កូរ៉េខាងជើង គឺរំលោភទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ និង បង្កការគំរាមគំហែងយ៉ាងធ្ងន់ធ្ងរដល់សន្តិភាព សន្តិសុខ និង ស្ថេរភាពក្នុងតំបន់។
មិនត្រឹមតែប៉ុណ្ណោះ កម្ពុជា ក៏បានអំពាវនាវដល់ប្រទេសកូរ៉េខាងជើង ឲ្យគោរពតាមសេចក្តីសម្រេចចិត្តរបស់ក្រុមប្រឹក្សាសន្តិសុខរបស់អង្គការសហប្រជាជាតិ កាតព្វកិច្ចអន្តរជាតិ និង ការប្តេជ្ញាចិត្តក្នុងការលប់បំបាត់នុយក្លែអ៊ែរនៅឧបទ្វីបកូរ៉េ។
មិនត្រឹមតែកម្ពុជាទេ ដែលសម្តែងក្តីបារម្ភពីបញ្ហានុយក្លែអ៊ែរ របស់កូរ៉េខាងជើងនេះ សូម្បីតែប្រជាជនកូរ៉េដែលកំពុងនៅទីក្រុងភ្នំពេញ ក៏បានចេញសេចក្តីថ្លែងការណ៍រួមមួយ បង្ហាញនូវកង្វល់ពីបញ្ហានេះផងដែរ ។ ជាក់ស្តែង កាលពីថ្ងៃទី ៨ មករា ប្រជាជនកូរ៉េ ជាង ១ ម៉ឺន ៥ ពាន់ នាក់ នៅទីក្រុងភ្នំពេញ បានចេញនូវសេចក្តីថ្លែងការណ៍មួយ ប្រតិកម្មចំពោះការបាញ់សាកល្បងគ្រាប់បែកអ៊ីដ្រូសែនរបស់ទីក្រុងព្យុងយ៉ាងនេះផងដែរ។
ប្រជាជនកូរ៉េ បានធ្វើការថ្កោលទោសយ៉ាងខ្លាំងចំពោះការបាញ់សាកល្បងនុយក្លែអ៊ែររបស់កូរ៉េខាងជើងសារជាថ្មីម្តងទៀតនេះ បើទោះជាមានការព្រមាន ជាបន្តបន្ទាប់ពីសំណាក់អង្គការសហប្រជាជាតិ សហគមន៍អន្តរជាតិ និង រដ្ឋាភិបាលប្រទេសកូរ៉េខាងត្បូងក៏ដោយ។
គួរជម្រាបជូនថា ការបាញ់សាកល្បងនុយក្លែអ៊ែរ ឬ គ្រាប់បែកអ៊ីដ្រូសែន របស់កូរ៉េខាងជើង បានធ្វើឡើងចំនួន បួន ដង រួចមកហើយ នៅក្នុងឆ្នាំ ២០០៦ ឆ្នាំ ២០០៩ ឆ្នាំ ២០១៣ និង ឆ្នាំ ២០១៦ នេះ។ ប៉ុន្តែ ការបាញ់សាកល្បងនុយក្លែអ៊ែរចុងក្រោយនេះ ពោលគឺ កាលពីថ្ងៃទី ៦ មករា ត្រូវបានទីក្រុងព្យុងយ៉ាង ចាត់ទុកថា ជាការសាកល្បងប្រកបដោយជោគជ័យ ជាលើកទីមួយនៃ គ្រាប់បែកអ៊ីដ្រូសែន។
ទោះបីជាយ៉ាងណាក៏ដោយ បន្ទាប់ពីជោគជ័យរបស់កូរ៉េខាងជើងនេះ ប្រទេសមហាអំណាចជាច្រើន រួមមាន សហរដ្ឋអាមេរិក ជប៉ុន កូរ៉េខាងត្បូង ជាដើមនោះ បានធ្វើការថ្កោលទោសជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ