អានតួអត្ថបទ
កម្ពុជា

ទុន​វិនិយោគ ​កំលាំង​ពលកម្ម ​តម្លៃ​ពលកម្ម​ក្នុង​វិស័យ​សំណង់​​​ឆ្នាំ​​២០១៧ ​​កើន​ជាង​ឆ្នាំ​២០១៦​ច្រើន

សំណង់អគារខ្ពស់-ទាប ដែលគេសាងសង់ឡើងនៅរាជធានីភ្នំពេញ
សំណង់អគារខ្ពស់-ទាប ដែលគេសាងសង់ឡើងនៅរាជធានីភ្នំពេញ Nhim Sophal/rfi
ដោយ៖ ញឹម សុផល
១៥ នាទី

គម្រោង​វិនិយោគ​និង​ទុន​វិនិយោគ​លើ​វិស័យ​សំណង់​ពេញ​មួយ​ឆ្នាំ​២០១៧​នេះ ​បាន​កើន​ឡើង​ជាង​២៣​ភាគរយ ​ធៀប​នឹង​ឆ្នាំ​២០១៦​។ ​ការ​ប៉ាន់​ប្រមាណ​នេះ ​បាន​រំលេច​ឡើង​នៅ​ក្នុង​របាយការណ៍​មួយ ​ដែល​បាន​បង្ហាញ​នៅ​ក្នុង​សន្និបាត​ប្រចាំ​ឆ្នាំ​របស់​ក្រសួង​រៀបចំ​ដែន​ដី ​​នគ​រូប​នីយកម្ម ​និង​សំណង់ ​ដែល​បាន​រៀបចំ​ធ្វើ​នៅ​ថ្ងៃ​ទី​២៨​ធ្នូ​នេះ ​នៅ​ក្រសួង​ដែនដី​។

ផ្សាយពាណិជ្ជកម្ម

ទិន្នន័យ​សំណង់​នៅ​ទូទាំង​ប្រទេស​នា​ឆ្នាំ​២០១៧​នេះ ​បង្ហាញ​ថា ​គម្រោង​សាងសង់​សរុប​មាន​៣០៥២​ គម្រោង​ មាន​ផ្ទៃ​ក្រឡា​ជាង​១០​លាន​ម៉ែត្រ​ការ៉េ ​ដែល​មាន​តម្លៃ​ប៉ាន់​ស្មាន​ទុន​វិនិយោគ​ប្រមាណ ​ជាង​៦​ពាន់​លាន​ដុល្លារ ​ធៀប​នឹង​រយៈពេល​ដូចគ្នា​នៃ​ឆ្នាំ​២០១៦ ​មាន​ចំនួន​២៤០៥ ​គម្រោង ​និង​មាន​ផ្ទៃ​ក្រឡា​សរុប​ជាង​១១​លាន​ម៉ែត្រ​ការ៉េ ​ហើយ​តម្លៃ​ប៉ាន់​ស្មាន​ទុន​វិនិយោគ​វិញ​គឺ​មាន​ប្រមាណ​ជាង​៥​ពាន់​លាន​ដុល្លារ​។

របាយការណ៍​សំណង់​ប្រចាំ​ឆ្នាំ​របស់​ក្រសួង​រៀបចំ​ដែនដី ​បាន​ធ្វើ​ការ​បែង​ចែក​ជា​២​ផ្នែក ​ចំពោះ​គម្រោង ​សាងសង់​នេះ ​គឺ​តាម​រយៈ​សមត្ថកិច្ច​ក្រសួង​មាន​ចំនួន​២៣៦ ​គម្រោង ​និង​តាមរយៈ​សមត្ថកិច្ច​សាលា​រាជធានី​-ខេត្ត ​មាន​ចំនួន​២៨១៦ ​គម្រោង​។

ដោយឡែក​សំណង់​លំនៅ​ឋាន ​សម្រាប់​ឆ្នាំ​២០១៧ ​គឺ​មាន​សរុប ​២២៩១ ​គម្រោង ​និង​មាន​ទុន​វិនិយោគ​ជាង​២​ពាន់​លាន​ដុល្លារ​។ ​ក្នុង​នោះ​របាយការណ៍​បាន​លម្អិត​ថា ​គម្រោង​អគារ​ខ្ពស់​ៗ​ចាប់ពី​៥​ជាន់​ឡើង​ទៅ​នៅ​រាជធានី​ភ្នំពេញ​សរុប​ក្នុង​ឆ្នាំ​២០១៧ ​មាន​ចំនួន​១៨៨ ​គម្រោង​។​ ជារួម​សំណង់​ទូទាំង​ប្រទេស​គិត​ចាប់តាំង​ពី​ឆ្នាំ ​២០០០ ​ដល់​ឆ្នាំ​២០១៧ ​សមត្ថកិច្ច​បាន​ចេញ​លិខិត​អនុញ្ញាត​សាងសង់​ចំនួន ​៣៩ ៩០៣ ​គម្រោង ​ដែល​មាន​ផ្ទៃ​ក្រឡា​សំណង់​សរុប​ច្រើន​ជាង១០២​លាន​ម៉ែត្រ​ការ៉េ ​និង​តម្លៃ​ប៉ាន់​ស្មាន​ទុន​វិនិយោគ​សរុប​ជាង ​៣៧​ពាន់​លាន​ដុល្លារ​។

ជាមួយគ្នា​នេះ ​ការ​រីកចំរើន​លើ​វិស័យ​សំណង់​នៅ​ឆ្នាំ​២០១៧​នេះ​ដែរ​ បាន​បង្កើត​ការងារ​ដល់​ពលរដ្ឋ​ខ្មែរ​គិត​ជា​មធ្យម​ពី​ ២៥៥ ០០០​នាក់​ទៅ​២៦០ ០០០​នាក់​ក្នុង​មួយ​ថ្ងៃ​។ ​របាយការណ៍​ក្រសួង​ដែនដី​បន្ត​ថា​ ចំនួន​ការងារ​មាន​ការ​កើន​ឡើង​ជាង​៤០​ភាគរយ ​បើ​ធៀប​ទៅ​នឹង​ឆ្នាំ​២០១៦​។

​ដំណាល​គ្នា​នេះ ​តាម​​រយៈ​​ការ​សិក្សា​ស្រាវជ្រាវ​ក្នុង​ឆ្នាំ​២០១៧ ​តម្លៃ​ពលកម្ម​សម្រាប់​កម្មករ​គ្មាន​ជំនាញ​ក្នុង​មួយ​ថ្ងៃ​ទទួល​បាន​ពី ​៣៥ ០០០​រៀល​ទៅ ​៤០ ០០០​រៀល ​ប្រមាណ​ជា​១០​ដុល្លារ​។​ចំពោះ​កម្មករ​ជំនាញ​និង​មេជាង​វិញ ​ក្នុង​មួយថ្ងៃ​អាច​ទទួល​បាន​ពី​៥០ ០០០​រៀល ​ទៅ​៧៥ ០០០​រៀល ​ហើយ​ចំពោះ​វិស្វករ ​ស្ថាបត្យករ​និង​អ្នក​ជំនាញ​ផ្សេង​ៗ​ទៀត ​ពួកគេ​ទទួល​បាន​ប្រាក់បៀវត្ស​ចន្លោះ​ពី​៤០០​ទៅ​២៥០០​ដុល្លារ ​ក្នុង​មួយ​ខែ​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ