គណបក្សកាន់អំណាចនាំមុខដាច់ក្នុងការបោះឆ្នោតក្រុមប្រឹក្សា ខណៈបក្សផ្សេងទៀតបានសំឡេងតិចតួច
ចុះផ្សាយនៅថ្ងៃ៖
លទ្ធផលបឋមនៃការបោះឆ្នោតជ្រើសរើសក្រុមប្រឹក្សា អាណត្តិទី៣ ដែលបិទបញ្ចប់ម្សិលមិញ បង្ហាញថា គណបក្សប្រជាជនកម្ពុជា បានទទួលសំឡេងលើសលប់ ហើយក៏នឹងឈានទៅគ្រប់គ្រងអាសនៈស្ទើរទាំងស្រុងនៅរដ្ឋបាលថ្នាក់ក្រោមជាតិនេះ។ ប៉ុន្តែតំណាងគណបក្សមួយ ដែលទំនងជាមិនទទួលអាសនៈទាល់តែសោះ បានស្នើទៅ គ.ជ.ប ឱ្យមានតំណាងគណបក្សចម្រុះនៅថ្នាក់ក្រោមជាតិ ដើម្បីបង្ហាញពីដំណើរការលទ្ធិប្រជាធិបតេយ្យ។
យោងតាមលទ្ធផលបឋមដែលគណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសកាលពីយប់ថ្ងៃទី២៦ ខែឧសភា គឺគណបក្សប្រជាជនកម្ពុជាកំពុងកាន់អំណាច បានទទួលសំឡេងលើសលប់ ទាំងនៅថ្នាក់រាជធានី ខេត្ត និងថ្នាក់ក្រុង ស្រុក ខណ្ឌ សម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៣។
ចំណែកគណបក្សហ្វ៊ុនស៊ិនប៉ិច និងគណបក្សខ្មែររួបរួមជាតិ ទទួលបានសំឡេងខ្លះដែរ តែនៅដាច់ឆ្ងាយពីគណបក្សប្រជាជនកម្ពុជា នៅគ្រាដែលគណបក្សចំនួន៤ទៀត មានខ្លះមិនទទួលបានសំឡេងទាល់តែសោះ។
សូមជម្រាបថា គណបក្សដែលចូលរួមប្រកួតក្នុងការបោះឆ្នោតជ្រើសរើសក្រុមប្រឹក្សាអាណត្តិទី៣នេះ មាន គណបក្សប្រជាជនកម្ពុជា គណបក្សហ៊្វុនស៊ិនប៉ិច គណបក្សខ្មែររួបរួមជាតិ គណបក្សសញ្ជាតិកម្ពុជា គណបក្សខ្មែរសាធារណរដ្ឋ គណបក្សយុវជនកម្ពុជា និងគណបក្សឆន្ទៈខ្មែរ។
គណបក្សឆន្ទៈខ្មែរ ដែលទំនងជាមិនទទួលបានអាសនៈសោះ បានស្នើទៅ គ.ជ.ប ជួយរៀបចំឱ្យមានតំណាងគណបក្សចម្រុះនៅថ្នាក់ក្រោមជាតិ។ មូលហេតុដែលគណបក្សឆន្ទៈខ្មែរស្នើបែបនេះ ត្រូវបានលោក តុល ប្រាសាទ ដែលជាតំណាងគណបក្ស អះអាងថា ដើម្បីជំរុញឱ្យលទ្ធិប្រជាធិបតេយ្យនៅក្នុងប្រទេសកម្ពុជាដំណើរការកាន់តែប្រសើរជាងមុន។ លោកបន្តថា គណបក្សលោកមិនមានអង្គបោះឆ្នោតទេ ប៉ុន្តែនៅតែសម្រេចចិត្តចូលរួមការបោះឆ្នោតជ្រើសរើសក្រុមប្រឹក្សានេះ គឺដើម្បីបង្ហាញថាមានគណបក្សនយោបាយចម្រុះនៅថ្នាក់មូលដ្ឋាន។
សូមបញ្ជាក់ថា អាសនៈ ក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៣នេះ គឺមានចំនួនសរុប៤១១៤អាសនៈ ក្នុងនោះ ក្រុមប្រឹក្សារាជធានី ខេត្ត មានចំនួន ៥៥៩អាសនៈ និង ក្រុមប្រឹក្សាក្រុង ស្រុក ខណ្ឌ មានចំនួន៣៥៥៥អាសនៈ។ ដោយឡែក គណបក្សហ្វ៊ុនស៊ិនប៉ិចដែលមានសំឡេងតាមពីក្រោយគណបក្សប្រជាជនកម្ពុជារំពឹងថានឹងទទួលបានអាសនៈខ្លះក្នុងចំណោមអសនៈទាំង៤១១៤នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ