កម្ពុជា

សុខភាព​របស់​វេជ្ជបណ្ឌិត Beat Richner នៅ​មិន​ទាន់​មាន​ដំណឹង​ថ្មី​ តែតំណែង​របស់​គាត់​ នឹង​ត្រូវ​មាន​អ្នក​ជំនួស​នៅ​ខែ​ក្រោយ !

លោក Beat Richner និងក្មេងៗអ្នកជំងឺនៅមន្ទីរពេទ្យគន្ធបុប្ផា។
លោក Beat Richner និងក្មេងៗអ្នកជំងឺនៅមន្ទីរពេទ្យគន្ធបុប្ផា។ @Google

ចំពោះ​ស្ថានភាព​សុខភាព​របស់​លោក​វេជ្ជបណ្ឌិត Beat Richner អតីត​ប្រធាន​មន្ទីរពេទ្យ​គន្ធបុប្ផា គឺ​គេ​នៅ​មិន​ទាន់​មាន​ដំណឹង​ថ្មី​នៅ​ឡើយ​ទេ។​ ក៏​ប៉ុន្តែ នៅ​ថ្ងៃ​នេះ វេជ្ជបណ្ឌិត Danis Laurent ជំនួយ​ការ​ផ្ទាល់​របស់​វេជ្ជបណ្ឌិត Beat Richnerបាន​បញ្ជាក់​ប្រាប់​វិទ្យុ​បារាំង​RFI ថា លោក​ Richner កំពុង​បន្ត​សម្រាក​ព្យាបាល​នៅ​ប្រទេស​ស្វីស​នៅ​ឡើយ ។ ចំណែក​ស្ថានភាព​ទូទៅ​របស់​មន្ទីរ​ពេទ្យ​នៅ​បម្រើ​ការ​ល្អ​ដូច​ប្រក្រតី​។ ដោយ​ឡែក ​តំណែង​ការងារ​របស់​លោក Richner នឹង​ត្រូវ​មាន​អ្នក​ជំនួស​នៅ​ខែ​ក្រោយ​នេះ។​ សូម​ស្តាប់​ប្រសាសន៍​របស់​វេជ្ជបណ្ឌិត Danis Laurent ជំនួយ​ការផ្ទាល់​របស់លោក​វេជ្ជបណ្ឌិត Beat Richner ដែល​រៀប​ចំ​ប្រែ​សម្រួលដោយ ហេង ឧត្តម និង​ សឿង ភារៈ។​ 

ផ្សាយពាណិជ្ជកម្ម

 

RFI khmer : លោក Danis Laurent ! លោកគឺជា​ជំនួយការ​របស់​វេជ្ជបណ្ឌិត Beat Richner។ តើ​ពេលនេះ សុខភាព​របស់គាត់​យ៉ាងណា​ហើយ?

Danis Laurent : ហ្នឹងហើយ ខ្ញុំ​ជា​ជំនួយ​ការ​ផ្ទាល់​របស់​លោក​វេជ្ជបណ្ឌិត Beat Richner។ ប៉ុន្តែ​រហូត​មកដល់​ពេល​នេះ ខ្ញុំ​ខ្លួន​ឯង​ផ្ទាល់ហ្នឹង ក៏​មិនដឹង​ដំណឹង​ថ្មី​អ្វី​ពី​គាត់នោះដែរ​។ ខ្ញុំ​គ្មាន​​ទាន់​មាន​ដំណឹង​អី​ថ្មីសោះ​។ គ្រាន់​តែដឹង​ថា គាត់នៅតែបន្ត​ស្នាក់នៅ​ប្រទេស​ស្វីស​​​​នៅឡើយ។

RFI khmer : ដូច្នេះ លោក​ក៏​មិន​ទាន់​ដឹង​ដែរថា ពេល​ណា​គាត់​នឹង​ត្រឡប់​មកស្រុក​ខ្មែរវិញ?​ ហើយ​លោក​ក៏​មិន​ដឹងថា ពេលណា​គាត់​ចាប់​ផ្តើម​ការងារ​វិញដែរ​​? មែនទេ​បាទ!

Danis Laurent :ទេ! ខ្ញុំ​មិន​ទាន់​ដឹង​​ទេ។ ក៏ប៉ុន្តែ យើង​មាន​ប្រធាន​និង​អនុប្រធាន​មូលនិធិមន្ទីរពេទ្យ​គន្ធបុប្ផា ដែល​នឹងអញ្ជើញ​​មក​ដល់កម្ពុជា​ ​នៅ​ខែ​ក្រោយ​នេះ​។ សូម​លោក​ជ្រាប​ថា លោកអនុប្រធាន​មូលនិធិ​, វេជ្ជបណ្ឌិត ធូឌ័រ គឺត្រូវ​បាន​តែង​តាំងបណ្តោះអាសន្ន ​ឲ្យ​កាន់​ការងារ​ជំនួស​ ​វេជ្ជបណ្ឌិត Beat Richner។ ការ​តែងតាំង​នេះ បានធ្វើ​ឡើង​ពី​ខែមុន​មកម្ល៉េះ។  ពេល​នេះ គាត់​នៅ​ប្រទេស​ស្វី​ស​នោះ​ស្រាប់ ហើយ​គាត់​នឹង​​មក​ដល់ស្រុក​ខ្មែរ នៅខែក្រោយ។ ដូច្នេះ បើ​លោក​មាន​អី​ចង់​ដឹង ចង់​សួរ គឺ​ប្រធាន​និង​អនុប្រធាន​មូលនិធិរបស់​យើង នឹង​មក​ដល់ ខែក្រោយនេះ​!​​ ហើយចាំ​​សួរ​បញ្ជាក់​ពួក​គាត់​ចុះ​ ​ នៅក្រោយ​ថ្ងៃទី​១៥ឧសភា!​

RFI khmer : លោកវេជ្ជបណ្ឌិត Danis Laurent  តើ​លោក​អាច​ជម្រាប​ពី​ស្ថាន​ភាព​មន្ទីរពេទ្យ​គន្ធបុប្ផា បន្តិច​ផងបានទេ​? ​ក្រោយ​អវត្តមាន​របស់​វេជ្ជបណ្ឌិត Beat Richnner តើមាន​ជួប​ការ​លំបាក​អ្វីខ្លះដែរទេ ក្នុង​ការ​ផ្តល់​សេវា​កម្ម​?​

Danis Laurent : អូ! ចំពោះ​សកម្មភាព​ផ្តល់​សេវា​កម្ម គឺ​នៅតែ​ដូច​មុន​ដដែល។​ ឧទាហរណ៍មួយ !  ប្រហែល​ជា​លោក​បាន​ជ្រាប​ផង​ក៏មិនដឹង ថា​នៅក្នុង​ពេល​ចូលឆ្នាំ​ខ្មែរ ឆ្នាំថ្មីដែល​ទើប​នឹង​កន្លង​ផុត​នេះ!​ យើង​បាន​ទទួល​វេះកាត់ព្យាបាល ករណី​គ្រោះថ្នាក់​ចរាចរណ៍ ១១៨ ករណី។ យើង​ព្យាបាល​ដូច​តែពីមុន​ដែរ។ អឺ យើង​អាច​​និយាយបាន​ថា ដំណើរ​ការ​ទូទៅ​របស់​មន្ទីរពេទ្យ និង​ការ​ព្យបាលផ្តល់​សេវាកម្ម​ គឺ​ធានា​បា​នគុណភាព​ និង​លក្ខខណ្ឌ​ល្អ​ ១០០ភាគរយ ដូច​ពីមុន​ដែរ ។​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI